ആദ്യ വീട് വാങ്ങാൻ ശ്രമിക്കുന്നവർക്കായി പുതിയ വാഗ്ദാനവുമായി ലിബറൽ സഖ്യം

Metrom Australia May 17, 2022 POLITICS , GOVERNMENT

ആദ്യ വീടു വാങ്ങാൻ ശ്രമിക്കുന്നവർക്കായി  പുതിയ വാഗ്ദാനവുമായി പ്രധാനമന്ത്രി സ്കോട്ട് മോറിസൻ. വീടു വാങ്ങുന്നതിനാവശ്യമായ നിക്ഷേപ തുക കണ്ടെത്താനായി സൂപ്പറാന്വേഷൻ ഫണ്ട് ഉപയോഗിക്കാൻ അനുവദിക്കും എന്നതാണ് പുതിയ തെരഞ്ഞെടുപ്പ് പ്രഖ്യാപനം.

തന്റെ സർക്കാർ വീണ്ടും അധികാരത്തിലെത്തിയാൽ, ആദ്യ വീടു വാങ്ങാൻ ശ്രമിക്കുന്നവർക്ക് സൂപ്പറാന്വേഷൻ നീക്കിയിരിപ്പിന്റെ 40 ശതമാനം അതിനായി ഉപയോഗിക്കാൻ അനുവാദം നൽകുമെന്നാണ് പ്രധാനമന്ത്രിയുടെ പ്രഖ്യാപനം. വീടു വിലയുടെ അഞ്ചു ശതമാനം തുക സമ്പാദ്യമായി കൈവശമുള്ളവർക്കാണ് ഇത്തരത്തിൽ സൂപ്പറാന്വേഷൻ തുക കൂടി ഉപയോഗിക്കാൻ കഴിയുക. പരമാവധി 50,000 ഡോളർ വരെയാകും ഇങ്ങനെ ഉപയോഗിക്കാൻ കഴിയുക.

എന്നാൽ എപ്പോഴെങ്കിലും ആ വീട് വിറ്റാൽ, സൂപ്പറാന്വേഷനിൽ നിന്ന് പിൻവലിച്ച തുക തിരിച്ചടയ്ക്കേണ്ടിവരും. വീടുവിലയിലെ വർദ്ധനവിൽ നിന്നും (ക്യാപിറ്റൽ ഗെയിൻസ്) ആനുപാതികമായ തുക കൂടി സൂപ്പർ ഫണ്ടിലേക്ക് നിക്ഷേപിക്കണം. 2023 ജൂലൈ ഒന്നു മുതൽ പദ്ധതി നടപ്പാക്കാനാണ് ഉദ്ദേശിക്കുന്നത്.

അതേസമയം പദ്ധതി നടപ്പാക്കിയാൽ വീടു വിലയിൽ താൽക്കാലികമായി വർദ്ധനവ് ഉണ്ടാകുമെന്ന് സൂപ്പറാന്വേഷൻ വകുപ്പ് മന്ത്രി ജെയ്ൻ ഹ്യൂം സമ്മതിച്ചു. അതായത്, 
വീടുവാങ്ങാൻ കാത്തിരിക്കുന്നവർ നേരത്തേ തന്നെ വിപണിയിലേക്ക് എത്തുന്ന സാഹചര്യമുണ്ടാകുമെന്നും, ഇത് താൽക്കാലികമായി വില കൂട്ടും എന്നും ജെയ്ൻ ഹ്യൂം പറഞ്ഞു. എന്നാൽ, ഇത് ഒഴിവാക്കാൻ സർക്കാരിന്റെ മറ്റു പദ്ധതികൾ സഹായിക്കുമെന്ന് പ്രധാനമന്ത്രി  വിശദീകരിച്ചു.

