RAT ഫലം അറിയിക്കണമെന്ന നിയമം NSW-ൽ പ്രാബല്യത്തിൽ; അറിയിച്ചില്ലെങ്കിൽ പിഴ

റാപ്പിഡ് ആൻ്റിജൻ ഫലം (RAT) ആരോഗ്യ വകുപ്പിനെ അറിയിക്കണമെന്ന നിയമം NSW-ൽ നിലവിൽ വന്നു. സർവീസ് NSW ആപ്പിലൂടെയാണ് റാപ്പിഡ് ആൻറിജൻ ഫലം ആരോഗ്യ വകുപ്പിനെ അറിയിക്കേണ്ടത്. ഈ സംവിധാനം ഇന്ന് രാവിലെ ഒമ്പത് മുതലാണ് നിലവിൽ വന്നത്. 

അതേസമയം പോസിറ്റീവ് RAT ഫലം റിപ്പോർട്ട് ചെയ്യുന്നത് നിർബന്ധമാക്കിക്കൊണ്ടുള്ള പൊതുജനാരോഗ്യ ഉത്തരവിൽ ഒപ്പുവച്ചതായി പ്രീമിയർ ഡൊമിനിക് പെറൊറ്റെ പറഞ്ഞു. കൂടാതെ പോസിറ്റിവ് ഫലം റിപ്പോർട്ട് ചെയ്യാത്തവരിൽ നിന്ന് 1,000 ഡോളർ പിഴ ഈടാക്കുന്നതാണ്. എന്നാൽ ജനുവരി 19ന് മുതലാകും പിഴ ഈടാക്കുകയെന്നും പ്രീമിയർ അറിയിച്ചു.

റാപ്പിഡ് ആൻറ്റിജൻ കിറ്റുകൾക്ക് ക്ഷാമം; കോവിഡ് പരിശോധന മാനദണ്ഡങ്ങളിൽ മാറ്റം

ഓസ്ട്രേലിയയിൽ ആൻറ്റിജൻ പരിശോധന മാനദണ്ഡങ്ങൾ വീണ്ടും പുതുക്കി നിശ്ചയിച്ചു. കഴിഞ്ഞയാഴ്ച കോവിഡ് പരിശോധനാ കേന്ദ്രങ്ങളിലെ തിരക്കൊഴിവാക്കാൻ റാപ്പിഡ് ആൻറ്റിജൻ കിറ്റുകൾ നിർദേശിച്ചത് ദേശീയ ക്യാബിനറ്റ് യോഗം മാറ്റി നിശ്ചയിച്ചു.  റാപ്പിഡ് ആൻറ്റിജൻ കിറ്റുകൾക്ക് ക്ഷാമം നേരിട്ടു തുടങ്ങിയതോടെയാണ് പുതിയ തീരുമാനം.
ഇതോടെ വെസ്റ്റേൺ ഓസ്ട്രേലിയ ഒഴികെയുള്ള എല്ലാ സംസ്ഥാനങ്ങളിലെയും പരിശോധനകൾക്ക് പുതിയ മാനദണ്ഡങ്ങൾ ബാധകമാകും.

അതോടൊപ്പം റാപ്പിഡ് ആന്റിജൻ ടെസ്റ്റിംഗ് കിറ്റുകൾ സൗജന്യമായി എല്ലാവർക്കും ലഭ്യമാക്കില്ലെന്ന് പ്രധാനമന്ത്രി സ്കോട്ട് മോറിസൺ വ്യക്തമാക്കി. കൺസഷൻ കാർഡ് ഉടമകൾക്ക് മാത്രമാകും സൗജന്യ റാപ്പിഡ് ആന്റിജൻ ടെസ്റ്റിംഗ് കിറ്റിന് അർഹതയുണ്ടാകുക. ഇവർക്ക് അടുത്ത മൂന്ന് മാസത്തിനുള്ളിൽ 10 സൗജന്യ റാപ്പിഡ് ആന്റിജൻ ടെസ്റ്റ് കിറ്റുകൾ വീതം (ഒരു മാസത്തിൽ പരമാവധി അഞ്ച്) നൽകാനും ദേശീയ ക്യാബിനറ്റ് തീരുമാനിച്ചിട്ടുണ്ട്. ഇനിപ്പറയുന്ന കാർഡുകൾ കൈവശമുള്ള ആളുകൾക്കാകും ഫാർമസികൾ വഴി സൗജന്യ കിറ്റുകൾ ലഭിക്കുക.

