ഫ്രഞ്ച് ഓപ്പൺ: നവോമി ഒസാക്ക പുറത്ത്

Metrom Australia May 24, 2022 SPORTS

ഫ്രഞ്ച് ഓപ്പണില്‍ അട്ടിമറി. ഓപ്പണിന്റെ ആദ്യ റൗണ്ടില്‍ തന്നെ  ജപ്പാന്‍റെ മുന്‍ ഒന്നാം നമ്പര്‍ താരം നവോമി ഒസാക്ക പുറത്തായി. യു എസിന്റെ അമാന്‍ഡ അനിസിമോവ(7-5, 6-4) നേരിട്ടുള്ള സെറ്റുകള്‍ക്കാണ് ഒസാക്കയെ പരാജയപ്പെടുത്തിയത്. യുഎസ്, ഓസ്‌ട്രേലിയന്‍ ഓപ്പണിലെ വിജയിയായ ഒസാക്ക മല്‍സരത്തില്‍ 29 പിഴവുകളാണ് വരുത്തിയത്. 30 മിനിറ്റ് മാത്രമാണ് മത്സരം നീണ്ടുനിന്നത്. 

2021-ല്‍ പത്ര സമ്മേളനങ്ങളില്‍ പങ്കെടുക്കാന്‍ കഴിയില്ലെന്ന് ചൂണ്ടിക്കാട്ടി ഫ്രഞ്ച് ഓപ്പണില്‍ നിന്ന് ഒസാക്ക പിന്‍വാങ്ങിയിരുന്നു. ഡിപ്രഷന്‍ മൂലം ടെന്നീസ് കോര്‍ട്ടില്‍ നിന്ന് ഏറെക്കാലം ഒസാക്ക വിട്ടു നിന്നിരുന്നു.

തായ്‌ലൻഡ്‌ ഓപ്പൺ: പി.വി സിന്ധു സെമിയിൽ

Metrom Australia May 21, 2022 SPORTS

ബാങ്കോക്ക്: തായ്‌ലൻഡ്‌ ഓപ്പണ്‍ ബാഡ്മിന്‍റണിൽ ഇന്ത്യൻ താരം പി.വി സിന്ധു ലോക ഒന്നാം നമ്പറിനെ വീഴ്ത്തി സെമിയിൽ. ആറാം സീഡായ സിന്ധു ക്വാർട്ടർ ഫൈനലിൽ ജപ്പാന്‍റെ ലോക ഒന്നാം നമ്പർ അകാനെ യമാഗുച്ചിയെയാണ് കീഴടക്കിയത്. 

വെറും 51 മിനിറ്റിനുള്ളിലാണ് സിന്ധു ലോക ഒന്നാം നമ്പർ താരത്തെ മറികടന്നത്. ഒന്നിനെതിരെ രണ്ടു സെറ്റുകൾക്കായിരുന്നു സിന്ധുവിന്‍റെ വിജയം. സ്കോർ: 21-15, 20-22, 21-13. ശനിയാഴ്ച നടക്കുന്ന സെമിഫൈനലിൽ ചൈനയുടെ ഒളിമ്പിക് ചാമ്പ്യൻ ചെൻ യു ഫെയ് ആകും സിന്ധുവിന്‍റെ എതിരാളി.