എരിതീയിൽ എണ്ണയൊഴിക്കുന്ന നടപടിയാണ് ലിബറൽ സഖ്യത്തിന്റേത് എന്ന് ലേബർ പാർട്ടി വിമർശനം ഉന്നയിച്ചു. ജോലിയിൽ നിന്ന് വിരമിച്ച ശേഷമുള്ള സുരക്ഷ ഇല്ലാതാക്കുന്ന നടപടിയാകും സൂപ്പർ നിക്ഷേപം പിൻവലിക്കലെന്ന് ലേബർ വക്താവ് ടാനിയ പ്ലിബർസെകും കുറ്റപ്പെടുത്തി.

ഓസ്ട്രേലിയൻ തെരഞ്ഞെടുപ്പ്: വോട്ടിംഗിനെ കുറിച്ച് അറിയാം

Metrom Australia May 16, 2022 GOVERNMENT

ഓസ്ട്രലിയയിൽ തെരഞ്ഞെടുപ്പ് അടുത്തിരിക്കയാണ്. എന്നാൽ വോട്ട് ചെയ്യാനായി പോളിംഗ് സ്റ്റേഷനിലെത്തുമ്പോൾ പോലും പലർക്കും എങ്ങനെയാണ് വോട്ടു ചെയ്യേണ്ടതെന്ന് വ്യക്തമായി മനസിലാകാറില്ല. ഈ സാഹചര്യത്തിൽ ഓസ്ട്രേലിയയിലെ വോട്ടിംഗ് സമ്പ്രദായം എങ്ങനെയാണെന്ന് വിശദമായി പരിശോധിക്കാം. 

നിർബന്ധിത വോട്ടിംഗ് നിലവിലുള്ള രാജ്യമാണ് ഓസ്ട്രേലിയ. ഏതെങ്കിലും ഒരു സ്ഥാനാർത്ഥിക്ക് മാത്രം വോട്ടു ചെയ്യുന്ന രീതിയല്ല ഓസ്ട്രേലിയയിലേത്. പകരം പ്രിഫറൻഷ്യൽ വോട്ടിംഗ് രീതിയാണ് ഓസ്ട്രേലിയയിലുള്ളത്.

വോട്ടു ചെയ്യാൻ പോകുന്നതിന് മുമ്പ് ആദ്യം അറിഞ്ഞിരിക്കേണ്ടത് നിങ്ങളുടെ പാർലമെന്റ് സീറ്റ് (അഥവാ ഇലക്ടറേറ്റ് ) ഏതാണെന്നാണ്. 151 ഫെഡറൽ ഇലക്ടറൽ ഡിവിഷൻസ് ഉണ്ട്. ഇതിൽ നിങ്ങളുടെ ഇലക്ടറേറ്റ് എതാണ് എന്ന് അറിയില്ലെങ്കിൽ കമ്മീഷന്റെ വെബ്സൈറ്റിൽ നിന്ന് (electorate.aec.gov.au ) കണ്ടെത്താം. അല്ലെങ്കിൽ 13 23 26 എന്ന നമ്പറിൽ വിളിക്കാവുന്നതാണ്.

നിങ്ങൾ താമസിക്കുന്ന സംസ്ഥാനത്ത് ഏതു പോളിംഗ് സ്റ്റേഷനിൽ വേണമെങ്കിലും വോട്ടു ചെയ്യാം. നിങ്ങളുടെ സമീപത്തുള്ള പോളിംഗ് സ്റ്റേഷൻ കണ്ടെത്താൻ തെരഞ്ഞെടുപ്പ് കമ്മീഷൻ തയ്യാറാക്കിയ ഓൺലൈൻ ടൂൾ  സഹായിക്കും. നിങ്ങളുടെ താമസസ്ഥലത്തെ പോസ്റ്റ് കോഡ് ഉപയോഗിച്ച് പോളിംഗ് സ്റ്റേഷനും, സ്ഥാനാർത്ഥികളുടെ പേരുമെല്ലാം കണ്ടെത്താൻ സാധിക്കും.

