ഓസ്ട്രേലിയൻ സർക്കാർ ബജറ്റിൽ ഇളവുകൾ പ്രഖ്യാപിച്ചു

Metrom Australia March 30, 2022 GOVERNMENT

ഓസ്ട്രേലിയൻ സർക്കാർ  ജനങ്ങൾക്ക് ആശ്വാസം പകരും എന്ന പ്രഖ്യാപനത്തോടെ ബജറ്റിൽ ഇളവുകൾ പ്രഖ്യാപിച്ചു. പെട്രോളിന്റെയും ഡീസലിന്റെയും എക്സൈസ് തീരുവ വെട്ടിക്കുറച്ചതാണ് ഇതിൽ പ്രധാനപ്പെട്ടത്.

ട്രഷറർ ജോഷ് ഫ്രൈഡൻബർഗ് നേരത്തേ വ്യക്തമാക്കിയിരുന്ന വിലക്കയറ്റം പിടിച്ചുനിർത്താൻ നടപടിയുണ്ടാകുമെന്നത്, ലക്ഷ്യമിട്ടുള്ള പദ്ധതികളുമാണ് ബജറ്റിൽ പ്രഖ്യാപിച്ചത്. അതിൽ സമീപകാലത്തെ ഏറ്റവും ഉയർന്ന നിരക്കിലേക്ക് എത്തിയിരിക്കുന്ന പെട്രോൾ, ഡീസൽ വില പിടിച്ചുനിർത്തുന്നതിനായി, എക്സൈസ് തീരുവ വെട്ടിക്കുറയ്ക്കാനാണ് സർക്കാർ തീരുമാനം. നിലവിലുള്ളതിന്റെ പകുതിയായാണ് തീരുവ കുറച്ചത്.

നിലവിൽ 44.2 സെന്റായിരുന്നു ഒരു ലിറ്റർ പെട്രോളിന്റെയും ഡീസലിന്റെയും എക്സൈസ് തീരുവ. ഇത് 22.1 സെന്റായി കുറച്ചു. അടുത്ത ആറു മാസത്തേക്കാണ് ഈ കുറവ് പ്രാബല്യത്തിലുണ്ടാകുക.

രാജ്യത്തെ തൊഴിലില്ലായ്മാ നിരക്ക് 48 വർഷത്തെ ഏറ്റവും കുറഞ്ഞ നിരക്കിലേക്ക് കൊണ്ടുവരാൻ കഴിഞ്ഞു എന്ന ആമുഖത്തോടെയാണ് ട്രഷറർ ജോഷ് ഫ്രൈഡൻബർഗ് 2022-23ലെ ഫെഡറൽ ബജറ്റ് അവതരിപ്പിച്ചത്. അതിനോടൊപ്പം അടിസ്ഥാന സൗകര്യ വികസന മേഖലയിലെ നിക്ഷേപം വർദ്ധിപ്പിക്കുന്നതിനും, കൂടുതൽ ആനുകൂല്യങ്ങൾ നൽകുന്നതിനുമുള്ള പ്രഖ്യാപനം ബജറ്റിലുണ്ട്.

അതേസമയം കുറഞ്ഞ വരുമാനക്കാർക്കും ഇടത്തരം വരുമാനക്കാർക്കുമായി നേരത്തേ പ്രഖ്യാപിച്ചിരുന്ന ആദായനികുതി ഇളവ് ഒരു വർഷം കൂടി നീട്ടാനും  തീരുമാനിച്ചിട്ടുണ്ട്. മാത്രമല്ല, ഈ ഇളവ് വർദ്ധിപ്പിക്കുകയും ചെയ്യും. രണ്ടു പേരും ജോലി ചെയ്യുന്ന ദമ്പതികൾക്ക് 2,160 ഡോളർ വരെയും, ഒരാൾ മാത്രം ജോലി ചെയ്യുന്ന കുടുംബത്തിലെ  വ്യക്തികൾക്ക് 1,080 ഡോളർ വരെയുമായിരുന്നു നേരത്തേ ഇളവ് നൽകിയിരുന്നത്. എന്നാൽ ഇത് വ്യക്തികൾക്ക് 1,500 ഡോളറായും, ദമ്പതികൾക്ക് 3,000 ഡോളറായും വർദ്ധിപ്പിക്കും. ഈ വർഷത്തെ ആദായനികുതി റിട്ടേൺ സമർപ്പിക്കുമ്പോൾ പുതിയ ഇളവ് ലഭിക്കുക. 