പെൻഷൻ കൺസഷൻ കാർഡ്, കോമൺവെൽത്ത് സീനിയേഴ്സ് ഹെൽത്ത് കെയർ കാർഡ്, ഡിപ്പാർട്ട്മെന്റ് ഓഫ് വെറ്ററൻസ് അഫയേഴ്സ് ഗോൾഡ്, വൈറ്റ് അല്ലെങ്കിൽ ഓറഞ്ച് കാർഡ്, ഹെൽത്ത് കെയർ കാർഡ് എന്നീ കാർഡുകൾ കൈവശമുള്ള ആളുകൾക്കാകും ഫാർമസികൾ വഴി സൗജന്യ കിറ്റുകൾ ലഭിക്കുക.

അതേസമയം വീടുകളിൽ നടത്തുന്ന റാപ്പിഡ് ആൻറ്റിജൻ പരിശോധന പോസിറ്റാവായാൽ ഇനി മുതൽ ജി.പിയുമായി ബന്ധപ്പെട്ടാൽ മതിയെന്നാണ് സർക്കാർ നിർദ്ദേശം. കൂടാതെ അന്തർ സംസ്ഥാന യാത്രകൾക്ക് മുൻപ് ആവശ്യമായിരുന്ന പരിശോധനയിലും ഇളവ് വരുത്തി. ക്വീൻസ്‌ലാൻഡ്, ടാസ്മാനിയ, വെസ്റ്റേൺ ഓസ്‌ട്രേലിയ എന്നിവ ഒഴികെയുള്ള സംസ്ഥാനങ്ങളിലേക്കുള്ള യാത്രകൾക്ക് ഇനി മുതൽ പരിശോധന ആവശ്യമില്ല.

എന്നാൽ അന്താരാഷ്ട്ര യാത്രക്കാർ ഓസ്ട്രേലിയയിൽ എത്തികഴിഞ്ഞാൽ നടത്തേണ്ടിയിരുന്ന കോവിഡ് പരിശോധനകളിലും ഇളവുണ്ട്. ക്വീൻസ്‌ലാൻറ് ഒഴികെയുള്ള സംസ്ഥാനങ്ങളിലെത്തുന്ന യാത്രക്കാർ രണ്ടാമത്തെ ‘പോസ്റ്റ് അറൈവൽ ടെസ്റ്റ്’ നടത്തേണ്ട എന്നതാണ് ഒരു മാറ്റം. കൂടാതെ ഏഴു ദിവസത്തിലൊരിക്കൽ ട്രക്ക് ഡ്രൈവർമാർക്ക് നിഷ്കർഷിച്ചിരുന്ന റോളിംഗ് ടെസ്റ്റുകളും പിൻവലിച്ചിട്ടുണ്ട്.

63 ശതമാനം ഓസ്ട്രേലിയൻ വനിത പാർലമെൻ്റെറിയന്മാർ പീഡിപ്പിക്കപ്പെട്ടെന്ന് റിപ്പോർട്ട്

ഓസ്ട്രേലിയൻ പാർലമെൻറിൽ പ്രവർത്തിക്കുന്ന വനിതാ അംഗങ്ങളിൽ മൂന്നിലൊരാളെങ്കിലും ലൈംഗികമായി അവഹേളിക്കപ്പെട്ടുവെന്ന് ഗവൺമെൻറ് റിപ്പോർട്ട്. ഓസട്രേലിയൻ മനുഷ്യാവകാശ കമ്മീഷനിലെ സെക്‌സ് ഡിസ്‌ക്രമിനേഷൻ കമ്മീഷണർ കൈറ്റ് ജെൻകിൻസിന്റെ നേതൃത്വത്തിൽ ഏഴുമാസത്തെ പഠനശേഷമുള്ള റിപ്പോർട്ടിലാണ് ഇക്കാര്യം പറയുന്നത്. 

