രോഗിക്ക് അശ്ലീല സന്ദേശമയച്ചു; ഡോക്ടർക്കെതിരെ നടപടി

Metrom Australia Jan. 24, 2022 POLITICS , GOVERNMENT

രോഗിക്ക് സാമൂഹ്യമാധ്യമങ്ങള്‍ വഴി അശ്ലീല സന്ദേശമയച്ചതിന് പെര്‍ത്തിലെ ജനറല്‍ പ്രാക്ടീഷണര്‍ ഡോ. അശ്വിന്‍ മേനോനെതിരെ നടപടിയെടുക്കാന്‍ സംസ്ഥാന അഡ്മിനിസ്‌ട്രേറ്റീവ് ട്രൈബ്യൂണല്‍ ഉത്തരവിട്ടു. ഡോ. അശ്വിന്‍ മേനോനെ താക്കീത് ചെയ്യാനും, രജിസ്‌ട്രേഷനു മേല്‍ ഉപാധികള്‍ ഏര്‍പ്പെടുത്താനുമാണ് ഉത്തരവ്. ആരോഗ്യമേഖലയില്‍ പ്രവര്‍ത്തിക്കുമ്പോള്‍ പാലിക്കേണ്ട പെരുമാറ്റച്ചട്ടങ്ങള്‍ ലംഘിച്ചത് കണ്ടെത്തിയതിനെ തുടര്‍ന്ന് ട്രൈബ്യൂണല്‍ നടപടിയെടുത്തു. 

കൂടാതെ പ്രൊഫഷണല്‍ പെരുമാറ്റച്ചട്ടങ്ങള്‍ പാലിക്കുന്ന കാര്യത്തിലും, രോഗികളോട് പെരുമാറുന്ന കാര്യത്തിലും ആരോഗ്യമേഖലയിലെ മറ്റൊരാളില്‍ നിന്ന് പരിശീലനം നേടണമെന്ന് ട്രൈബ്യൂണല്‍ നിര്‍ദ്ദേശിച്ചു. അടുത്ത ആറു മാസത്തേക്കാണ് ഇങ്ങനെ പരിശീലനം നേടേണ്ടത്. അതോടൊപ്പം മെഡിക്കല്‍ ബോര്‍ഡിന്റെ നിയമനടപടി ചെലവിലേക്ക് 4,500 ഡോളര്‍ പിഴയായി നല്‍കാനും ഉത്തരവിട്ടു.

2020 ഓഗസ്റ്റ് 18നാണ് ഡോ. അശ്വിന്‍ മേനോന് ജിപി ആയി പ്രവര്‍ത്തിക്കാന്‍ രജിസ്‌ട്രേഷന്‍ കിട്ടിയത്. രണ്ടു മാസം കഴിഞ്ഞ്, ഒക്ടോബര്‍ 27ന് ചികിത്സക്കായെത്തിയ രോഗിയോട് പെരുമാറ്റച്ചട്ടങ്ങള്‍ ലംഘിക്കുന്ന രീതിയില്‍ പെരുമാറി എന്നാണ് കണ്ടെത്തല്‍. 2020 ഒക്ടോബര്‍ മുതല്‍ ഡിസംബര്‍ വരെ ചികിത്സ തേടിയിരുന്ന രോഗിക്ക്, 2021 ജനുവരി 26ന് ഡോ. അശ്വിന്‍ മേനോന്‍ ഇന്‍സ്റ്റഗ്രാം വഴി സന്ദേശമയച്ചു. പിന്നീട് ഫെബ്രുവരിയില്‍ ലൈംഗിക ചുവയുള്ള സന്ദേശങ്ങളയയ്ക്കുകയും, ഇന്‍സ്റ്റഗ്രാം വഴി വീഡിയോ കോള്‍ ചെയ്യാന്‍ ശ്രമിക്കുകയും ചെയ്തു. കൂടാതെ ഫേസ്ബുക്കില്‍ ഫ്രണ്ട് റിക്വസ്റ്റും അയച്ചിരുന്നു. രാത്രി 11 മണിക്കും, രണ്ടു മണിക്കുമെല്ലാം സന്ദേശങ്ങള്‍ അയച്ചതായും ട്രൈബ്യൂണല്‍ കണ്ടെത്തി. തുടര്‍ന്ന് മാര്‍ച്ചില്‍ ഈ രോഗി ഓസ്‌ട്രേലിയന്‍ ഹെല്‍ത്ത് പ്രാക്ടീഷണേഴ്‌സ് റെഗുലേറ്ററി അതോറിറ്റി (AHPRA)ക്ക് പരാതി നല്‍കുകയായിരുന്നു.

