മോദിയെ വിമര്‍ശിച്ച് ഓസ്‌ട്രേലിയന്‍ ദിനപ്പത്രം

Metrom Australia April 27, 2021 GOVERNMENT

ഇന്ത്യയെ പ്രധാനമന്ത്രി നരേന്ദ്രമോദി വിനാശത്തിലേക്ക് നയിക്കുന്നു എന്ന ഓസ്‌ട്രേലിയന്‍ ദിനപ്പത്രമായ 'ദ ഓസ്‌ട്രേലിയ' നില്‍ വന്ന ലേഖനത്തെ രൂക്ഷമായി വിമര്‍ശിച്ച് കാന്‍ബറയിലെ ഇന്ത്യന്‍ ഹൈക്കമ്മീഷന്‍ രംഗത്തെത്തി. ബ്രിട്ടീഷ് ദിനപ്പത്രമായ ദ ടൈംസിന്റെ ഏഷ്യന്‍ ലേഖകനായ ഫിലിപ് ഷെര്‍വെല്‍ എഴുതിയ 'മോഡി ഇന്ത്യയെ നയിക്കുന്നത് വൈറസ് വിനാശത്തിലേക്ക്' എന്ന തലക്കെട്ടോടെയായിരുന്നു ഈ ലേഖനം ദ ഓസ്‌ട്രേലിയന്‍ പുനപ്രസിദ്ധീകരിച്ചത്. റൂപ്പര്‍ട്ട് മര്‍ഡോക്കിന്റെ ഉടമസ്ഥതയിലുള്ള ന്യൂസ് കോര്‍പ്പാണ് ദ ഓസ്‌ട്രേലിയന്റെ പ്രസാധകര്‍. ''ധാര്‍ഷ്ട്യം, അമിത ദേശീയത, കഴിവുകെട്ട ഉദ്യോഗസ്ഥവൃന്ദം എന്നിവ ചേര്‍ന്ന് സമാനതകളില്ലാത്ത പ്രതിസന്ധിയാണ് ഇന്ത്യയില്‍ സൃഷ്ടിക്കുന്നത്. ജനം ശ്വാസം മുട്ടുമ്പോഴും, ആള്‍ക്കൂട്ടത്തെ ഇഷ്ടപ്പെടുന്ന പ്രധാനമന്ത്രി വിശ്രമിക്കുകയാണ്'' എന്ന് ഈ ലേഖനത്തില്‍ കുറ്റപ്പെടുത്തുന്നു. 

ലേഖനത്തെ അതിശക്തമായ ഭാഷയില്‍ വിമര്‍ശിച്ചുകൊണ്ട് ഓസ്‌ട്രേലിയയിലെ ഇന്ത്യന്‍ ഹൈക്കമ്മീഷന്‍ രംഗത്തെത്തിയത്. വസ്തുതാ വിരുദ്ധവും ദുരുദ്ദേശ്യപരവുമായ ആരോപണങ്ങളാണ് ലേഖനത്തിലുള്ളതെന്ന് ചൂണ്ടിക്കാട്ടി പത്രത്തിന്റെ എഡിറ്റര്‍ ഇന്‍ ചീഫിന് കത്തയച്ച ഹൈക്കമ്മീഷന്‍, അത് ട്വിറ്ററിലൂടെ പുറത്തുവിടുകയും ചെയ്തു. ദ ഓസ്‌ട്രേലിയന്‍ പ്രസിദ്ധീകരിച്ച ലേഖനത്തിന്റെ ലിങ്ക് കൂടെ ഉള്‍പ്പെടുത്തിക്കൊണ്ടാണ് ഈ പ്രതികരണം ഹൈക്കമ്മീഷന്‍ ട്വീറ്റ് ചെയ്തത്. വസ്തുതകള്‍ പരിശോധിക്കാതെയും, ഇന്ത്യന്‍ സര്‍ക്കാരിന്റെ വിശദീകരണം ചോദിക്കാതെയുമാണ് ലേഖനം എഴുതിയിട്ടുള്ളതെന്ന് ഹൈക്കമ്മീഷന്‍ കുറ്റപ്പെടുത്തി.


