ബ്രിസ്ബൈനിലെ കോവിഡ്ബാധിതന്‍ ന്യൂ സൗത്ത് വെയില്‍സ് സന്ദര്‍ശിച്ചതിനെത്തുടര്‍ന്ന് സംസ്ഥാനത്ത് പുതുതായി ഒരു പ്രാദേശിക വൈറസ്ബാധ സ്ഥിരീകരിച്ചു. വടക്കന്‍ ന്യൂ സൗത്ത് വെയില്‍സിലെ ബൈറണ്‍ ബേയിലാണ് പുതിയ വൈറസ്ബാധ സ്ഥിരീകരിച്ചത്. ബ്രിസ്ബൈനില്‍ നിന്ന് മാര്‍ച്ച് 20ന് ബൈറണ്‍ ബീച്ച് ഹോട്ടലില്‍ എത്തിയയാള്‍ക്കാണ് കോവിഡ്.
ഇതേതുടര്‍ന്ന് സംസ്ഥാനത്ത് ചില പ്രദേശങ്ങളില്‍ വീണ്ടും നിയന്ത്രണങ്ങള്‍ ഏര്‍പ്പെടുത്തി. ബൈറണ്‍ ബേ, ബലിന, ലിസ്മോര്‍, ട്വീഡ് എന്നീ പ്രദേശങ്ങളിലാണ് പ്രധാനമായും നിയന്ത്രണം. ഈ പ്രദേശങ്ങളില്‍ സാമൂഹിക അകലം പാലിക്കല്‍ നിയന്ത്രണം കടുപ്പിക്കുമെന്ന് പ്രീമിയര്‍ ഗ്ലാഡിസ് ബെറജ്കളിയന്‍ അറിയിച്ചു. പ്രദേശത്തെ വീടുകളില്‍ ഒത്തുചേരാവുന്നവരുടെ എണ്ണത്തിലും നിയന്ത്രണം ഏര്‍പ്പെടുത്തി. ഒരു വീട്ടില്‍ 30 പേര്‍ക്ക് മാത്രമേ ഒത്തുചേരാന്‍ അനുവാദമുള്ളൂ. മാത്രമല്ല ഇവിടെയുള്ളവര്‍ മറ്റ് സ്ഥലങ്ങളിലേക്ക് യാത്ര ചെയ്യുന്നത് ഒഴിവാക്കണമെന്നും സര്‍ക്കാര്‍ അറിയിച്ചിട്ടുണ്ട്. എന്നാല്‍ ഇക്കാര്യത്തില്‍ പൊലീസ് നിരീക്ഷണമുണ്ടാവില്ല എന്നും സര്‍ക്കാര്‍ വ്യക്തമാക്കി.
കൂടാതെ ഈ പ്രദേശങ്ങളിലുള്ളവര്‍ ഷോപ്പിംഗിനു പോകുമ്പോഴും പൊതുഗതാഗത സംവിധാനങ്ങള്‍, ടാക്‌സി, റൈഡ് ഷെയര്‍ സേവനങ്ങള്‍ എന്നിവ ഉപയോഗിക്കുമ്പോഴും മാസ്‌ക് നിര്‍ബന്ധമായും ധരിക്കണമെന്ന് പ്രീമിയര്‍ അറിയിച്ചു. ഹോസ്പിറ്റാലിറ്റി ജീവനക്കാര്‍ക്കും മാസ്‌ക് നിര്‍ബന്ധമാണ്. ഹോസ്പിറ്റാലിറ്റി മേഖലയില്‍ നാല് ചതുരശ്ര മീറ്ററില്‍ ഒരാള്‍ എന്ന വ്യവസ്ഥ ബാധകമാകും. മാത്രമല്ല ഇവിടെയെത്തുന്നവര്‍ നിര്‍ബന്ധമായും ഇരിപ്പിടങ്ങളില്‍ ഇരിക്കേണ്ടതാണ്. അതേസമയം NSW-ക്വീന്‍സ്ലാന്റ് അതിര്‍ത്തി അടയ്ക്കാനും കൂടുതല്‍ നിയന്ത്രണങ്ങള്‍ ഏര്‍പ്പെടുത്താനും ഇപ്പോള്‍ പദ്ധതിയില്ലെന്ന് പ്രീമിയര്‍ വ്യക്തമാക്കിയിട്ടുണ്ട്. ബുധനാഴ്ച (ഇന്ന്) വൈകിട്ട് അഞ്ച് മണി മുതല്‍ തിങ്കളാഴ്ച രാത്രി 11.59 വരെയാണ് നിയന്ത്രണം.