പരാതിയെ തുടർന്ന് 2021 മേയില്‍ തന്നെ ഡോ. അശ്വിന്‍ മേനോനെതിരെ മെഡിക്കല്‍ ബോര്‍ഡ് പ്രാഥമിക നടപടികളെടുത്തിരുന്നു. നിര്‍ദ്ദിഷ്ട സ്ഥലങ്ങളില്‍ മാത്രമേ ജോലി ചെയ്യാവൂ എന്നും, വനിതാ രോഗികളെ ചികിത്സിക്കാന്‍ പാടില്ല എന്നുമായിരുന്നു മെഡിക്കല്‍ ബോര്‍ഡ് നിര്‍ദ്ദേശിച്ചത്.തന്റെ പ്രവൃത്തി പ്രൊഫഷണല്‍ പെരുമാറ്റച്ചട്ടങ്ങള്‍ക്ക് വിരുദ്ധമാണെന്ന് ഡോ. അശ്വിന്‍ മേനോന്‍ സമ്മതിച്ചതായും, അതില്‍ പശ്ചാത്താപം പ്രകടിപ്പിച്ചതായും ട്രൈബ്യൂണല്‍ വ്യക്തമാക്കി.

കന്യാസ്ത്രീകള്‍ക്ക് പിന്തുണ നല്‍കിയുള്ള കത്തുകള്‍ 1000 പിന്നിട്ടു

Metrom Australia Jan. 21, 2022 POLITICS

കുറവിലങ്ങാട്ടെ കന്യാസ്ത്രീകൾക്ക് പിന്തുണയർപ്പിച്ച് ലഭിച്ച കത്തുകളുടെ എണ്ണം 1000 കടന്നു. ബിഷപ്പ് ഫ്രാങ്കോ മുളക്കലിന് അനുകൂലമായ വിധിയിൽ പതറാതിരിക്കാൻ കന്യാസ്ത്രീകൾക്ക് പിന്തുണ നൽകി സോഷ്യൽ മീഡിയ കാമ്പയിന് തുടക്കം കുറിച്ചിരുന്നു. സ്വന്തം കൈപ്പടയിൽ എഴുതിയ കത്തുകൾ ഫെയ്സ്ബുക്കിൽ പോസ്റ്റ് ചെയ്താണ് പിന്തുണ അറിയിച്ചത്. 

13 വയസ്സുള്ള കുട്ടികൾ മുതൽ പ്രായമുള്ളവരിൽ നിന്ന് പോലും കത്തുകൾ ലഭിച്ചു. കൊൽക്കത്ത, അസം, ബോംബെ എന്നിവിടങ്ങളിൽ നിന്ന് പോലും കത്തുകൾ ലഭിച്ചു. ഇത്തരമൊരു ഇ-മെയിൽ ഐ.ഡി പബ്ലിക്ക് ആയി കൊടുത്തിട്ടു പോലും കന്യാസ്ത്രീകളെ മോശമായി ചിത്രീകരിക്കുന്ന ഒരു കത്ത് പോലും ലഭിച്ചില്ലെന്ന് കത്തുകൾ കൈകാര്യം ചെയ്യുന്ന ആതിര മേനോൻ പറഞ്ഞു. തികച്ചും അപ്രതീക്ഷിതമായിരുന്ന കാമ്പയിന് വൻ സ്വീകരണം ജനവിഭാഗങ്ങൾക്കിടയിൽ ഉണ്ടായിരിക്കുന്നത്. കാമ്പയിന് ശേഷം എന്തെന്നുള്ളത് പ്ലാൻ ചെയ്തുകൊണ്ടിരിക്കുകയാണ്. കഴിഞ്ഞ ദിവസങ്ങളിൽ ലഭിച്ച കത്തുകൾ കന്യാസ്ത്രീകൾക്ക് കൈമാറിയിട്ടുണ്ട്.