 

OCI കാർഡും പുതുക്കണമെന്ന വ്യവസ്ഥ ഇന്ത്യൻ സർക്കാർ മാറ്റി

Metrom Australia April 27, 2021 GOVERNMENT

OCI കാര്‍ഡുമായി ബന്ധപ്പെട്ട് ഇന്ത്യന്‍ സര്‍ക്കാര്‍ വ്യവസ്ഥകയ്യില്‍ മാറ്റങ്ങള്‍ വരുത്തിയിരിക്കുന്നു. 20 വയസില്‍ താഴെയുള്ളവര്‍ ഓരോ തവണ പാസ്‌പോര്‍ട്ട് പുതുക്കുമ്പോഴും OCI കാര്‍ഡും പുതുക്കണമെന്ന വ്യവസ്ഥ ഇന്ത്യന്‍ സര്‍ക്കാര്‍ മാറ്റി. 20 വയസ് പൂര്‍ത്തിയായ ശേഷം ആദ്യമായി പാസ്‌പോര്‍ട്ട് പുതുക്കുമ്പോള്‍, അതോടൊപ്പം OCI കാര്‍ഡും പുതുക്കേണ്ടിവരും. ഇത് ഒരൊറ്റ തവണ ചെയ്താല്‍ മതി. നിലവിലുണ്ടായിരുന്ന നിയമപ്രകാരം, 20 വയസില്‍ താഴെയുള്ള OCI കാര്‍ഡ് ഉടമകള്‍ ഓരോ തവണ പാസ്‌പോര്‍ട്ട് പുതുക്കുമ്പോഴും OCI കാര്‍ഡും പുതുക്കണം. 20 വയസിനും 50 വയസിനും ഇടയില്‍ OCI കാര്‍ഡ് പുതുക്കേണ്ട ആവശ്യമില്ലെങ്കിലും, 50 വയസു കഴിഞ്ഞ ശേഷം പാസ്‌പോര്‍ട്ട് പുതുക്കുമ്പോള്‍ ഒരു തവണ കൂടി OCI കാര്‍ഡ് പുതുക്കണം എന്നായിരുന്നു വ്യവസ്ഥ. ഇതിലാണ് ഇന്ത്യന്‍ സര്‍ക്കാര്‍ മാറ്റം വരുത്തിയിരിക്കുന്നത്. 

കൂടാതെ 50 വയസ് പൂര്‍ത്തിയായ ശേഷം ഒരു തവണ OCI കാര്‍ഡ് പുതുക്കണമെന്ന വ്യവസ്ഥയും റദ്ദാക്കിയിട്ടുണ്ട്. ഇതോടെ 20 വയസിനു ശേഷം ലഭിക്കുന്ന OCI കാര്‍ഡ് ജീവിതകാലം മുഴുവന്‍ ഉപയോഗിക്കാന്‍ കഴിയുമെന്ന് അര്‍ത്ഥം. അതേസമയം, 20 വയസിനു താഴെയുള്ളവരും 50 വയസിനു മുകളിലുള്ളവരും പാസ്‌പോര്‍ട്ട് പുതുക്കുമ്പോള്‍ ഓണ്‍ലൈനായി ആ വിവരം ഇന്ത്യന്‍ സര്‍ക്കാരിനെ അറിയിക്കേണ്ടതാണ്. കൂടാതെ 20 വയസിനു താഴെയുള്ളവര്‍ പാസ്‌പോര്‍ട്ട് പുതുക്കുന്ന ഓരോ തവണയും, പുതിയ പാസ്‌പോര്‍ട്ടിന്റെ പകര്‍പ്പും ഏറ്റവും പുതിയ ഒരു ഫോട്ടോയും ഓണ്‍ലൈനായി സമര്‍പ്പിക്കണം. പാസ്‌പോര്‍ട്ട് പുതുക്കി മൂന്നു മാസത്തിനുള്ളിലാകണം ഈ പകര്‍പ്പ് അപ്ലോഡ് ചെയ്യേണ്ടത്. ഇത് സൗജന്യ സേവനമായിരിക്കും. 50 വയസ് കഴിഞ്ഞ് ആദ്യമായി പാസ്‌പോര്‍ട്ട് പുതുക്കുമ്പോഴും ഇത് ചെയ്യേണ്ടതാണ്.

