കിഴക്കൻ മെൽബണിൽ വ്യാജ സർട്ടിഫിക്കറ്റ് നൽകിയ ഡോക്ടർക്ക് വിലക്ക്

Metrom Australia Feb. 2, 2022 GOVERNMENT

കിഴക്കൻ മെൽബണിൽ കുട്ടികൾക്ക് വാക്സിനേഷൻ നിബന്ധനയിൽ ഇളവു ലഭിക്കുന്നതിനായി വ്യാജമായി സർട്ടിഫിക്കറ്റുകൾ നൽകിയ ഡോക്ടർക്ക് ആറു വർഷത്തെ വിലക്കേർപ്പെടുത്തി. ഹോതോൺ, മിച്ചം സബർബുകളിൽ ജനറൽ പ്രാക്ടീഷണറായി പ്രവർത്തിച്ചിരുന്ന ജോൺ പീസെ എന്നയാൾക്കാണ് വിലക്ക്. 

കൂടാതെ ഇയാൾ ഡോക്ടർ എന്ന സ്ഥാനപ്പേര് ഉപയോഗിക്കരുതന്നും ട്രൈബ്യൂണൽ ഉത്തരവിട്ടു. കുട്ടികളുടെ വാക്സിനേഷൻ ഒഴിവാക്കുന്നതിനായി മാനദണ്ഡങ്ങൾ പാലിക്കാതെ ഇളവു നൽകി എന്ന് കണ്ടെത്തിയതിനെ തുടർന്നാണ് ഈ നടപടി.

അടിസ്ഥാന വാക്സിനുകളെടുക്കാത്ത കുട്ടികൾക്ക് ചൈൽഡ് കെയറുകളിലും കിന്റർഗാർട്ടനുകളിലും പ്രവേശനം നൽകില്ല എന്ന നിയമം വന്നതിന് പിന്നാലെയാണ് ഈ സംഭവങ്ങൾ അരങ്ങേറിയത്.

എന്നാൽ ആരോഗ്യപരമായ കാരണങ്ങളാൽ വാക്സിനെടുക്കാത്ത കുട്ടികൾക്ക് ഈ നിയന്ത്രണം ബാധകമല്ല. ഇത്തരത്തിൽ  ഇളവ് ലഭിക്കാനായി 2017ൽ 149 കുട്ടികൾക്ക് തെറ്റായി സർട്ടിഫിക്കറ്റ് 
ജോൺ പീസെ നൽകിയതായി കണ്ടെത്തിയിട്ടുണ്ട്. വാക്സിനേഷൻ ഇളവു നൽകുന്നതിനുള്ള മാനദണ്ഡങ്ങളൊന്നും പാലിക്കാതെയാണ് ഇത്തരത്തിൽ സർട്ടിഫിക്കറ്റ് നൽകിയതെന്ന് ഓസ്ട്രേലിയൻ മെഡിക്കൽ ബോർഡും ചൂണ്ടിക്കാട്ടി.

കൂടാതെ 2015നും 2017നും ഇടയിൽ 177 മെഡികെയർ വാക്സിനേഷൻ ഫോമുകൾ ജോൺ പീസെ തെറ്റായ വിവരങ്ങൾ ഉൾപ്പെടുത്തി പൂരിപ്പിച്ചെന്നും കണ്ടെത്തിയിട്ടുണ്ട്. ഇതിലൂടെ കുടുംബങ്ങൾക്ക് അനർഹമായി സർക്കാരിൽ നിന്ന് സാമ്പത്തിക ആനുകൂല്യം ലഭിക്കുകയും ചെയ്തു.