ലോക വനിതാ ബോക്സിംഗ് ചാമ്പ്യൻഷിപ്പിൽ ഇന്ത്യയ്ക്ക് സ്വർണം

Metrom Australia May 20, 2022 SPORTS

വനിതകളുടെ ലോക ബോക്‌സിംഗ് ചാമ്പ്യൻഷിപ്പിൽ ഇന്ത്യയ്ക്ക് സ്വർണം. 52 കിലോ വിഭാഗം ഫൈനലിൽ തായ്‌ലൻഡിന്റെ ജിത്‌പോങ് ജുതാമസിനെ പരാജയപ്പെടുത്തിയാണ് നിഖത് സരീൻ സ്വർണം നേടിയത്. 5-0 നാണ് തെലങ്കാനയിലെ നിസാമാബാദിൽ നിന്നുള്ള ഇരുപത്തിയഞ്ചുകാരിയുടെ ജയം കൈവരിച്ചത്. ഇതോടെ ലോക കിരീടം നേടുന്ന അഞ്ചാമത്തെ ഇന്ത്യൻ വനിതാ ബോക്സറായി നിഖത് മാറി. സെമിയിൽ ബ്രസീലിന്റെ കരോലിൻ ഡി അൽമേഡയെ തോൽപ്പിച്ചാണ് നിഖാത് സരീൻ ഫൈനലിലെത്തിയത്. എം സി മേരി കോം, സരിതാ ദേവി, ജെന്നി ആർ എൽ, ലേഖ സി എന്നിവരാണ് ലോക കിരീടം നേടിയ ഇന്ത്യൻ വനിതാ ബോക്സർമാർ.

ഓസ്‌ട്രേലിയൻ ക്രിക്കറ്റ് ഇതിഹാസം ആൻഡ്രൂ സൈമണ്ട്‌സ് അന്തരിച്ചു

Metrom Australia May 15, 2022 SPORTS

ഓസ്‌ട്രേലിയൻ ക്രിക്കറ്റ് ഇതിഹാസം ആൻഡ്രൂ സൈമണ്ട്‌സ് (46) അന്തരിച്ചു. ശനിയാഴ്ച രാത്രി ടൗൺസ്‌വില്ലിന് പുറത്ത് ഒരു കാർ അപകടത്തിലായിരുന്നു മരണം. 

സൈമണ്ട്‌സ് താമസിച്ചിരുന്ന ടൗൺസ്‌വില്ലെയിൽ നിന്ന് 50 കിലോമീറ്റർ അകലെയുള്ള ഹെർവി റേഞ്ചിലായരുന്നു അപകടം. ദാരുണമായ ഈ അപകടത്തെ കുറിച്ച് അന്വേഷിക്കുകയാണെന്ന് പൊലീസ് പ്രസ്താവനയിൽ പറഞ്ഞു. രാത്രി 11 മണിക്ക് ശേഷം ഹെർവി റേഞ്ച് റോഡിൽ കാർ ഓടിക്കുന്നതിനിടയിൽ ആലീസ് റിവർ ബ്രിഡ്ജിന് സമീപം കാർ മറിയുകയായിരുന്നു എന്നാണ് പ്രാഥമിക വിവരമെന്നും ക്രിക്കറ്റ് ഓസ്ട്രേലിയ റിപ്പോർട്ട് ചെയ്യുന്നു. 

ഗുരുതരമായി പരിക്കേറ്റ അദ്ദേഹത്തെ രക്ഷപ്പെടുത്താൻ എമർജൻസി സർവീസുകൾ ശ്രമിച്ചെങ്കിലും രക്ഷിക്കാനായില്ല. സൈമണ്ട്സിന്റെ മരണത്തിന് പിന്നാലെ കുടുംബം പ്രസ്താവന പുറപ്പെടുവിച്ചതായും റിപ്പോർട്ടുകൾ പറയുന്നു. അദ്ദേഹത്തിന്റെ വിയോഗം സ്ഥിരീകരിച്ചതായും, അനുശോചനങ്ങൾക്കൊപ്പം ആദരാഞ്ജലികൾക്കുമൊപ്പം കുടുംബത്തിന്റെ സ്വകാര്യതയെ കൂടി മാനിക്കണമെന്നും അവർ ആവശ്യപ്പെട്ടു.