അതേസമയം, ഇന്ത്യന്‍ പൗരന്‍മാരുടെയോ OCI കാര്‍ഡുടമകളുടെയോ ജീവിതപങ്കാളി എന്ന നിലയില്‍ OCI കാര്‍ഡ് ലഭിച്ചിട്ടുള്ളവര്‍, ഓരോ തവണ പാസ്‌പോര്‍ട്ട് പുതുക്കുമ്പോഴും പുതുക്കിയ പാസ്‌പോര്‍ട്ടിന്റെ പകര്‍പ്പ്, പുതിയ ഫോട്ടോ, വിവാഹം അപ്പോഴും സാധുവാണ് എന്ന ഡിക്ലറേഷന്‍, പങ്കാളിയുടെ ഇന്ത്യന്‍ പാസ്‌പോര്‍ട്ട്/OCI പകര്‍പ്പ് എന്നിവ ഓണ്‍ലൈനിലൂടെ അപ്ലോഡ് ചെയ്യേണ്ടത്. OCI മിസലേനിയസ് സര്‍വീസ് വെബ്‌പേജിലൂടെയാകും ഇത് ചെയ്യേണ്ടതെന്നും, മേയ് അവസാനത്തോടെ മാത്രമേ വെബ്‌സൈറ്റ് ഇതിന് പ്രാപ്തമാകൂ എന്നും കാന്‍ബറയിലെ ഇന്ത്യന്‍ ഹൈക്കമ്മീഷന്‍ അറിയിച്ചു. 

എന്നാല്‍ കോവിഡ് സാഹചര്യം കണക്കിലെടുത്ത് OCI കാര്‍ഡുകള്‍ പുതുക്കാനുള്ള സമയം 2021 ഡിസംബര്‍ 31 വരെ ഇന്ത്യന്‍ സര്‍ക്കാര്‍ നീട്ടിയിട്ടുണ്ട്. നേരത്തെ ജൂണ്‍ 30 വരെയായിരുന്നു ഇതിനായി അനുവദിച്ചിരുന്ന സമയം. അതേസമയം ചില സന്ദര്‍ഭങ്ങളില്‍ ഇന്ത്യന്‍ സന്ദര്‍ശിക്കാന്‍ പ്രത്യേക അനുമതി നേടേണ്ടതാണ്. ഇന്ത്യന്‍ സന്ദര്‍ശിക്കുന്ന OCI കാര്‍ഡ് ഉടമകള്‍ ചില സന്ദര്‍ഭങ്ങളില്‍ പ്രത്യേക അനുമതി തേടണമെന്ന നിയമം കഴിഞ്ഞ മാസം സര്‍ക്കാര്‍ പ്രഖ്യാപിച്ചിരുന്നു. മിഷനറി പ്രവര്‍ത്തനങ്ങള്‍, മാധ്യമപ്രവര്‍ത്തനം, പര്‍വ്വതാരോഹണം, തബലീഗ് പ്രവര്‍ത്തനങ്ങള്‍, അനുവാദമില്ലാത്ത പ്രദേശങ്ങള്‍ സന്ദര്‍ശിക്കുന്നതിന്, ഇവിടെ ജോലിക്കായി എത്തുന്നതിന്, ഗവേഷണവുമായി ബന്ധപ്പെട്ട കാര്യങ്ങള്‍ക്കായി ഇന്ത്യന്‍ സന്ദര്‍ശിക്കുമ്പോള്‍, ഇന്ത്യയിലെ വിദേശ സര്‍ക്കാര്‍ സംഘടനകളിലോ വിദേശ ഡിപ്ലോമാറ്റിക് മിഷനിലോ ഇന്റേണ്‍ഷിപ്പിനായി എത്തുന്നതിനായി OCI കാര്‍ഡ് ഉടമകള്‍ താഴെ പറയുന്ന കാര്യങ്ങള്‍ ചെയ്യണമെങ്കില്‍ മുന്‍കൂര്‍ അനുമതി നേടേണ്ടതാണ്. 