ഇതേക്കുറിച്ച് പരാതി ലഭിച്ചപ്പോൾ, വിക്ടോറിയൻ ഡെപ്യൂട്ടി ചീഫ് ഹെൽത്ത് ഓഫീസർ ജോൺ പീസെക്ക് മുന്നറിയിപ്പ് കത്ത് അയച്ചിരുന്നു. എന്നാൽ, ഈ കത്തിലെ കുറച്ചുഭാഗം മാത്രം ഉപയോഗിച്ചുകൊണ്ട് വ്യാജമായി മറ്റൊരു കത്ത് ജോൺ പീസെ ഉണ്ടാക്കി. തനിക്ക് ഇങ്ങനെ ഇളവ് നൽകാൻ അധികാരമുണ്ടെന്ന് അവകാശപ്പെട്ട് കൊണ്ടായിരുന്നു വ്യാജ കത്ത് തയ്യാറാക്കിയത്. ഈ വ്യാജ കത്ത് ജോൺ പീസെ മെഡിക്കൽ ബോർഡിന് സമർപ്പിക്കുകയും ചെയ്തു.

മെഡിക്കൽ ബോർഡിന്റെ അന്വേഷണവുമായി സഹകരിക്കാൻ തയ്യാറാകാതിരുന്ന ഇയാൾ, വാക്സിൻ വിരുദ്ധ ഡോക്യുമെന്ററിയുടെ ഭാഗമാകുകയും, മറ്റു ഡോക്ടർമാരോടും ഇതേ രീതി പിന്തുടരാൻ പ്രോത്സാഹിപ്പിക്കുകയും ചെയ്തു. ജോൺ പീസെക്ക് എതിരെയുള്ള ഈ ആരോപണങ്ങൾ ശരിയാണെന്ന് അന്വേഷണത്തിൽ കണ്ടെത്തി.

ഇത് ചരിത്രം; NSW പോലീസ് കമ്മീഷണറായി ചുമതലയേറ്റ് കാരൻ വെബ്

Metrom Australia Feb. 1, 2022 GOVERNMENT

സിഡ്‌നി: ന്യൂ സൗത്ത് വെയില്‍സ് പോലീസ് സേനയുടെ 23-ാമത് പോലീസ് കമ്മീഷണറായി കാരന്‍ വെബ് (Karen Webb) ചുമതലയേറ്റു. സംസ്ഥാന ചരിത്രത്തിൽ ആദ്യമായാണ് ഒരു വനിത പോലീസ് കമ്മീഷണറായി ചുമതലയേറ്റിരിക്കുന്നത്. 

കാരന്‍ ജനിച്ച് വളര്‍ന്നത് ഉള്‍നാടന്‍ പ്രദേശമായ ബൂറോവയിലാണ്. അതേസമയം Boorowa Central School NSW DECയുടെ മൈതാനത്തായിരുന്നു കാരന്‍ പോലീസ് കമ്മീഷണറായി സത്യപ്രതിജ്ഞ ചെയ്തതും. ഇവര്‍ 30 വര്‍ഷത്തിലേറെയായി NSW പോലീസ് സേനയില്‍ സേവനം അനുഷ്ടിക്കുന്നുണ്ട്.

RAT കിറ്റുകൾ അമിത വിലയ്ക്ക്; 4,000 പരാതികൾ ലഭിച്ചെന്ന് ACCC

Metrom Australia Feb. 1, 2022 GOVERNMENT , BUSINESS

റാപിഡ് ആന്റിജൻ പരിശോധന കിറ്റുകൾ അമിത വിലയ്ക്ക് വിൽക്കുന്നതായി കാണിച്ച് 4,000ത്തിലധികം പരാതികൾ ലഭിച്ചതായി ഓസ്‌ട്രേലിയൻ കോമ്പറ്റിഷൻ ആൻഡ് കൺസ്യൂമർ കമ്മീഷൻ അറിയിച്ചു. ശരാശരി 121 പരാതികളാണ് പ്രതിദിനം ACCC ക്ക് ലഭിക്കുന്നത്. പരാതിക്ക് പിന്നാലെ ഉപഭോക്തൃ നിയമ ലംഘനം നടന്നിട്ടുണ്ടോ എന്ന് പരിശോധിക്കുന്നതിനായി ACCC അന്വേഷണം തുടങ്ങി.  