അതേസമയം വോട്ടെടുപ്പ് ദിവസം പോളിംഗ് സ്റ്റേഷനിലെത്തി വോട്ടു രേഖപ്പെടുത്തുക എന്നതാണ് ഏറ്റവും എളുപ്പമുള്ള മാർഗ്ഗം. അതിനായി ശനിയാഴ്ചകളിലാണ് ഓസ്ട്രേലിയൻ തെരഞ്ഞെടുപ്പ് നടത്തുക.  പോളിംഗ് സ്റ്റേഷനിലെത്താൻ പ്രയാസമുള്ളവർക്കായി മറ്റു മാർഗ്ഗങ്ങളും സജ്ജീകരിക്കുന്നുണ്ട്.

ഏർലി വോട്ടിംഗ് അഥവാ മുൻകൂർ വോട്ടിംഗും, പോസ്റ്റൽ വോട്ടിംഗ് അഥവാ തപാൽ വോട്ടിംഗുമാണ് അതിലെ പ്രധാന മാർഗ്ഗങ്ങൾ.
വോട്ടെടുപ്പിന് മുമ്പുള്ള ആഴ്ചകളിൽ ഏർലി വോട്ടിംഗ് കേന്ദ്രങ്ങളിലെത്തി വോട്ടു രേഖപ്പെടുത്താൻ കഴിയും. അല്ലെങ്കിൽ തപാൽ വോട്ടിംഗ് ഫോം ആവശ്യപ്പെടാം.
നിർദ്ദിഷ്ട സാഹചര്യങ്ങളിലുള്ളവർക്കാണ് ഈ മാർഗ്ഗങ്ങൾ പ്രയോജനപ്പെടുത്താൻ കഴിയുക. കൂടാതെ, വോട്ടെടുപ്പ് ദിവസം നിങ്ങൾ കോവിഡ് ബാധിച്ച് ഐസൊലേറ്റ് ചെയ്യുകയാണെങ്കിൽ ടെലിഫോൺ വോട്ടിംഗും ഇത്തവണ കമ്മീഷൻ സജ്ജമാക്കുന്നുണ്ട്.

എന്നാൽ വോട്ടടെടുപ്പ് ദിവസം നിങ്ങൾ സ്വന്തം സംസ്ഥാനത്തില്ലെങ്കിൽ, വോട്ടു ചെയ്യാൻ മറ്റു മാർഗ്ഗങ്ങളുണ്ട്. തപാൽ വോട്ടിനായി നേരത്തേ അപേക്ഷിക്കാം. അല്ലെങ്കിൽ, മറ്റു സംസ്ഥാനങ്ങളിൽ ‘സംസ്ഥാനാന്തര വോട്ടിംഗ് കേന്ദ്രങ്ങൾ’ ഉണ്ടാകും. അവിടെയെത്തി വോട്ട് രേഖപ്പെടുത്താം.

വോട്ടെടുപ്പ് ദിവസം  വിദേശത്താണെങ്കിൽ?

വോട്ടെടുപ്പ് ദിവസം നിങ്ങൾ വിദേശത്താണെങ്കിൽ അക്കാര്യം തെരഞ്ഞെടുപ്പ് കമ്മീഷനെ അറിയിക്കുകയോ, അല്ലെങ്കിൽ വിദേശത്തു നിന്ന് തന്നെ വോട്ടു രേഖപ്പെടുത്തുകയോ ചെയ്യണം. ഓസ്ട്രേലിയൻ ഹൈക്കമ്മിഷനുകളിലും കോൺസുലേറ്റുകളിലും നിന്ന് തപാൽ വോട്ടിംഗ് ഫോം ലഭിക്കുകയും ചെയ്യും.


വോട്ട് ചെയ്യേണ്ടത് എങ്ങനെ?

രണ്ട് ബാലറ്റ് പേപ്പറുകളിലായിട്ടാണ് വോട്ട് രേഖപ്പെടുത്തേണ്ടി വരിക. ഒരു പച്ച ബാലറ്റ് പേപ്പറും, ഒരു വെള്ള ബാലറ്റ് പേപ്പറുമാണ് ലഭിക്കുക. രണ്ടു സഭകളിലേക്കുള്ള ബാലറ്റുകളാണ് ഇവ.