അന്താരാഷ്ട്ര ക്രിക്കറ്റ് കരിയറിൽ അവിസ്മരണീയ നേട്ടങ്ങൾ സ്വന്തമാക്കിയ ക്രിക്കറ്ററായിരുന്നു  അദ്ദേഹം. ഓസ്‌ട്രേലിയൻ ക്രിക്കറ്റ് കണ്ട ഏറ്റവും മികച്ച ഓൾറൗണ്ടർമാരിൽ ഒരാളായ സൈമണ്ട്‌സിന് 
ഓസ്‌ട്രേലിയയ്‌ക്കായി 198 ഏകദിനങ്ങൾ കളിച്ചു. സൈമണ്ട്‌സ് 2003ലും 2007ലും തുടർച്ചയായി ലോകകപ്പുകൾ നേടിയ ഓസ്ട്രേലിയൻ ടീമിലെ പ്രധാന അംഗമായിരുന്നു. രണ്ട് ലോകകപ്പിലും ഒരു മത്സരം പോലും സൈമണ്ട്സ് മാറി നിന്നിരുന്നില്ല. 2003 ലോകകപ്പിൽ പാകിസ്ഥാനെതിരായ മാച്ച് വിന്നിംഗ് സെഞ്ച്വറിയുമായി നിറഞ്ഞു നിന്നു. 

എതിരാളികൾ പേടിച്ചിരുന്ന അപകടകാരിയായ വലംകൈയ്യൻ ബാറ്റ്സമാനായ അദ്ദേഹം 26 ടെസ്റ്റുകളും കളിച്ചു, ഇംഗ്ലണ്ടിനും ഇന്ത്യക്കുമെതിരെ സെഞ്ച്വറി നേടി. തന്ത്രപരമായ ഓഫ് ബ്രേക്ക് ബൗളറായ അദ്ദേഹം 24 ടെസ്റ്റ് വിക്കറ്റുകൾ നേടി. ക്രിക്കറ്റിലെ ഏറ്റവും മികച്ച ഫീൽഡർമാരിൽ ഒരാളായിരുന്നു സൈമണ്ട്സ്. മിന്നുന്ന റിഫ്ലക്ഷനും കൃത്യതയാർന്ന ലക്ഷ്യബോധവും ഏകദിന ക്രിക്കറ്റിൽ ഏറ്റവും കൂടുതൽ റണ്ണൗട്ടുകൾ നേടുന്ന അഞ്ചാമത്തെ ഫീൽഡര്‍ എന്ന നേട്ടത്തിലേക്ക് അദ്ദേഹത്തെ എത്തിച്ചു.

തോമസ് കപ്പില്‍ ഇന്ത്യക്ക് ചരിത്ര നേട്ടം

Metrom Australia May 13, 2022 SPORTS

തോമസ് ആന്റ് ഊബര്‍ കപ്പ് ബാഡ്മിന്റന്‍ ചാമ്പ്യന്‍ഷിപ്പില്‍ ചരിത്രനേട്ടവുമായി ഇന്ത്യന്‍ ടീം. മലേഷ്യന്‍ ടീമിനെ 3-4 ന് തോല്‍പ്പിച്ചാണ് ഇന്ത്യന്‍ ടീം സെമിയില്‍ പ്രവേശിച്ചത്. സെമിയില്‍ പ്രവേശിച്ചതോടെ ഇന്ത്യ വെങ്കല മെഡലുറപ്പിചിരിക്കുകയാണ്. 43 വര്‍ഷത്തിന് ശേഷമാണ് ഇന്ത്യ തോമസ് കപ്പിൽ മെഡൽ കരസ്ഥമാക്കുന്നത്. നിര്‍ണായക മത്സരത്തില്‍ മലയാളി താരം എച്ച് എസ് പ്രണോയി മലേഷ്യയുടെ ലിയോങ്ങ് ജുന്നിനെതിരെ മികച്ച പ്രകടനം കാഴ്ച്ചവെച്ചു.  പി വി സിന്ദുവിന്റെ നേതൃത്തിലുള്ള വനിതാ ടീം നേരത്തേ ടൂര്‍ണമെന്റില്‍ പങ്കെടുക്കുകയും  പുറത്താകുകയും ചെയ്തിരുന്നു.  ലക്ഷ്യ സെന്‍, സാത്വിക് സായിരാജ് റങ്കിറെഡ്ഡി, ചിരാഗ് ഷെട്ടി, കിഡബി ശ്രീകാന്ത്, വിഷ്ണു വര്‍ധന്‍, കൃഷ്ണ പ്രസാദ്, എച്ച് എസ് പ്രണോയ് എന്നിവരാണ് ഇന്ത്യന്‍ പുരുഷ ടീം അംഗങ്ങൾ.