രാജ്യത്തെ 63 ശതമാനം വനിത പാർലമെന്റേറിയന്മാരും 24 ശതമാനം പുരുഷ പാർലമെന്റേറിയന്മാരും ലൈംഗികമായി പീഡിപ്പിക്കപ്പെട്ടിട്ടുണ്ടെന്ന് റിപ്പോർട്ടിൽ പറയുന്നു. എൽജിബിടി വിഭാഗത്തിൽപ്പെടുന്നവരും ഏറെ പീഡിപ്പിക്കപ്പെട്ടിട്ടുണ്ട്. കോമൺവെൽത്ത് പാർലമെൻററി സമ്പ്രദായത്തിൽ പ്രവർത്തിക്കുന്ന 1700 പേരിൽ 51 ശതമാനം പേരും ഇത്തരം ചൂഷണത്തിന് ഇരകളായിട്ടുണ്ടെന്ന് റിപ്പോർട്ട് വ്യക്തമാക്കുന്നു.

വനിതകളിൽ പലരും തങ്ങളുടെ താൽപര്യമില്ലാതെ ചുംബിക്കപ്പെട്ടു, എടുത്തയർത്തപ്പെട്ടു, ഇങ്ങനെ പലതരത്തിൽ തൊഴിലിടങ്ങളിൽ ആൺമേൽക്കോയ്മ അനുഭവിക്കേണ്ടി വന്നിട്ടുണ്ട്. രാജ്യത്ത് ശരാശരി 39 ശതമാനം സ്ത്രീകൾ പീഡനം അനുവഭിക്കുന്നുണ്ട്. ഇതിനേക്കാൾ കൂടുതലാണ് പാർലമെൻറുമായി പ്രവർത്തിക്കുന്നവരിൽ പീഡിതരാകുന്നവർ. 

അതേസമയം രാഷ്ട്രീയ രംഗത്ത് മദ്യം, പരാതികൾ, പെരുമാറ്റ പ്രശ്‌നങ്ങൾ എന്നിവ എങ്ങനെ കൈകാര്യം ചെയ്യപ്പെടണമെന്നതടക്കം 28 നിർദേശങ്ങളും റിപ്പോർട്ട് മുന്നോട്ട് വെച്ചിട്ടുണ്ട്. വോട്ടു ചെയ്യാനടക്കം മദ്യപിച്ചെത്തുന്നതും ലഹരി ഉപയോഗവും റിപ്പോർട്ടിൽ പ്രധാന പ്രശ്‌നമായി ചൂണ്ടിക്കാണിക്കപ്പെടുന്നു. പാർലമെൻറ് അംഗങ്ങൾ പെരുമാറ്റ ചട്ടമടക്കം നിർദേശങ്ങളും മുന്നോട്ടുവെക്കുന്നുണ്ട്.

പാർലമെൻററി ജീവനക്കാരിയായിരുന്ന ബ്രിട്ടാനി ഹിഗ്ഗിൻസ് 2019 ൽ ഒരു മന്ത്രിയുടെ ഓഫിസിൽ ലിബറൽ പാർട്ടി സഹപ്രവർത്തകരാൽ പീഡിപ്പിക്കപ്പെട്ടതിനെ തുടർന്നാണ് പഠന കമ്മീഷനെ നിയമിച്ചത്. താൻ ബലാത്സംഗം ചെയ്യപ്പെടുകയും ലൈംഗികമായി ദുരുപയോഗം ചെയ്യപ്പെടുകയും ചെയ്തുവെന്ന ഇവരുടെ ആരോപണം ദേശീയ തലത്തിൽ ഏറെ പ്രതിഷേധത്തിന് വഴിയൊരുക്കിയിരുന്നു. കേസ് നിലവിൽ കോടതിയുടെ പരിഗണനയിലാണ്. ചൊവ്വാഴ്ച റിപ്പോർട്ട് പുറത്തുവന്നതിനെ തുടർന്ന് നിരവധി ധീരർ തങ്ങളുടെ അനുഭവം പങ്കുവെച്ചതാണ് ഈ വിവരങ്ങൾ പുറത്തുവരാൻ കാരണമെന്ന് അവർ പറഞ്ഞു. റിപ്പോർട്ട് നടപ്പാക്കാൻ എല്ലാ രാഷ്ട്രീയ പ്രവർത്തകരും ഒന്നിക്കണമെന്നും അവർ ആവശ്യപ്പെട്ടു.