അതേസമയം OCI കാര്‍ഡുള്ളവര്‍ ഇന്ത്യയില്‍ പ്രവേശിക്കണമെങ്കില്‍ പുതിയ പാസ്‌പോര്‍ട്ടിനൊപ്പം പഴയ പാസ്പോര്‍ട്ടും വേണമെന്ന നിബന്ധന മാര്‍ച്ചില്‍ ഇന്ത്യന്‍ സര്‍ക്കാര്‍ എടുത്തു മാറ്റിയിരുന്നു. മാര്‍ച്ച് 26ന് പുറത്ത് വിട്ട പ്രസ്താവനയിലാണ് ഇക്കാര്യം അറിയിച്ചത്. 2005 മുതല്‍ പ്രാബല്യത്തിലുണ്ടായിരുന്ന നിബന്ധനയിലാണ് മാറ്റം നടപ്പാക്കിയത്. പഴയ പാസ്‌പോര്‍ട്ട് നമ്പര്‍ രേഖപ്പെടുത്തിയിട്ടുള്ള OCI കാര്‍ഡ് ഉപയോഗിച്ച് ഇന്ത്യയിലേക്ക് യാത്ര ചെയ്യുന്നവര്‍ പഴയ പാസ്‌പോര്‍ട്ട് കൈവശം വയ്ക്കേണ്ടതില്ല. എന്നാല്‍ പുതിയ പാസ്‌പോര്‍ട്ട് കൈവശം വയ്‌ക്കേണ്ടത് നിര്‍ബന്ധമാണ്.

ഇന്ത്യയിലേക്ക് ഓക്സിജൻ സിലിണ്ടറുകൾ അയയ്ക്കുന്ന കാര്യം പരിഗണിക്കുന്നുണ്ടെന്ന് ഓസ്ട്രേലിയ

Metrom Australia April 26, 2021 GOVERNMENT

കോവിഡ് രണ്ടാം വ്യാപനത്തില്‍ ഗുരുതരമായ സാഹചര്യം നേരിടുന്ന ഇന്ത്യയിലേക്ക് ഓക്‌സിജന്‍ സിലിണ്ടറുകള്‍ അയയ്ക്കുന്ന കാര്യം പരിഗണിക്കുന്നുണ്ടെന്ന് ഓസ്‌ട്രേലിയന്‍ സര്‍ക്കാര്‍ വ്യക്തമാക്കി. ഇന്ത്യയ്ക്ക് വേണ്ടത്ര പിന്തുണ നല്‍കാനായി ഓസ്‌ട്രേലിയയും തയ്യാറാകുമെന്ന് ഫെഡറല്‍ ആരോഗ്യമന്ത്രി ഗ്രെഗ് ഹണ്ട് പറഞ്ഞു. ഏതുതരത്തിലുള്ള സഹായമാണ് ഇന്ത്യയ്ക്ക് എത്തിക്കാന്‍ കഴിയുക എന്ന കാര്യം പരിഗണിക്കുന്നുണ്ടെന്ന് അദ്ദേഹം വ്യക്തമാക്കി.

