ടി20 ലോകകപ്പിന് ശേഷം ഓസീസ് ടീമില്‍ സീനിയര്‍ താരങ്ങൾ വിരമിക്കുമെന്ന് സൂചന നല്‍കി ആരോണ്‍ ഫിഞ്ച്
സിഡ്നി: ടി20 ലോകകപ്പിന് ശേഷം ഓസീസ് ടി20 ടീമില്‍ സീനിയര്‍ താരങ്ങള്‍ ടി20 ക്രിക്കറ്റ് മതിയാക്കിയേക്കുമെന്ന് സൂചന നല്‍കി നായകന്‍ ആരോണ്‍ ഫിഞ്ച്. ലോകകപ്പിന് ശേഷം താനുള്‍പ്പെടെ ടീമിലെ ഏതാനും സീനിയര്‍ താരങ്ങള്‍ ടി20 ക്രിക്കറ്റില്‍ നിന്ന് വിരമിച്ചേക്കുമെന്ന് ഫിഞ്ച് പറഞ്ഞു. ഓസ്ട്രേലിയന് വെബ്സൈറ്റിന് നല്‍കിയ അഭിമുഖത്തിലാണ് ഫിഞ്ച് ഇക്കാര്യം പറഞ്ഞത്.
30കളുടെ മധ്യത്തിലെത്തിയ പലതാരങ്ങളും ടി20 ക്രിക്കറ്റ് മതിയാക്കുമെന്ന് പറഞ്ഞ ഫിഞ്ച് പക്ഷെ ഡേവിഡ് വാര്‍ണര്‍ ഇനിയും ഒറു പത്തുവര്‍ഷം കൂടി കളിക്കുമെന്നും വ്യക്തമാക്കി. വാര്‍ണറുടെ കളിയോടുള്ള അഭിനിവേശത്തിലും കായികക്ഷമതയിലും കുറവൊന്നും വന്നില്ലെങ്കില്‍ പത്തുവര്‍ഷം കൂടി വാര്‍ണറെ കാണാം.
സ്വന്തം നാട്ടില്‍ നടക്കുന്ന ലോകകപ്പില്‍ കിരീടം നിലനിര്‍ത്താനാണ് ഓസ്ട്രേലിയ ഇറങ്ങുന്നത്. ഈ വര്‍ഷം ടി20 ലോകകപ്പ് കിരീടം നലിനിര്‍ത്തുക എന്നത് കനത്ത വെല്ലുവിളിയാണെന്നും ഫിഞ്ച് പറഞ്ഞു. കഴിഞ്ഞ വര്‍ഷം നടന്ന ലോകകപ്പില്‍ അഞ്ചില്‍ നാലു കളികള്‍ ജയിച്ചിട്ടും ദക്ഷിണാഫ്രിക്ക നെറ്റ് റണ്‍റേറ്റിന്‍റെ പേരില്‍ സെമിയില്‍ പോലും എത്താതെ പുറത്തായത് ടി20 ലോകകപ്പില്‍ ഓരോ ടീമും നേരിടുന്ന വെല്ലുവിളിക്ക് ഉദാഹരണമാണെന്നും ഫിഞ്ച് പറഞ്ഞു.