അത് കൂടാതെ, ജീവിതച്ചെലവ് നേരിടാനായി 250 ഡോളറിന്റെ ഒറ്റത്തവണ സഹായവും സർക്കാർ പ്രഖ്യാപിച്ചിട്ടുണ്ട്. വിവിധ സാമൂഹിക സുരക്ഷാ ഫണ്ടിംഗ് സഹായം ലഭിക്കുന്നവർക്കാണ് ഈ ഒറ്റത്തവണ ആനുകൂല്യം ലഭിക്കുക. അതായത്
പെൻഷൻകാർ, മറ്റ് വെൽഫെയർ ആനുകൂല്യങ്ങൾലഭിക്കുന്നവർ, കൺസഷൻ കാർഡുടമകൾ തുടങ്ങി 60 ലക്ഷത്തോളം പേർക്ക് ഈ പദ്ധതിയുടെ ഗുണം ലഭിക്കും.

ഇന്ത്യയിലെയും ഓസ്ട്രേലിയയിലെയും യൂണിവേഴ്സിറ്റി ബിരുദങ്ങൾക്ക് പരസ്പര അംഗീകാരം

Metrom Australia March 22, 2022 GOVERNMENT

ഇന്ത്യയിലെയും ഓസ്ട്രേലിയയിലെയും യൂണിവേഴ്സിറ്റി ബിരുദങ്ങൾക്ക് പരസ്പരം അംഗീകാരം നൽകുന്നതിന് രൂപരേഖ തയ്യാറാക്കാൻ ഒരുങ്ങുന്നു. ഓസ്ട്രേലിയൻ പ്രധാനമന്ത്രി സ്കോട്ട് മോറിസനും, ഇന്ത്യൻ പ്രധാനമന്ത്രി നരേന്ദ്ര മോഡിയും തമ്മിൽ നടത്തിയ ഓൺലൈൻ ഉച്ചകോടിയിലാണ് ഈ പ്രഖ്യാപനമുണ്ടായത്.

ഉന്നത വിദ്യാഭ്യാസ രംഗത്ത് പരസ്പര സഹകരണവും അംഗീകാരവും ഊർജ്ജിതമാക്കുക എന്ന ലക്ഷ്യത്തോടെ പുതിയ കർമ്മസമിതി രൂപീകരിക്കുമെന്ന് സ്കോട്ട് മോറിസൻ അറിയിച്ചു. ഉന്നതവിദ്യാഭ്യാസ യോഗ്യതകൾ പരസ്പരം അംഗീകരിക്കുന്നതിന് പുറമേ, ഇരു രാജ്യങ്ങളിലും നിന്നുള്ള ഓൺലൈൻ പഠനം കൂടുതൽ പ്രോത്സാഹിപ്പിക്കുന്നതും, സംയുക്ത ബിരുദങ്ങളും, ഓഫ്ഷോർ ക്യാംപസുകളും വർദ്ധിപ്പിക്കുന്നതും ഈ കർമ്മസമിതി പരിശോധിക്കും. വിദ്യാഭ്യാസ മേഖലയിൽ പ്രവർത്തിക്കുന്നവരുമായി ബന്ധപ്പെട്ട് ടാസ്ക് ഫോഴ്സ് ഇതിനുള്ള മാർഗ്ഗരേഖ തയ്യാറാക്കുമെന്ന് ആക്ടിംഗ് വിദ്യാഭ്യാസ മന്ത്രി സ്റ്റുവർട്ട് റോബർട്ട് അറിയിച്ചു.

