ഓസ്ട്രേലിയക്കാർക്ക് ന്യൂസിലന്റിലേക്ക് ക്വാറന്റൈനില്ലാതെ യാത്ര ചെയ്യാം

Metrom Australia April 6, 2021 GOVERNMENT

ഏപ്രില്‍ 19 മുതല്‍ ഓസ്‌ട്രേലിയക്കാര്‍ക്ക് ക്വാറന്റൈന്‍ നിബന്ധനകളില്ലാതെ ന്യൂസിലന്റിലേക്ക് യാത്ര ചെയ്യാം. ഓസട്രേലിയയില്‍ നിന്ന് ന്യൂസിലന്റിലേക്കും തിരിച്ചും ക്വാറന്റൈന്‍ നിബന്ധനകളില്ലാതെ യാത്ര സാധ്യമാക്കുന്ന യാത്രാ ബബ്ള്‍ ന്യൂസിലന്റ് പ്രധാനമന്ത്രി ജസീന്ത ആര്‍ഡന്‍ പ്രഖ്യാപിച്ചു. വൈറസിനെ നിയന്ത്രിക്കാനുള്ള നടപടികള്‍ക്കൊപ്പം അതിര്‍ത്തി തുറക്കാനും കഴിയുന്നത് നിര്‍ണ്ണായകമായ ഒരു ചുവടുവയ്പ്പാണെന്ന് ജസീന്ത ആര്‍ഡന്‍ പറഞ്ഞു. ന്യൂസിലന്റ് സമയം ഏപ്രില്‍ 18 അര്‍ദ്ധരാത്രി മുതലാണ് യാത്രാ ബബ്ള്‍ തുടങ്ങുന്നത്. അതായത്, ഏപ്രില്‍ 19 മുതല്‍ ഓസ്‌ട്രേലിയക്കാര്‍ക്ക് ന്യൂസിലന്റിലേക്ക് യാത്ര ചെയ്തു തുടങ്ങാന്‍ കഴിയും.

ന്യൂസിലന്റിലെ എല്ലാ വിമാനത്താവളങ്ങളിലേക്കും യാത്രാ ബബ്‌ളിലൂടെ എത്തിച്ചേരാന്‍ കഴിയും. വിമാന ലഭ്യത അടിസ്ഥാനാക്കിയായിരിക്കും ഇത്. യാത്രാ ബബ്‌ളിലൂടെ ന്യൂസിലന്റിലെത്തുന്ന ഓസ്‌ട്രേലിയക്കാര്‍, ഗ്രീന്‍ സോണ്‍ എന്ന പ്രത്യേക മേഖലയിലൂടെയാകും വിമാനത്താവളങ്ങളില്‍ കടന്നുപോകുക. മറ്റു വിമാനങ്ങളിലുള്ളവരുമായി ഇവര്‍ക്ക് ഒരുവിധ സമ്പര്‍ക്കവും ഉണ്ടാകില്ല.

വിമാനത്തില്‍ മാസ്‌ക് ധരിക്കേണ്ടി വരും. കോണ്‍ടാക്റ്റ് ട്രേസിംഗിനായുള്ള ന്യൂസിലന്റിന്റെ ആപ്പ് ഡൗണ്‍ലോഡ് ചെയ്യാനും ആവശ്യപ്പെടും. ന്യൂസിലന്റിലായിരിക്കുമ്പോള്‍ ബന്ധപ്പെടാന്‍ കഴിയുന്ന ഫോണ്‍ നമ്പരും അധികൃതര്‍ക്ക് നല്‍കേണ്ടിവരും. അതേസമയം ഇരു രാജ്യങ്ങളില്‍ എവിടെയെങ്കിലും കൊവിഡ് സാമൂഹ്യവ്യാപനം പൊട്ടിപ്പുറപ്പെടുകയാണെങ്കില്‍ ഈ ബബ്ള്‍ നിര്‍ത്തിവയ്ക്കുന്ന കാര്യംപരിഗണിക്കും. സാഹചര്യം കണക്കിലെടുത്താകും ഇത്.

അതോടൊപ്പം ഏപ്രില്‍ 19 മുതല്‍ ന്യൂസിലന്റിലേക്ക് സര്‍വീസ് നടത്തുമെന്ന് ക്വാണ്ടസും ജെറ്റ്സ്റ്റാറും പ്രഖ്യാപിച്ചു. നേരത്തേ ഉണ്ടായിരുന്ന എല്ലാ സര്‍വീസുകളും പുനസ്ഥാപിക്കുന്നതിനൊപ്പം,  ഓക്ക്‌ലാന്റില്‍ നിന്ന് കെയിന്‍സിലേക്കും ഗോള്‍ഡ് കോസ്റ്റിലേക്കും സര്‍വീസുണ്ടാകും. എയര്‍ ന്യൂസിലന്റും സര്‍വീസ് തുടങ്ങുന്ന കാര്യം പ്രഖ്യാപിച്ചിട്ടുണ്ട്.

കഴിഞ്ഞ വര്‍ഷം ഒക്ടോബര്‍ മുതല്‍ തന്നെ ന്യൂസിലന്റില്‍ നിന്നുള്ളവര്‍ക്ക് ഓസ്‌ട്രേലിയയിലേക്ക് വരാന്‍ അനുമതി നല്‍കിയിരുന്നു. വെസ്റ്റേണ്‍ ഓസ്‌ട്രേലിയ ഒഴികെയുള്ള മറ്റു സംസ്ഥാങ്ങളാണ് ഈ വണ്‍-വേ ട്രാവല്‍ ബബ്‌ളിന്റെ ഭാഗമായിരുന്നത്. ഇത് രണ്ടു ഭാഗത്തേക്കുമാക്കി മാറ്റുകയാണ് ഇപ്പോള്‍.
 

Related Post