ന്യൂസിലാണ്ട് - ഓസ്‌ട്രേലിയ ടി20 പരമ്പര വെല്ലിംഗ്ടണില്‍

Metrom Australia March 1, 2021 SPORTS

ന്യൂസിലാണ്ടില്‍ പുതിയ കോവിഡ് കേസുകള്‍ റിപ്പോര്‍ട്ട് ചെയ്ത സാഹചര്യത്തില്‍ ന്യൂസിലാണ്ടും ഓസ്‌ട്രേലിയയും തമ്മിലുള്ള ടി20 പരമ്പരയും ന്യൂസിലാണ്ട് - ഇംഗ്ലണ്ട് വനിത ടി20 പരമ്പരയും വെല്ലിംഗ്ടണില്‍ ആവും നടക്കുക എന്ന് ന്യൂസിലാണ്ട് ക്രിക്കറ്റ് അറിയിച്ചു. വെല്ലിംഗ്ടണില്‍ അലര്‍ട്ട് ലെവല്‍ 2 പ്രോട്ടോക്കോളുകള്‍ നിലനില്‍ക്കുന്നതിനാല്‍ തന്നെ അടച്ചിട്ട സ്റ്റേഡിയത്തിലാവും മത്സരങ്ങള്‍ നടക്കുക. മാര്‍ച്ച് 5ന് ഓക്ലാന്‍ഡില്‍ നടക്കാനിരുന്ന ഡബിള്‍ ഹെഡറും മാര്‍ച്ച് ഏഴിന് മൗണ്ട് മൗന്‍ഗാനൂയിയില്‍ നടക്കാനിരുന്ന രണ്ടാമത്തെ ഡബിള്‍ ഹെഡറും വെല്ലിംഗ്ടണിലേക്ക് മാറ്റിയതായും അറിയിച്ചു.
 

ഓസ്‌ട്രേലിയ- ന്യൂസിലാണ്ട് ടി20 മത്സരം അടച്ചിട്ട സ്റ്റേഡിയത്തില്‍

Metrom Australia Feb. 27, 2021 SPORTS

ന്യൂസിലാണ്ടില്‍ പുതിയ കോവിഡ് കേസ് റിപ്പോര്‍ട്ട് ചെയ്തതോടെ ഇനിയുള്ള ഓസ്‌ട്രേലിയ- ന്യൂസിലാണ്ട് മത്സരങ്ങള്‍ അടച്ചിട്ട സ്റ്റേഡിയത്തില്‍ മാത്രം നടത്തുമെന്ന് ക്രിക്കറ്റ് ഓസ്‌ട്രേലിയ. ഓക്ലാന്‍ഡ് നഗരത്തില്‍ ലെവല്‍ 3 അലര്‍ട്ട് പ്രഖ്യാപിച്ചതോടെയാണ് ഈ തീരുമാനം. വെല്ലിംഗ്ടണില്‍ മാര്‍ച്ച് മൂന്നിനാണ് ഓസ്‌ട്രേലിയയും ന്യൂസിലാണ്ടും തമ്മിലുള്ള മൂന്നാം ടി20. ഇംഗ്ലണ്ടുമായുള്ള ന്യൂസിലാണ്ട് വനിതകളുടെ മത്സരത്തിനും കാണികള്‍ക്ക് പ്രവേശനം ഉണ്ടാകില്ല.
 

രോഹിത് ശര്‍മയുടെ റെക്കോര്‍ഡ് മറികടന്ന് ന്യൂസിലാന്‍ഡ് താരം മാര്‍ട്ടിന്‍ ഗപ്റ്റില്‍

Metrom Australia Feb. 25, 2021 SPORTS

ഡ്യൂന്‍ഡിന്‍: ഓസ്ട്രേലിയക്കെതിരായ രണ്ടാം ട്വന്റി20യിലെ വെടിക്കെട്ടോടെ രോഹിത് ശര്‍മയുടെ റെക്കോര്‍ഡ് മറികടന്ന് ന്യൂസിലാന്‍ഡ് താരം മാര്‍ട്ടിന്‍ ഗപ്റ്റില്‍. ടി20യില്‍ ഏറ്റവും കൂടുതല്‍ സിക്സ് പറത്തുന്ന ബാറ്റ്സ്മാന്‍ എന്ന നേട്ടം ഗപ്റ്റില്‍ സ്വന്തമാക്കി. 96 മത്സരങ്ങളില്‍ നിന്ന് 132 സിക്സുകള്‍ എന്ന നേട്ടത്തിലാണ് രോഹിത്തിനെ ഗപ്റ്റില്‍ പിന്നിലേക്ക് മാറ്റി നിര്‍ത്തിയത്. ഓസീസിന് എതിരെ രണ്ടാം ടി20യില്‍ 50 പന്തില്‍ നിന്ന് 97 റണ്‍സ് ആണ് ഗപ്റ്റില്‍ അടിച്ചെടുത്തത്. പറത്തിയത് എട്ട് സിക്സും ആറ് ഫോറും. 

108 ടി20യില്‍ നിന്ന് 127 സിക്സ് ആണ് രോഹിത്തിന്റെ പേരിലുള്ളത്. 97 കളിയില്‍ നിന്ന് 113 സിക്സുമായി ഇംഗ്ലണ്ട് ക്യാപ്റ്റന്‍ മോര്‍ഗനാണ് ഇവിടെ മൂന്നാം സ്ഥാനത്ത്. 107 സിക്സുമായി മണ്‍റോ നാലാമതും, 105 സിക്സുമായി ക്രിസ് ഗെയ്ല്‍ അഞ്ചാമതും നില്‍ക്കുന്നു. 58 കളിയില്‍ നിന്നാണ് ഗെയ്ലിന്റെ 105 സിക്സുകള്‍ എന്നതും ശ്രദ്ധേയമാണ്.