ഹൗസ് ഓഫ് റെപ്രസന്റേറ്റീവ്സിലേക്കുള്ള ബാലറ്റാണ് പച്ച ബാലറ്റ്. 151 ഹൗസ് ഓഫ് റെപ്രസന്റേറ്റീവ്സ് സീറ്റുകളാണ് ഓസ്ട്രേലിയയിലുള്ളത്. ഓരോ സീറ്റിൽ നിന്നും ഓരോ അംഗത്തെ വീതം തെരഞ്ഞെടുക്കുന്നു.  ഈ സഭയിൽ ഭൂരിപക്ഷം കിട്ടുന്ന പാർട്ടിയാണ് സർക്കാർ രൂപീകരിക്കുന്നത്.

എന്നാൽ നിങ്ങളുടെ ഇലക്ടറേറ്റിൽ നിന്ന് ഒരു സ്ഥാനാർത്ഥിയെ തെരഞ്ഞെടുക്കുന്നതിനു വേണ്ടിയാണ് നിങ്ങൾ പച്ച ബാലറ്റിൽ വോട്ടു ചെയ്യുന്നത്. പക്ഷേ, നിങ്ങൾ വോട്ടു ചെയ്യേണ്ടത് ഒറ്റ സ്ഥാനാർത്ഥിക്ക് മാത്രമല്ല.

പ്രിഫറൻസ് വോട്ടിംഗ് സമ്പ്രദായമായതിനാൽ, ബാലറ്റ് പേപ്പറിലെ എല്ലാ സ്ഥാനാർത്ഥികൾക്കും നിങ്ങൾ വോട്ടു ചെയ്യണം. നിങ്ങളുടെ മുൻഗണനാ ക്രമമാണ് ഓരോ സ്ഥാനാർത്ഥിക്കും നേരേ രേഖപ്പെടുത്തേണ്ടത്.

എളുപ്പത്തിൽ പറഞ്ഞാൽ  ജയിക്കണമെന്ന് നിങ്ങൾ ഏറ്റവും ആഗ്രഹിക്കുന്ന സ്ഥാനാർത്ഥിക്ക് നേരേ “1” എന്നും രണ്ടാമത് മുൻഗണനയുള്ള സ്ഥാനാർത്ഥിക്ക് നേരേ “2” എന്നും രേഖപ്പെടുത്തുക. ഇത്തരത്തിൽ എല്ലാ സ്ഥാനാർത്ഥികൾക്കും വോട്ടു ചെയ്താൽ മാത്രമേ വോട്ട് സാധുവായി കണക്കാക്കൂ.

നിങ്ങളുടെ പ്രിഫറൻസ് വോട്ട് നൽകുന്ന സ്ഥാനാർത്ഥി ജയിച്ചില്ലെങ്കിൽ പോലും, നിങ്ങളുടെ വോട്ടിന് പൂർണ മൂല്യമുണ്ടാകും. കാരണം, ഏറ്റവും മുകളിലെത്തുന്ന രണ്ട് സ്ഥാനാർത്ഥികളിൽ ഒരാൾക്കായി നിങ്ങളുടെ വോട്ട് വീതിക്കപ്പെടും.

സെനറ്റ് തെരഞ്ഞെടുപ്പ് 

ഓസ്ട്രേലിയയിൽ ജനങ്ങൾ നേരിട്ടാണ് സെനറ്റർമാരെ തെരഞ്ഞെടുക്കുന്നത്. സെനറ്റിൽ ആകെ 76 അംഗങ്ങളാണ്. ആറു സംസ്ഥാനങ്ങളിലും നിന്ന് 12 അംഗങ്ങൾ വീതവും, രണ്ട് ടെറിട്ടറികളിൽ നിന്ന് രണ്ട് അംഗങ്ങൾ വീതവുമാണ്. ഇതിൽ പകുതി പേരെയാകും ഓരോ ഫെഡറൽ തെരഞ്ഞെടുപ്പിലും സാധാരണ തെരഞ്ഞെടുക്കുക. 