അതേസമയം യോഗ്യതകൾ പരസ്പരം അംഗീകരിച്ച് കഴിഞ്ഞാൽ ഇന്ത്യൻ കുടിയേറ്റക്കാർക്ക് ഓസ്ട്രേലിയയിൽ തൊഴിൽ കണ്ടെത്തുന്നത് കൂടുതൽ എളുപ്പമാകും. ഇന്ത്യൻ ബിരുദങ്ങൾക്ക് തുല്യ അംഗീകാരം ലഭിക്കാത്തതു കാരണം ഓസ്ട്രേലിയയിലേക്ക് കുടിയേറുന്ന നിരവധി പേർ മറ്റു ജോലികളിലേക്ക് തിരിയുന്നതായി നിരവധി റിപ്പോർട്ടുകൾ പുറത്തുവന്നിട്ടുണ്ട്. ഇത് ഒഴിവാക്കുന്നതിനും, പഠനം പൂർത്തിയാക്കിയ മേഖലകളിൽ തന്നെ ജോലി കണ്ടെത്താനും പുതിയ മാറ്റം സഹായകമാകും.

കൂടാതെ  ഇന്ത്യയിലെ നഴ്സിംഗ് ബിരുദത്തിന് തുല്യ അംഗീകാരം ലഭിക്കുകയാണെങ്കിൽ, പ്രത്യേക പരീക്ഷകൾ ഇല്ലാതെ തന്നെ ഓസ്ട്രേലിയയിൽ രജിസ്ട്രേഷൻ നേടാൻ സാധിക്കും. എന്നാൽ, നഴ്സിംഗ് ബിരുദം ഉൾപ്പെടെയുള്ളവ പരസ്പര അംഗീകാരത്തിനുള്ള പട്ടികയിൽ ഉൾപ്പെടുമോ എന്ന കാര്യം ഇപ്പോഴും വ്യക്തമല്ല. കർമ്മസമിതിയുടെ വിലയിരുത്തലിനു ശേഷമാകും ഏതൊക്കെ വിദ്യാഭ്യാസ യോഗ്യതകളാണ് അംഗീകരിക്കുന്നത് എന്ന്  വ്യക്തമാകുക.

ഇതോടൊപ്പം, ഓസ്ട്രേലിയയിൽ പഠനം പൂർത്തിയാക്കുന്നവർക്ക് ഇന്ത്യയിലും അംഗീകാരം ലഭിക്കും. പഠനം പൂർത്തിയാക്കി തിരിച്ചുപോകുന്നവർക്ക് ഇന്ത്യയിൽ സർക്കാർ ജോലികൾക്ക് ഉൾപ്പെടെ അപേക്ഷിക്കാനും ഇതിലൂടെ കഴിയും. ഈ വർഷം അവസാനത്തോടെ തന്നെ കർമ്മസമിതി റിപ്പോർട്ട് നൽകുമെന്നും, യോഗ്യതകൾ പരസ്പരം അംഗീകരിക്കുന്ന നടപടി 2023ൽ തുടങ്ങുമെന്നും മന്ത്രി സ്റ്റുവർട്ട് റോബർട്ട് അറിയിച്ചു.

കടപ്പാട്: SBS Malayalam

ഓസ്‌ട്രേലിയയിൽ ഒമിക്രോൺ BA.2 വകഭേദം വ്യാപിക്കുന്നു

Metrom Australia March 15, 2022 GOVERNMENT

ഓസ്ട്രേലിയയിൽ ഒമിക്രോൺ BA.2 എന്ന ഉപവകഭേദം അതിവേഗം പടരുന്നതായി ആരോഗ്യ വിദഗ്ദരുടെ മുന്നറിയിപ്പ്.  രാജ്യത്ത് അടുത്ത നാല് മുതൽ ആറാഴ്ചക്കുള്ളിൽ കേസുകൾ ഇരട്ടിയാകാൻ സാധ്യതയുണ്ടെന്നാണ് NSW സർവകലാശാല നടത്തിയ പഠനം നൽകുന്ന സൂചന. 