ക്രിക്കറ്റ് ഇതിഹാസങ്ങള്‍ വീണ്ടും പാഡണിയുന്നു

Metrom Australia Feb. 11, 2021 SPORTS

നീണ്ട ഇടവേളക്ക് ശേഷം ഇതിഹാസ താരങ്ങള്‍ വീണ്ടും ക്രീസിലിറങ്ങുന്നു. റോഡ് സേഫ്റ്റി വേള്‍ഡ് സീരീസ് ടി20യുടെ ഭാഗമായാണ് ഇതിഹാസ താരങ്ങള്‍ ഒരിക്കല്‍ കൂടി ബാറ്റ് എടുക്കുന്നത്. സച്ചിന്‍ തെന്‍ഡുല്‍ക്കറും ബ്രയാന്‍ ലാറയും മുത്തയ്യ മുരളീധരനുമടക്കം മാര്‍ച്ച് രണ്ട് മുതല്‍ 21 വരെ നടക്കുന്ന ടൂര്‍ണമെന്റിന്റെ ഭാഗമാകും. വീരേന്ദര്‍ സെവാഗ്, ബ്രയാന്‍ ലാറ, ബ്രെറ്റ് ലീ, ദില്‍ഷാന്‍ എന്നിവരുള്‍പ്പെടെ ഓസ്‌ട്രേലിയ, സൗത്ത് ആഫ്രിക്ക, ശ്രീലങ്ക, വെസ്റ്റ് ഇന്‍ഡീസ്, ഇന്ത്യ എന്നീ അഞ്ച് രാജ്യങ്ങളില്‍ നിന്നാണ് കളിക്കാരെത്തുക.
 
റായ്പൂരിലെ പുതുതായി നിര്‍മിച്ച രാജ്യാന്തര ക്രിക്കറ്റ് സ്റ്റേഡിയത്തിലാവും മത്സരങ്ങള്‍. റോഡ് സുരക്ഷയെ കുറിച്ച് അവബോധം സൃഷ്ടിക്കുന്നത് മുന്‍നിര്‍ത്തിയാണ് ടൂര്‍ണമെന്റ് സംഘടിപ്പിക്കുന്നത്. 65000 കാണികളെ ഉള്‍ക്കൊള്ളാനുള്ള ശേഷിയാണ് സ്റ്റേഡിയത്തിനുള്ളത്. കഴിഞ്ഞ വര്‍ഷം നടത്തേണ്ടിയിരുന്ന ടൂര്‍ണമെന്റ് കോവിഡ് വ്യാപനത്തെ തുടര്‍ന്ന് മാറ്റിവെക്കുകയായിരുന്നു. 

ഗോള്‍ഡ് കോസ്റ്റ് ഓള്‍ ഓസ്‌ട്രേലിയ സെവൻസ് ഫുട്‌ബോള്‍ ടൂര്‍ണമെന്റ് ഏപ്രില്‍ 17 ന്

Metrom Australia Feb. 10, 2021 SPORTS

ഗോള്‍ഡ് കോസ്റ്റ് സ്റ്റോംസ്സിന്റെ നേതൃത്വത്തില്‍ ഓള്‍ ഓസ്‌ട്രേലിയ സെവൻസ് ഫുട്‌ബോള്‍ ടൂര്‍ണമെന്റ് സംഘടിപ്പിക്കുന്നു. ഏപ്രില്‍ 17 ന് Gold Coast Sports Precinctല്‍ വെച്ച് നടക്കുന്ന ടൂര്‍ണമെന്റിന്റെ രജിസ്‌ട്രേഷന്‍ ഫീസ് 250 ഡോളറാണ്. ടൂര്‍മമെന്റിലെ ജേതാക്കള്‍ക്ക് 2500 ഡോളര്‍ സമ്മാനതുക സ്വന്തമാവുന്നതാണ്. അതേസമയം $1000, $500, $250 സമ്മാനതുകകള്‍ യഥാക്രമം രണ്ടും മൂന്നും നാലും സ്ഥാനത്തെത്തുന്ന ടീമിന് ലഭിക്കും. അല്‍റോ കണ്‍സ്ട്രക്ഷന്‍, പംകിന്‍, ലോണ്‍ ഹൗസ് ലെന്‍ഡിങ്ങ്‌ സൊലൂഷന്‍, ജെനുവിന്‍ സോളാര്‍, ഫ്‌ളൈ വേള്‍ഡ് മൈഗ്രേഷന്‍ ആന്റ് ലീഗല്‍ സര്‍വീസ് അടക്കമാണ് പരിപാടിയുടെ മുഖ്യ സ്‌പോണ്‍സര്‍മാര്‍. അതോടൊപ്പം കുടുംബത്തിനും കുട്ടികള്‍ക്കുമായി വിനോദ പരിപാടികളും ഉണ്ടായിരിക്കുന്നതാണ്. 

കൂടുതല്‍ വിവരങ്ങള്‍ക്ക് ബന്ധപ്പെടുക: തോമസ്: 0449880672, റോബിന്‍: 0457681222
Venue: Gold Coast Sports Precinct, Nerang Broadbeach Rd, CARRARA-QLD 4211