ബ്രിട്ടിഷ് പ്രധാനമന്ത്രി സ്ഥാനത്തേക്ക് ഇന്ത്യന്‍ വംശജനെന്ന് റിപ്പോർട്ടുകൾ

Metrom Australia Jan. 15, 2022 POLITICS

ഇന്ത്യന്‍ വംശജനായ റിഷി സുനക് ബ്രിട്ടീഷ് പ്രധാനമന്ത്രി പദത്തിലെത്തുമെന്ന് റിപ്പോർട്ടുകൾ നിലവിലെ പ്രധാനമന്ത്രി ബോറിസ് ജോണ്‍സണ്‍ കോവിഡ് ലോക്ക്ഡൗണ്‍ കാലത്ത് മദ്യസത്കാരങ്ങള്‍ നടത്തിയത് വന്‍വിവാദത്തിലേക്കും അന്വേഷണത്തിലേക്കും നീങ്ങിയതോടെ അദ്ദേഹത്തിന്റെ രാജിക്ക് സാധ്യതേറെയാണ്. അങ്ങിനെയുണ്ടായാല്‍ ബ്രിട്ടനിലെ അധികാരതലത്തില്‍ പ്രധാനമന്ത്രി കഴിഞ്ഞാല്‍ അടുത്തയാള്‍ ധനമന്ത്രി(ചാന്‍സലര്‍ ഓഫ് എക്‌സ്‌ചെക്കര്‍)യാണ്. നിലവില്‍ ധനമന്ത്രിയായ റിഷി സുനകിന് വഴിതെളിഞ്ഞാല്‍ ബ്രിട്ടീഷ് പ്രധാനമന്ത്രി പദത്തിലെത്തുന്ന ആദ്യ ഇന്ത്യന്‍ വംശജനായിരിക്കും അദ്ദേഹം. ആഭ്യന്തരസെക്രട്ടറി പ്രീതി പട്ടേലിന്റെ പേരും ഉയര്‍ന്ന് വരുന്നുണ്ട്. 

ലോക്ഡൗൺ കാലത്തു പ്രധാനമന്ത്രിയുടെ ഔദ്യോഗിക വസതിയിലും സർക്കാർ മന്ദിരങ്ങളിലും കുറഞ്ഞത് 11 മദ്യവിരുന്നുകളെങ്കിലും നടന്നിട്ടുണ്ടെന്നാണു വാർത്തകൾ. 2020 മേയില്‍ രാജ്യം ലോക്ഡൗണില്‍ ആയിരുന്നപ്പോള്‍ ഡ്രൗണിങ് സ്ട്രീറ്റിലെ ഔദ്യോഗിക വസതിയില്‍ മദ്യപാന പാര്‍ട്ടി നടത്തിയതിന്റെ പേരില്‍ സ്വന്തം പാര്‍ട്ടിക്കുള്ളില്‍ നിന്നും പ്രതിപക്ഷത്തു നിന്നും രാജി ആവശ്യം ശക്തമാകുന്നുണ്ട്. 

കൂടാതെ 2021 ഏപ്രിൽ 16നു രാത്രി പ്രധാനമന്ത്രിയുടെ ഔദ്യോഗികവസതിയിൽ യാത്രയയപ്പുമായി ബന്ധപ്പെട്ട് സാമൂഹിക നിയന്ത്രണം കാറ്റിൽപറത്തി രണ്ടു മദ്യസൽക്കാരം നടന്നുവെന്നു 'ദ് ടെലിഗ്രാഫ്' പത്രത്തിൻ്റെ റിപ്പോർട്ടുണ്ട്. ഇതിൽ 30 ​ഓളം ആളുകളാണ് പ​ങ്കെടുത്തത്. പാർട്ടിയിൽ പ​ങ്കെടുത്ത ജീവനക്കാർ സമീപത്തെ സൂപ്പർമാർക്കറ്റിൽ നിന്ന് സൂട്ട്കേസ് നിറയെ മദ്യം വാങ്ങിയതായും റിപ്പോർട്ടിൽ പറയുന്നുണ്ട്. 