അതേസമയം കേസുകൾ കുത്തനെ ഉയരുന്ന പ്രവണത കാണുന്നുണ്ടെങ്കിലും വീണ്ടും ലോക്ക്ഡൗണിലേക്ക് പോകുവാൻ ആഗ്രഹിക്കുന്നില്ലെന്ന് ന്യൂ സൗത്ത് വെയിൽസ് ആരോഗ്യ മന്ത്രി ബ്രാഡ് ഹസാഡ് പറഞ്ഞു. എന്നാൽ മാസ്ക് ഉപയോഗിക്കുന്നതും സോപ്പുവെള്ളത്തിൽ കൈ കഴുകുന്നതും പോലെയുള്ള കൊവിഡ് സുരക്ഷാ നടപടികൾ സ്വീകരിക്കാൻ പൊതുജനം ശ്രദ്ധിക്കണമെന്ന് അദ്ദേഹം ആവശ്യപ്പെട്ടു.

വേഗത്തിൽ പടരുന്നുണ്ടെങ്കിലും BA.2 എന്ന ഉപവകഭേദത്തിന് ഒമിക്രോണിനേക്കാൾ തീവ്രത കുറവാണെന്നാണ് ഇതുവരെയുള്ള വിലയിരുത്തൽ എന്ന് സൗത്ത് ഓസ്‌ട്രേലിയ സർവകലാശാലയിലെ എപ്പിഡീമിയോളജിസ്റ്റ് പ്രൊഫസർ അഡ്രിയാൻ എസ്റ്റെർമാൻ ചൂണ്ടിക്കാട്ടി. ഓസ്‌ട്രേലിയയിലെ ഇപ്പോഴുള്ള ആകെ കേസുകളിൽ നാലിലൊന്നും ഒമിക്രോൺ BA.2 കേസുകളാണെന്ന് കരുതുന്നതായി പ്രൊഫസർ എസ്റ്റെർമാൻ പറഞ്ഞു.

ഇന്ത്യ-ഓസ്‌ട്രേലിയ സ്വതന്ത്ര വ്യാപാര കരാര്‍ ഈയാഴ്ച ഒപ്പ് വെയ്ക്കുമെന്ന് വാണിജ്യമന്ത്രി ഡാന്‍ ടെഹാന്‍

Metrom Australia March 14, 2022 GOVERNMENT

ഓസ്ട്രേലിയയും ഇന്ത്യയുമായുള്ള സ്വതന്ത്ര വ്യാപാര കരാര്‍ ഏതാനും ദിവസങ്ങള്‍ക്കുള്ളില്‍ ഒപ്പുവയ്ക്കുമെന്ന് വാണിജ്യമന്ത്രി ഡാന്‍ ടെഹാന്‍ വ്യക്തമാക്കി. ഓസ്ട്രേലിയയും ഇന്ത്യയും തമ്മിലുള്ള വാണിജ്യബന്ധം പുതിയ തലങ്ങളിലേക്ക് ഉയര്‍ത്തുക എന്ന ലക്ഷ്യത്തോടെ 2011 മുതല്‍ നടത്തുന്ന ചര്‍ച്ചകള്‍ക്കൊടുവിലാണ് സ്വതന്ത്ര വ്യാപാര കരാറിന് അന്തിമരൂപമാകുന്നത്. കടുപ്പമേറിയ ചര്‍ച്ചകളാണ് ഇതുമായി ബന്ധപ്പെട്ട് നടന്നതെന്നും, ഓസ്ട്രേലിയയുടെയും ഇന്ത്യയുടെയും ദേശീയ താല്‍പര്യങ്ങള്‍ സംരക്ഷിച്ചുകൊണ്ടാകും കരാര്‍ ഒപ്പുവയ്ക്കുകയെന്നും അദ്ദേഹം പറഞ്ഞു. ഇയാഴ്ച അവസാനത്തോടെ കരാര്‍ ഒപ്പുവയ്ക്കുമെന്നാണ് വാണിജ്യമന്ത്രി ഡാന്‍ ടെഹാന്‍ വ്യക്തമാക്കി. 24 ബില്യണ്‍ ഡോളറിന്റെ വാണിജ്യബന്ധമാകും ഇരു രാജ്യങ്ങളും തമ്മില്‍ ഉണ്ടാകുക. 