നിങ്ങളുടെ സംസ്ഥാനത്തോ ടെറിട്ടറിയിലോ നിന്നുള്ള എല്ലാ സെനറ്റർമാരെയും തെരഞ്ഞെടുക്കാനാണ് നിങ്ങളുടെ വോട്ട്. ഇതിനായി വെള്ള ബാലറ്റ് പേപ്പറാണ് ലഭിക്കുക. ഇത്രയധികം സ്ഥാനാർത്ഥികളുടെ പേരുള്ളതിനാൽ വെള്ള ബാലറ്റ് പേപ്പറിന്റെ വലിപ്പവും വളരെ കൂടുതലായിരിക്കും.

സെനറ്റിലേക്ക് വോട്ടു ചെയ്യാൻ ലളിതമായി രണ്ടു മാർഗ്ഗങ്ങളുണ്ടെന്നാണ്ന് തെരഞ്ഞെടുപ്പ് കമ്മീഷൻ പറയുന്നത്. 'എബോവ് ദ ലൈൻ (ലൈനിന് മുകളിൽ), അല്ലെങ്കിൽ ബിലോ ദ ലൈൻ (ലൈനിന് താഴെ)'. ലൈനിന് മുകളിലുള്ളത് പാർട്ടികളുടെ പേരായിരിക്കും. അവിടെ വോട്ടു ചെയ്യുകയാണെങ്കിൽ കുറഞ്ഞത് ആറു പാർട്ടികൾക്ക് നിങ്ങളുടെ പ്രിഫറൻസ് വോട്ട് (1, 2, 3…6) നൽകണം.

എന്നാൽ പാർട്ടികൾ തീരുമാനിക്കുന്ന പോലെയാകും ഓരോ സ്ഥാനാർത്ഥിക്കും നിങ്ങളുടെ പ്രിഫറൻസ് പോകുക.

ഈ പാർട്ടികളിലുള്ള സ്ഥാനാർത്ഥികളുടെ പേരായിരിക്കും വരയ്ക്കു താഴെയുണ്ടാകുക.
ഏതെങ്കിലും സ്ഥാനാർത്ഥികൾക്ക് നിങ്ങളുടെ മുൻഗണന നൽകണമെങ്കിൽ വരയ്ക്കു താഴെ വോട്ടു ചെയ്യണം. അപ്പോൾ കുറഞ്ഞത് 12 സ്ഥാനാർത്ഥികൾക്ക് വോട്ടു ചെയ്യേണ്ടിവരും (1, 2, 3…. 12).

വരയ്ക്ക് മുകളിലാണെങ്കിൽ കുറഞ്ഞത് ആറു കോളങ്ങളിലും, വരയ്ക്കു താഴെയാണെങ്കിൽ 12 കോളങ്ങളിലും വോട്ടു ചെയ്തില്ലെങ്കിൽ നിങ്ങളുടെ വോട്ട് അസാധുവാകും. ഈ മുൻഗണനാ ക്രമമല്ലാതെ മറ്റേതെങ്കിലും തരത്തിൽ വോട്ടു ചെയ്താലും വോട്ട് അസാധുവാകും.

വോട്ടെണ്ണൽ: ഹൗസ് ഓഫ് റെപ്രസന്റേറ്റീവ്സ്

ഹൗസ് ഓഫ് റെപ്രസന്റേറ്റീവ്സിൽ 50 ശതമാനത്തിനു മുകളിൽ വോട്ടു കിട്ടുന്ന സ്ഥാനാർത്ഥിയാണ് ജയിക്കുക. ആദ്യ റൗണ്ടിൽ ആർക്കും 50 ശതമാനം വോട്ട് കിട്ടിയില്ലെങ്കിൽ, ഏറ്റവും പിന്നിലുള്ള സ്ഥാനാർത്ഥിയെ ഒഴിവാക്കുകയും, അവരുടെ രണ്ടാം പ്രിഫറൻസ് വോട്ടുകൾ വീതിച്ചു നൽകുകയും ചെയ്യും.