മറ്റ് ആരോഗ്യസഹായങ്ങള്‍ നല്‍കാന്‍ ഓസ്‌ട്രേലിയയ്ക്ക് കഴിയുമെങ്കിലും, ഇന്ത്യയ്ക്ക് ഇപ്പോള്‍ ഏറ്റവുമധികം ആവശ്യമുള്ളത് ആശുപത്രികളിലെ ഓക്‌സിജന്‍ ലഭ്യതയാണെന്ന് അദ്ദേഹം ചൂണ്ടിക്കാട്ടി. ഓക്‌സിജന്‍ ലഭിക്കാതെ ശ്വാസം മുട്ടുകയാണ് ഇന്ത്യ എന്നാണ് ഗ്രെഗ് ഹണ്ട് പറഞ്ഞത്. വിവിധ സംസ്ഥാന സര്‍ക്കാരുകളുമായി ചര്‍ച്ച ചെയ്ത് ഇന്ത്യയ്ക്ക് ഓക്‌സിജന്‍ ലഭ്യമാക്കാനുള്ള നടപടികള്‍ പരിശോധിക്കുമെന്ന് അദ്ദേഹം അറിയിച്ചു. സംസ്ഥാനങ്ങളില്‍ നിന്നുള്ള ഓക്‌സിജന്‍ സ്റ്റോക്ക് ഇന്ത്യയെ സഹായിക്കാനായി വിട്ടുനല്‍കാന്‍ കഴിയുമോ എന്നാണ് പരിശോധിക്കുന്നത്. കൂടാതെ ഇന്ത്യയിലേക്ക് വെന്റിലേറ്ററുകളും എത്തിക്കാന്‍ കഴിയുമെന്ന് ഗ്രെഗ് ഹണ്ട് ചൂണ്ടിക്കാട്ടി. ചൊവ്വാഴ്ച ചേരുന്ന ദേശീയ ക്യാബിനറ്റിന്റെ സുരക്ഷാ സമിതി യോഗമാകും ഇക്കാര്യം തീരുമാനിക്കുക.

ക്വീൻസ്ലാന്റിലെ ടൂറിസം രംഗത്തെ ഉത്തേജിപ്പിക്കാനായി വീണ്ടും വൗച്ചറുകള്‍ നല്‍കുന്നു

Metrom Australia April 23, 2021 GOVERNMENT

കോവിഡ് പ്രതിസന്ധി ദുരിതത്തിലാക്കിയ ക്വീന്‍സ്ലാന്റിലെ ടൂറിസം രംഗത്തെ ഉത്തേജിപ്പിക്കാനായി സംസ്ഥാന സര്‍ക്കാര്‍ വീണ്ടും വൗച്ചറുകള്‍ നല്‍കുന്നു. നൂറ് ഡോളറിന്റെ 30,000 വൗച്ചറുകളാണ് ക്വീന്‍സ്ലാന്റ് സര്‍ക്കാര്‍ നല്‍കുന്നത്. ബ്രിസ്ബൈന്‍, സീനിക് റിം, മോര്‍ട്ടന്‍ ബേ, റെഡ്ലാന്‍ഡ്സ് കോസ്റ്റ്, സോമര്‍സെറ്റ്, ലോഗന്‍, ഇപ്‌സ്വിച്  എന്നീ പ്രദേശങ്ങളിലെ തെരഞ്ഞെടുക്കപ്പെട്ട ടൂറിസ്റ്റ് കേന്ദങ്ങള്‍, താമസസൗകര്യങ്ങള്‍ എന്നിവിടങ്ങളിലാണ് ഈ വൗച്ചര്‍ ഉപയോഗിക്കാവുന്നത്. ഈ ഇടങ്ങളില്‍ വൗച്ചര്‍ ഉപയോഗിച്ചാല്‍ 50 ശതമാനം ഇളവ് ലഭിക്കും. ഗ്രേറ്റ് ബാരിയര്‍ റീഫിലേക്കും മറ്റിടങ്ങളിലേക്കുമുള്ള യാത്രകള്‍ക്കും ഈ വൗച്ചര്‍ ഉപയോഗിക്കാമെന്ന് പ്രീമിയര്‍ അനസ്തഷ്യ പാലാഷേ പറഞ്ഞു. സംസ്ഥാനത്തെ ടൂറിസം ഓപ്പറേറ്റര്‍മാരെ പിന്തുണയ്ക്കാനും ഇതുവഴി സാമ്പത്തിക രംഗത്തിന് മില്യണ്‍ കണക്കിന് ഡോളര്‍ ലഭിക്കാനും ഈ പദ്ധതി സഹായിക്കുമെന്ന് പ്രീമിയര്‍ കൂട്ടിച്ചേര്‍ത്തു.