എന്നാൽ പിറ്റേന്നായിരുന്നു ഫിലിപ് രാജകുമാരന്റെ സംസ്കാരച്ചടങ്ങുകൾ. കൂടാതെ ഈ വിരുന്നുകളിൽ ജോൺസൻ പങ്കെടുത്തിട്ടില്ല.  അടുത്ത ബന്ധുക്കളായ രോഗികളെയും മരണപ്പെട്ട പ്രിയപ്പെട്ടവരെ സന്ദര്‍ശിക്കുന്നതിനോ അവരുടെ ശവസംസ്‌കാര ചടങ്ങുകളില്‍ പങ്കെടുക്കുന്നതിനോ തടയുന്ന തരത്തിലുള്ള ലോക്ഡൗണ്‍ നിയമങ്ങള്‍ പാലിക്കാന്‍ പൊതുജനങ്ങള്‍ നിര്‍ബന്ധിതരായപ്പോഴാണ് പ്രധാനമന്ത്രി തന്നെ ഇത് ലംഘിച്ചത്. 

അതേസമയം ലോക്ഡൗണ്‍ മാര്‍ഗനിര്‍ദേശങ്ങള്‍ ലംഘിച്ചതിന് പ്രധാനമന്ത്രി ബോറിസ് ജോണ്‍സണ്‍ പരസ്യമായി മാപ്പുചോദിച്ചിരുന്നെങ്കിലും അദ്ദേഹത്തിനെതിരെ പ്രതിഷേധം ശക്തമായി തുടരുകയാണ്. ജോണ്‍സണ്‍ മാപ്പു പറയുമ്പോള്‍ പാര്‍ലമെന്റില്‍ റിഷി സുനകിൻ്റെ അഭാവവും ചർച്ചയാണ്. വിവാദത്തിലായ തന്റെ നേതാവില്‍ നിന്നും അകലം പാലിക്കാന്‍ റിഷി മനപ്പൂര്‍വ്വം വിട്ടു നിന്നതായും അഭ്യൂഹമുണ്ട്. പ്രധാനമന്ത്രിയെ പിന്തുണയ്ക്കുന്നതിലും റിഷി പിശുക്ക് കാണിക്കുന്നുണ്ട്. സർക്കാർതല കോവിഡ് ചട്ട ലംഘനങ്ങൾ സംബന്ധിച്ചു മുതിർന്ന ഉദ്യോഗസ്ഥയായ സൂ ഗ്രേയുടെ നേതൃത്വത്തിൽ ആഭ്യന്തര അന്വേഷണം നടന്നുവരികയാണ്. ഈ മാസാവസാനം റിപ്പോർട്ട് സമർപ്പിക്കും.

കുടിയേറ്റ മന്ത്രിയുടെ പ്രത്യേക അധികാരം ഉപയോഗിച്ച് ജോക്കോവിച്ചിൻ്റെ വിസ വീണ്ടും റദ്ദാക്കി

Metrom Australia Jan. 14, 2022 POLITICS , GOVERNMENT , SPORTS

ലോക ഒന്നാം നമ്പർ ടെന്നീസ് താരം നൊവാക്ക് ജോക്കോവിച്ചിൻറെ വിസ ഓസ്ട്രേലിയൻ സർക്കാർ വീണ്ടും റദ്ദാക്കി. ഫെഡറൽ കുടിയേറ്റ കാര്യ മന്ത്രി അലക്‌സ് ഹോക്കാണ് തൻറെ പ്രത്യേക അധികാരം ഉപയോഗിച്ച് താരത്തിൻറെ വിസ റദ്ദാക്കിയത്. പൊതുതാൽപ്പര്യം മുൻനിർത്തിയാണ് ഇത്തവണ വിസ റദ്ദാക്കിയതെന്ന് മന്ത്രി അലക്സ് ഹോക്ക് പറഞ്ഞു. 