വോട്ടെണ്ണൽ: സെനറ്റ് 

ഏറെ സങ്കീർണ്ണമായ വോട്ടെടുപ്പും വോട്ടെണ്ണലുമാണ് സെനറ്റിലേക്കുള്ളതാണ്.
ആഴ്ചകൾ എടുത്തു മാത്രമാണ് സെനറ്റിലെ വോട്ടെണ്ണി തീർക്കുക.

എന്നാൽ സെനറ്റിൽ ഒരു ക്വാട്ട നിശ്ചയിച്ചാണ് വിജയിയെ നിശ്ചയിക്കുന്നത്. അവിടെയും, കുറഞ്ഞ വോട്ടു കിട്ടുന്ന സ്ഥാനാർത്ഥിയെ ഒഴിവാക്കിയ ശേഷം രണ്ടാം പ്രിഫറൻസ് വോട്ടുകൾ വീതിച്ചു നൽകും. ഗണിത സമവാക്യങ്ങളുടെ അടിസ്ഥാനത്തിലാകും ഈ ക്വാട്ടയും, പ്രിഫറൻസ് വീതം വയ്പ്പുമെല്ലാം നടക്കുക.

വോട്ട് ബഹിഷ്കരിച്ചാൽ

നിർബന്ധിത വോട്ടിംഗ് നിലവിലുള്ള രാജ്യമായതിനാൽ വോട്ടർപട്ടികയിൽ പേരുണ്ടായിട്ടും, വ്യക്തമായ കാരണമില്ലാതെ വോട്ടു ചെയ്യാതിരിക്കുന്നവർക്ക്  20 ഡോളർ പിഴ അടയ്ക്കേണ്ടി വരും. അത് അടച്ചില്ലെങ്കിൽ കേസ് കോടതിയിലെത്തുകയും 170 ഡോളർ പിഴയും, കോടതിച്ചെലവും അടയ്ക്കേണ്ടി വരികയും വന്നേക്കാം.

കടപ്പാട് : SBS Malayalam

ഇന്ത്യയിൽ മുഖ്യതെരഞ്ഞെടുപ്പ് കമ്മിഷണറായി രാജീവ് കുമാര്‍ ചുമതലയേറ്റു

Metrom Australia May 16, 2022 GOVERNMENT

ന്യൂഡൽഹി:  ഇന്ത്യയിലെ 25ാമത് മുഖ്യതെരഞ്ഞെടുപ്പ് കമ്മിഷണറായി രാജീവ് കുമാര്‍ ചുമതലയേറ്റു. തെരഞ്ഞെടുപ്പ് കമ്മിഷനിലെ ഏറ്റവും മുതിര്‍ന്ന അംഗമാണ് രാജീവ് കുമാര്‍. 2025 ഫെബ്രുവരി വരെയാണ് രാജീവ് കുമാറിന്റെ തെരഞ്ഞെടുപ്പ് കമ്മിഷണറായുള്ള കാലാവധി. ജൂലൈ- ഓഗസ്റ്റ് മാസങ്ങളില്‍ നടക്കാനിരിക്കുന്ന രാഷ്ട്രപതി, ഉപരാഷ്ട്രപതി തെരഞ്ഞെടുപ്പുകളും 2024ല്‍ നടക്കാനിരിക്കുന്ന ലോക്‌സഭാ തെരഞ്ഞെടുപ്പും  നിയമസഭാ തെരഞ്ഞെടുപ്പുകളുമാണ്
രാജീവ് കുമാറിന് മുന്നിലുള്ള പ്രധാന ചുമതലകള്‍. ശനിയാഴ്ച സ്ഥാനമൊഴിഞ്ഞ സുശീല്‍ ചന്ദ്രയുടെ പിന്‍ഗാമിയായാണ് ചുമതലയേറ്റത്.  2020 സെപ്റ്റംബര്‍ 1 മുതല്‍ രാജീവ് കുമാര്‍ തെരഞ്ഞെടുപ്പ് പാനലിൽ അംഗമാണ്.