വൗച്ചര്‍ ലഭിക്കാന്‍ അര്‍ഹരായവരെ നറുക്കെടുപ്പിലൂടെയാണ് തെരഞ്ഞെടുക്കുന്നത്. ഏപ്രില്‍ 27 മുതല്‍ 72 മണിക്കൂര്‍ ബ്രിസ്ബൈന്‍കാര്‍ക്ക് ഈ നറുക്കെടുപ്പില്‍ പങ്കെടുക്കാം. നറുക്കെടുപ്പില്‍ വിജയിക്കുന്നവര്‍ക്ക് മെയ് ആറിന് ഇമെയില്‍ വഴി 100 ഡോളര്‍ വൗച്ചര്‍ ലഭിക്കും. അതേസമയം വിറ്റ്‌സണ്‍ഡെയിലുള്ളവര്‍ക്ക് മെയ് നാല് മുതല്‍ 200 ഡോളറിന്റെ 6,000 വൗച്ചറുകള്‍ വിതരണം ചെയ്യാനും സര്‍ക്കാര്‍ പദ്ധതിയിടുന്നുണ്ട്.
 

ഇന്ത്യയില്‍ നിന്ന് ഓസ്‌ട്രേലിയയിലേക്കുള്ള വിമാനങ്ങള്‍ 30% വെട്ടിക്കുറയ്ക്കാന്‍ തീരുമാനം

Metrom Australia April 23, 2021 GOVERNMENT

ഇന്ത്യയില്‍ കോവിഡ് കേസുകള്‍ അനുദിനം വര്‍ധിക്കുന്ന സാഹചര്യത്തില്‍ ഇന്ത്യയില്‍ നിന്നെത്താന്‍ അനുവദിക്കുന്ന വിമാനങ്ങളുടെ എണ്ണം 30 ശതമാനം വെട്ടിക്കുറയ്ക്കാന്‍ തീരുമാനിച്ച് ഓസ്ട്രേലിയ. കൂടാതെ ഓസ്ട്രേലിയന്‍ പൗരന്‍മാര്‍ക്കും റെസിഡന്റ്സിനും ഇന്ത്യയിലേക്ക് പോകുന്നതിനും കൂടുതല്‍ നിയന്ത്രണങ്ങള്‍ നടപ്പിലാക്കുന്നതാണ്. രോഗസാഹചര്യം ഗുരുതരമായ രാജ്യങ്ങളുമായുള്ള യാത്രയില്‍ നിയന്ത്രണങ്ങള്‍ ഏര്‍പ്പെടുത്താന്‍ ദേശീയ ക്യാബിനറ്റ് യോഗം തീരുമാനിച്ചതിന്റെ പിന്നാലെയാണ് നടപടി. ഓസ്ട്രേലിയയിലെ വിവിധ നഗരങ്ങളിലെ ക്വാറന്റൈന്‍ കേന്ദ്രങ്ങളില്‍ ഏറ്റവുമധികം കൊവിഡ്  ബാധ സ്ഥിരീകരിച്ചിരിക്കുന്നത് ഇന്ത്യയില്‍ നിന്ന് തിരിച്ചെത്തിയവരിലാണ്. അതിനാല്‍ ഇന്ത്യയില്‍ നിന്നുള്ള യാത്രക്കാരെ വിലക്കണമെന്ന് വെസ്റ്റേണ്‍ ഓസ്ട്രേലിയ ആവശ്യപ്പെട്ടിരുന്നു. ഇതിനു പിന്നാലെയാണ് ദേശീയ ക്യാബിനറ്റ് നിയന്ത്രണം പ്രഖ്യാപിച്ചത്. 