ചൈനയുമായുള്ള തര്‍ക്കങ്ങള്‍ രൂക്ഷമായതോടെ ഓസ്ട്രേലിയ ഏറെ പ്രാധാന്യത്തോടെയാണ് ഈ വ്യാപാര കരാറിനെ കാണുന്നത്. ഓസ്ട്രേലിയന്‍ ഉത്പന്നങ്ങള്‍ക്ക് പുതിയ വിപണി തേടുക എന്ന ലക്ഷ്യമാണ് ഇന്ത്യയുമായുള്ള വ്യാപാരകരാറിലൂടെ ഓസ്ട്രേലിയ ലക്ഷ്യമിടുന്നത്. ഈ വ്യാപാര കരാര്‍ ലക്ഷ്യം കാണുന്നതോടെ ഇന്ത്യയില്‍ നിന്നുള്ള നിരവധി സേവനങ്ങളും ഉത്പന്നങ്ങളും നികുതിയില്ലാതെ ഓസ്ട്രേലിയയിലേക്കും എത്തിക്കാന്‍ കഴിയും. ഒരു ഇടക്കാല സ്വതന്ത്ര വ്യാപാര കരാറാകും ആദ്യഘട്ടത്തില്‍ ഒപ്പുവയ്ക്കുക എന്നാണ് സൂചന. അന്തിമ കരാര്‍ പിന്നീടാകും വരുന്നത്. മൈനിംഗ്, മരുന്ന് നിര്‍മ്മാണം, ആരോഗ്യം, വിദ്യാഭ്യാസം, ടൂറിസം, പ്രതിരോധം, വസ്ത്രനിര്‍മ്മാണം തുടങ്ങിയ മേഖലകളിലാകും സ്വതന്ത്ര വ്യാപാര കരാറിലൂടെ സഹകരണം കൂടുന്നത്. ഇതോടൊപ്പം ഭക്ഷ്യ ഉത്പന്നങ്ങളുടെയും മറ്റും കയറ്റുമതിയും വര്‍ദ്ധിക്കും.

ജപ്പാൻ ജ്വരത്തെ പ്രതിരോധിക്കാൻ 70 മില്യൺ ഡോളർ വകയിരുത്തി ഓസ്ട്രേലിയ

Metrom Australia March 11, 2022 GOVERNMENT

ഓസ്ട്രേലിയയിൽ പടർന്നുകൊണ്ടിരിക്കുന്ന ജപ്പാന്‍ ജ്വരത്തെ (ജാപ്പനീസ് എന്‍കെഫലൈറ്റിസ്)  പ്രതിരോധിക്കുന്നതിനായി ഫെഡറൽ സർക്കാർ  എഴുപത് മില്യൺ ഡോളർ വകയിരുത്തി. രാജ്യത്ത് വൈറസ് പടരുന്നത് ആശങ്കാജനകമാണെന്ന് പറഞ്ഞ ഫെഡറൽ ആരോഗ്യ മന്ത്രി ഗ്രഗ് ഹണ്ട്, സംസ്ഥാന സർക്കാരുകൾ ക്രിയാത്മകമായി ഇടപെടുന്നുണ്ടെന്നും വ്യക്തമാക്കി.