ബെംഗളൂരുവിൽ ഓസ്ട്രേലിയൻ കോൺസുലേറ്റ് സ്ഥാപിക്കും

ബെംഗളൂരു: മുൻനിര ഐടി ഹബ്ബായ ബെംഗളൂരുവിൽ ഓസ്ട്രേലിയൻ കോൺസുലേറ്റ് സ്ഥാപിക്കാൻ നടപടികളുമായി ഓസ്‌ട്രേലിയൻ പ്രധാനമന്ത്രി സ്‌കോട്ട് മോറിസൺ. സാങ്കേതിക വിദ്യാ സമ്മേളനമായ ബെംഗളൂരു സമ്മിറ്റിൽ ഓൺലൈനായി പങ്കെടുത്തുകൊണ്ടാണ് അദ്ദേഹം ഇക്കാര്യം അറിയിച്ചത്. ബെംഗളൂരുവിലെ പുതിയ ദൗത്യം ഇന്ത്യയിലെ ഓസ്ട്രേലിയൻ നയതന്ത്ര സ്ഥാപനങ്ങളുടെ എണ്ണം അഞ്ചായി വർദ്ധിക്കും.

വാക്സിൻ സ്വീകരിച്ച രാജ്യാന്തര വിദ്യാർത്ഥികൾക്ക് NSWൽ ക്വാറന്റൈൻ വേണ്ട

രണ്ട് ഡോസ് വാക്‌സിനും സ്വീകരിച്ച രാജ്യാന്തര വിദ്യാർത്ഥികൾ ക്വാറന്റൈൻ ചെയ്യേണ്ടതില്ലെന്ന് NSW പ്രീമിയർ ഡൊമിനിക് പെറോറ്റെ അറിയിച്ചു. തെറാപ്യൂട്ടിക് ഗുഡ്സ് അഡ്മിനിസ്ട്രേഷൻ അനുമതി നല്കിയിട്ടുളള വാക്‌സിനുകൾ സ്വീകരിച്ചവർക്കാണ് ക്വാറന്റൈൻ ആവശ്യമില്ലാത്തത്. അതേസമയം ഇന്ത്യയിൽ നിർമ്മിച്ച കൊവാക്സിൻ, ചൈനീസ് വാക്‌സിനായി BBIBP-CorV എന്നീ വാക്‌സിനുകൾക്ക് TGA കഴിഞ്ഞ ദിവസം അംഗീകാരം നൽകിയിരുന്നു.

രാജ്യാന്തര വിദ്യാർത്ഥികൾക്ക് അടുത്ത മാസം മുതൽ സംസ്ഥാനത്തേക്കെത്താമെന്ന് സംസ്ഥാന സർക്കാർ അറിയിച്ചിട്ടുണ്ട്. ഇന്തോനേഷ്യ, കാനഡ, ചൈന, വിയറ്റ്നാം, സിംഗപ്പൂർ എന്നിവിടങ്ങളിൽ നിന്നുള്ള 250 രാജ്യാന്തര വിദ്യാർത്ഥികളാണ് ന്യൂ സൗത്ത് വെയിൽസിലേക്ക് എത്തുന്നത്. ഡിസംബർ ആറിന് എത്തുന്ന ചാർട്ടഡ് വിമാനത്തിലാകും ഇവർ എത്തുക.