റെനില്‍ വിക്രമസിംഗെ ശ്രീലങ്കയുടെ പുതിയ പ്രധാനമന്ത്രി

Metrom Australia May 13, 2022 GOVERNMENT

കൊളംബോ: സാമ്പത്തിക പ്രതിസന്ധിമൂലം അരങ്ങേറിയ ജനകീയ പ്രതിഷേധങ്ങള്‍ക്കൊടുവില്‍ ശ്രീലങ്കയ്ക്ക് പുതിയ പ്രധാനമന്ത്രി. യുഎന്‍പി നേതാവും മുന്‍ പ്രധാനമന്ത്രിയുമായ  റെനില്‍ വിക്രമസിംഗെയാകും പുതിയ പ്രധാനമന്ത്രി. വിക്രമസിംഗെയുടെ സത്യപ്രതിജ്ഞ ഇന്നലെ വൈകിട്ട്  നടന്നു. പ്രസിഡന്റ് ഗോതബായ രജപക്‌സെയുടെ നിര്‍ദേശപ്രകാരമായിരുന്നു തീരുമാനം. ഇതുവരെ 4 തവണ അദ്ദേഹം ശ്രീലങ്കയുടെ പ്രധാനമന്ത്രിയായിട്ടുണ്ട്.

1994 മുതല്‍ യുണൈറ്റഡ് നാഷണല്‍ പാര്‍ട്ടിയുടെ തലവനാണ് റനില്‍ വിക്രമസിംഗെ. എഴുപതുകളില്‍ രാഷ്ട്രീയത്തിലിറങ്ങിയ റനില്‍ 1977ല്‍ ആദ്യമായി എംപിയായി തെരഞ്ഞെടുക്കപ്പെട്ടു. പ്രധാനമന്ത്രിയാകുന്നതിന് മുമ്പ് തൊഴില്‍ മന്ത്രി, യുവജന, വിദേശകാര്യ ഉപമന്ത്രി, തുടങ്ങി നിരവധി സ്ഥാനങ്ങളിലേക്ക് അദ്ദേഹം തെരഞ്ഞെടുക്കപ്പെട്ടിട്ടുണ്ട്.

 

പാക് യുവാക്കൾക്ക് പുതിയ ആപ്പുമായി ഇമ്രാൻ ഖാൻ

Metrom Australia May 11, 2022 POLITICS , GOVERNMENT

ഇമ്രാൻ ഖാൻ തന്റെ സ്വന്തം പാർട്ടിയായ തെഹ്‌രീക്–ഇ–ഇൻസാഫിൽ മെമ്പർഷിപ്പ് എടുക്കാൻ വേണ്ടി പുതിയ ആപ്ലിക്കേഷൻ ആരംഭിച്ചു. ആപ്ലിക്കേഷനിൽ രജിസ്റ്റർ ചെയ്യുന്നതിലൂടെ പാർട്ടിയിൽ അംഗത്വം നേടാമെന്ന് ഇമ്രാൻ ഖാൻ അവകാശപ്പെടുന്നു. വിദേശരാജ്യങ്ങളിലുള്ള പാകിസ്താനികളെ ലക്ഷ്യം വെച്ചാണ് ‘റാബ്ത’ എന്ന പേരിൽ ആപ്പ് നിർമ്മിച്ചിരിക്കുന്നത്. നിലവിലെ പ്രധാനമന്ത്രി ഷെഹ്ബാസ് ഷെരീഫിനോട് പ്രതിഷേധം അറിയിക്കാൻ തന്റെ ആപ്പിൽ മെമ്പർഷിപ്പ് എടുത്ത് തെഹ്‌രീക്–ഇ–ഇൻസാഫിന് പിന്തുണ നൽകണമെന്നും ഇമ്രാൻ ആവശ്യപ്പെട്ടു. പാർട്ടിക്ക് സംഭവിച്ച പിഴവുകൾ തിരുത്തുമെന്നും 2018 ലെ തെരഞ്ഞെടുപ്പിൽ സംഭവിച്ച തെറ്റ് വരാനിരിക്കുന്ന തെരഞ്ഞെടുപ്പിൽ തിരുത്തുമെന്നും ഇമ്രാൻ പറഞ്ഞു.