പ്രതിരോധ ബോധവൽക്കരണത്തിനായി പ്രത്യേക ക്യാമ്പയിൻ ആരംഭിക്കുന്നതാണ്. എന്നാൽ വൈറസിനെ പ്രതിരോധിക്കുന്നതിനായി രാജ്യത്ത് അടിയന്തരമായി 130,000 ഡോസ് വാക്‌സിൻ ലഭ്യമാക്കുമെന്ന് ആരോഗ്യ മന്ത്രി പറഞ്ഞു. നിലവിൽ 15,000 ഡോസ് പ്രതിരോധ വാക്സിൻ രാജ്യത്ത് ലഭ്യമാക്കിയിട്ടുണ്ടെന്നും അദ്ദേഹം വ്യക്തമാക്കി.

അതേസമയം കൊതുക് നിർമ്മാർജ്ജന പ്രവർത്തനങ്ങൾക്ക് പുറമേ വൈറസിൻറെ വ്യാപനം മനസ്സിലാക്കുന്നതിനായി മൃഗങ്ങളിലടക്കം നിരീക്ഷണ സംവിധാനങ്ങൾ ശക്തിപ്പെടുത്തും. വൈറസിൽ നിന്ന് രക്ഷ തേടുന്നതിനായി പ്രത്യേക ബോധവൽക്കരണ പദ്ധതി ആരംഭിക്കാനും ഫെഡറൽ സർക്കാർ തീരുമാനിച്ചിട്ടുണ്ട്. ഇതിനായി 5 മില്യൺ ഡോളർ ചിലവഴിക്കും. കൂടാതെ സംസ്ഥാന-ടെറിട്ടറി പ്രദേശങ്ങളിലെ കൃഷി വകുപ്പുകളെ വൈറസ് പ്രതിരോധ പ്രവർത്തനങ്ങളിൽ സഹായിക്കുന്നതിനായി 10 മില്യൺ ഡോളർ നീക്കിവെക്കുമെന്നും ഫെഡറൽ സർക്കാർ വ്യക്തമാക്കി.

ജപ്പാൻ ജ്വരം ഓസ്‌ട്രേലിയയിൽ പുതിയതാണെങ്കിലും, അന്താരാഷ്ട്രതലത്തിൽ ഇത് പുതിയതല്ലെന്ന് ഡെപ്യൂട്ടി ചീഫ് മെഡിക്കൽ ഓഫീസർ സോന്യ ബെന്നറ്റ് പറഞ്ഞു. ലോകമെമ്പാടും പതിറ്റാണ്ടുകളായി, ജപ്പാൻ ജ്വരത്തിനെതിരെയുള്ള വാക്‌സിനുകൾ വിജയകരമായി ഉപയോഗിക്കുന്നുണ്ടെന്നും  കൂട്ടിച്ചേർത്തു. കൊതുക് കടിയിലൂടെയാണ് വൈറസ് മനുഷ്യരിലേക്ക് പകരുന്നത്, മനുഷ്യനിൽ നിന്ന് മനുഷ്യനിലേക്ക് പകരാൻ വൈറസിന് കഴിയില്ലെന്നും ഡോ. ബെന്നറ്റ് ചൂണ്ടികാട്ടി.

ഓസ്ട്രേലിയയിൽ നിലവിൽ 15 പേർക്കാണ് ജപ്പാൻ ജ്വരം സ്ഥിരീകരിച്ചിരിക്കുന്നത്. വൈറസ് ബാധിച്ച് രണ്ടു പേർ ഇതിനോടകം മരിക്കുകയും ചെയ്തിട്ടുണ്ട്. NSW, ക്വീൻസ്‌ലാൻഡ്, സൗത്ത് ഓസ്‌ട്രേലിയ, വിക്ടോറിയ എന്നിവിടങ്ങളിലാണ് വൈറസ് സ്ഥിരീകരിച്ചിരിക്കുന്നത്.