ഫെഡറല്‍ സര്‍ക്കാരിന്റെ മേല്‍നോട്ടത്തില്‍ ഡാര്‍വിനിലേക്ക് വരുന്ന ക്വാണ്ടസ് വിമാനങ്ങള്‍ക്കും, സിഡ്നിയിലേക്ക് എത്തുന്ന മറ്റ് വിമാനങ്ങള്‍ക്കും ഇത് ബാധകമാണ്. നിലവില്‍ സിഡ്നിയിലേക്ക് മാത്രമാണ് ഇന്ത്യയില്‍ നിന്നുള്ള സ്വകാര്യ വിമാനങ്ങള്‍ എത്തുന്നത്. ഇന്ത്യയാണ് ഇത്തരത്തില്‍ ഹൈ റിസ്‌ക് രാജ്യങ്ങള്‍ക്ക് ഇപ്പോഴത്തെ ഏറ്റവും പ്രധാന ഉദാഹരണമെന്ന് പ്രധാനമന്ത്രി സ്‌കോട്ട് മോറിസന്‍ വ്യക്തമാക്കി. എന്നാല്‍ ഇന്ത്യ ഉള്‍പ്പെടെയുള്ള ഹൈ റിസ്‌ക് രാജ്യങ്ങളിലേക്ക് യാത്ര ചെയ്യാന്‍ ഓസ്ട്രേലിയക്കാര്‍ക്ക് നല്‍കുന്ന ഇളവ് കൂടുതല്‍ കര്‍ശനമാക്കാനും ദേശീയ ക്യാബിനറ്റ് തീരുമാനിച്ചു. 'വരും മാസങ്ങളിലാകും' ഇത് നടപ്പാക്കുക എന്നും, ഇപ്പോള്‍ തന്നെ പ്രഖ്യാപിക്കുകയാണെന്നും പ്രധാനമന്ത്രി പറഞ്ഞു.

അതേസമയം യാത്രയ്ക്ക് മുമ്പുള്ള 14 ദിവസങ്ങളില്‍ ഇന്ത്യയിലുണ്ടായിരുന്നവര്‍, മറ്റു രാജ്യങ്ങളില്‍ നിന്ന് ഓസ്ട്രേലിയയിലേക്കെത്തിയാലും പിസിആര്‍ സര്‍ട്ടിഫിക്കറ്റ് നിര്‍ബന്ധമാക്കിയിട്ടുണ്ട്. ഓസ്ട്രേലിയയിലേക്കുള്ള വിമാനം കയറുന്ന സ്ഥലത്തു നിന്നും 72 മണിക്കൂറിനുള്ളില്‍ PCR പരിശോധന നടത്തിയ സര്‍ട്ടിഫിക്കറ്റാണ് ഇവര്‍ ഹാജരാക്കേണ്ടത്. അതായത്, ഇന്ത്യയില്‍ നിന്ന് ദുബായിലെത്തിയ ശേഷം മറ്റൊരു വിമാനത്തില്‍ ഓസ്ട്രേലിയയിലേക്ക് വരികയാണെങ്കില്‍, ദുബായില്‍ 72 മണിക്കൂറിനുള്ളില്‍ നടത്തിയ PCR പരിശോധനയുടെ ഫലമാകും കാണിക്കേണ്ടത്. ഇത് എങ്ങനെ നടപ്പാക്കണം എന്ന കാര്യം വിദേശ അധികൃതരുമായി ചര്‍ച്ച ചെയ്യുകയാണെന്നും പ്രധാനമന്ത്രി പറഞ്ഞു.

ഓസ്ട്രേലിയന്‍ അതിര്‍ത്തികള്‍ അടച്ചിട്ടിരിക്കുന്ന സാഹചര്യത്തില്‍, പ്രത്യേക ഇളവ് നേടിയാല്‍ മാത്രമേ ഓസ്ട്രേലിയക്കാര്‍ക്ക് വിദേശത്തേക്ക് പോകാന്‍ കഴിഞ്ഞിരുന്നുള്ളൂ. എന്നാല്‍, ഉറ്റബന്ധുക്കളുടെ മരണവും, വിവാഹവും ഉള്‍പ്പെടെയുള്ള സാഹചര്യങ്ങളില്‍ പോലും ഈ ഇളവ് നല്‍കുന്നത് പരിമിതപ്പെടുത്തുമെന്ന് പ്രധാനമന്ത്രി സൂചിപ്പിച്ചു. ഏറ്റവും അടിയന്തര സാഹചര്യങ്ങളില്‍ മാത്രമേ ഇളവ് നല്‍കാവൂ എന്ന് ബോര്‍ഡര്‍ ഫോഴ്സിനോട് ആവശ്യപ്പെട്ടിട്ടുണ്ടെന്ന് പ്രധാനമന്ത്രി വ്യക്തമാക്കി.