ഓസ്‌ട്രേലിയൻ ബോർഡർ ഫോഴ്‌സ്, ആഭ്യന്തര വകുപ്പ്, ജോക്കോവിച്ച് എന്നിവർ നൽകിയ വിവരങ്ങൾ ശ്രദ്ധാപൂർവം പരിഗണിച്ചാണ് തീരുമാനമെടുത്തതെന്നും കുടിയേറ്റ വകുപ്പ് മന്ത്രി വ്യക്തമാക്കി. കോവിഡ് കാലത്ത് രാജ്യത്തിൻ്റെ അതിർത്തികൾ സംരക്ഷിക്കാൻ മോറിസൺ ഗവൺമെന്റ് പ്രതിജ്ഞാബദ്ധമാണെന്നും അദ്ദേഹം കൂട്ടിച്ചേർത്തു.

കോവിഡ് വാക്സിൻ എടുക്കാതെ ഓസ്ട്രേലിയൻ ഓപ്പൺ ടെന്നീസ് കളിക്കാൻ മെൽബണിലെത്തിയ ജോക്കോവിച്ചിൻ്റെ വിസ നേരത്തെ ഫെഡറൽ സർക്കാർ റദ്ദാക്കിയിരുന്നു.  എന്നാൽ ബോർഡർ ഫോഴ്സ് റദ്ദാക്കിയ വിസ കോടതി പുന:സ്ഥാപിച്ചിരുന്നു. ഇതിന് പിന്നാലെയാണ്  താരത്തിൻറെ വിസ രണ്ടാം തവണയും റദ്ദാക്കിയത്. എന്നാൽ കോടതി വിധിയുടെ അടിസ്ഥാനത്തിൽ ഓസ്ട്രേലിയയിൽ തുടരുന്ന താരത്തെ ഫെഡറൽ സർക്കാർ തീരുമാനം വീണ്ടും പ്രതിസന്ധയിലാക്കിയിരിക്കുകയാണ്.

വീണ്ടും മുന്നറിയിപ്പുമായി ലോകാരോഗ്യസംഘടന

Metrom Australia Jan. 13, 2022 POLITICS

ഒമിക്രോൺ വകഭേദം വ്യാപിക്കുന്നതിനിടെ വീണ്ടും മുന്നറിയിപ്പുമായി ലോകാരോഗ്യസംഘടന. ഒമിക്രോൺ ഡെൽറ്റ വകഭേദത്തേക്കാൾ ഗുരുതരം അല്ലെങ്കിലും വാക്സിനേഷൻ എടുക്കാത്തവർക്ക് അപകടകരമാണെന്ന് ലോകാരോഗ്യ സംഘടന ഓർമിപ്പിച്ചു. കൂടുതൽ രാജ്യങ്ങളിൽ ഒമിക്രോൺ അതിവേഗത്തിൽ വ്യാപിക്കുന്നതിനിടെയാണ് ലോകാരോഗ്യ സംഘടനയുടെ മുന്നറിയിപ്പ്.

ഡെൽറ്റയേക്കാൾ അപകടരമായ വൈറസ് അല്ലെങ്കിലും വാക്സിൻ സ്വീകരിക്കാത്തവർക്ക് ഒമിക്രോൺ ഭീഷണി ഉയർത്തും. 90 ലധികം രാജ്യങ്ങൾ ജനസംഖ്യയുടെ 40% വാക്സിനേഷൻ പോലും കൈവരിച്ചിട്ടില്ലെന്നും ആഫ്രിക്കയിലെ 85% ആളുകൾക്ക് ഒരു ഡോസ് വാക്സിൻ പോലും ഇതുവരെ ലഭിച്ചിട്ടില്ലെന്നും ലോകാരോഗ്യ സംഘടന വ്യക്തമാക്കി. ആശുപത്രിയിൽ കഴിയുന്ന രോഗികളിൽ ഭൂരിഭാഗം പേരും വാക്സിൻ എടുക്കാത്തവരാണെന്നും ഡബ്ള്യൂ.എച്ച്.ഒ കൂട്ടിച്ചേർത്തു. പ്രതിവാര കൊവിഡ് കേസുകളിൽ മുൻ ആഴ്ചയെക്കാൾ 55 ശതമാനം വർധനവാണ് ആഗോളതലത്തിൽ രേഖപ്പെടുത്തിയത്.