2021 ഡിസംബർ 25 മുതൽ 2022 ജനുവരി 26 വരെയുള്ള കാലയളവിൽ ലഭിച്ച പരാതികളിൽ 34 ശതമാനവും (1,309 പരാതികൾ)  ഫാർമസികളുമായി ബന്ധപ്പെട്ടവയാണ്. ഇതിന് ശേഷം ഏറ്റവും കൂടുതൽ പരാതികൾ വന്നത് പെട്രോൾ സ്റ്റേഷനുകളുമായി ബന്ധപ്പെട്ടവയാണ്. അത് 781 എണ്ണമാണ് (20 ശതമാനം). പിന്നെ 764 എണ്ണം കൺവീനിയൻസ് സ്റ്റോറുകളിൽ നിന്നുമാണ്. പുകയില വ്യാപാരികൾ, സൂപ്പർമാർക്കറ്റുകൾ എന്നിവയിൽ നിന്ന് 20 ശതമാനമാണ്. അതേസമയം അമിത വില ഈടാക്കുന്ന സ്റ്റോറുകളുടെ വിവരങ്ങൾ പൊലീസിന് കൈമാറുന്നതായി ACCC വ്യക്തമാക്കിയിട്ടുണ്ട്.

ഉപഭോക്താക്കളിൽ നിന്നുള്ള വിവരങ്ങൾ പ്രകാരം ഫാർമസികളിൽ പരിശോധന കിറ്റുകളുടെ ശരാശരി വില  $21 ആണെന്ന് ACCC പറഞ്ഞു. മിക്ക ഫാർമസികളിലും കിറ്റുകളുടെ വില $15 മുതൽ $25 വരെയാണ് എന്നാണ് ACCC ക്ക് ലഭിച്ചിരിക്കുന്ന വിവരങ്ങൾ. എന്നാൽ ഇതിലും വളരെ കൂടുതൽ വില ഈടാക്കുന്ന സ്റ്റോറുകൾ ഉള്ളതായി ACCC ചൂണ്ടിക്കാട്ടി. ചില സ്റ്റോറുകളിൽ ഒരു പരിശോധന കിറ്റിനായി 30 ഡോളറോ അതിൽ കൂടുതലോ ഈടാക്കുന്നതായി പരാതികൾ ലഭിച്ചിട്ടുണ്ട്. 

കൂടാതെ അനധികൃതമായുള്ള RAT കിറ്റുകളുടെ വിൽപ്പനയും പാക്കറ്റ് വിഭജനവും സംബന്ധിച്ച് വിവരങ്ങൾ ACCC ക്ക് ലഭിച്ചിട്ടുണ്ട്. ഇത്തരം സ്റ്റോറുകളുടെ വിവരങ്ങൾ ഓസ്‌ട്രേലിയൻ ഫെഡറൽ പോലീസിനെയും തെറപ്പ്യൂട്ടിക് ഗുഡ്‌സ് അഡ്മിനിസ്‌ട്രേഷനെയും അറിയിച്ചിട്ടുണ്ട്. വിപണിയിൽ സംഭവിക്കുന്ന കാര്യങ്ങൾ അധികൃതർക്ക് കൈമാറിയ ഉപഭോക്താക്കൾക്ക് ACCC ചെയർ റോഡ് സിംസ് നന്ദി അറിയിച്ചു.

ചൈനീസ് പുതുവർഷാഘോഷത്തിൻ്റെ ഭാഗമായി ഓസ്ട്രേലിയൻ തപാൽ വകുപ്പ് സ്റ്റാമ്പ് പുറത്തിറക്കി

Metrom Australia Feb. 1, 2022 GOVERNMENT

ചൈനീസ് പുതുവർഷാഘോഷങ്ങളുടെ ഭാഗമാകാൻ ഓസ്ട്രേലിയൻ തപാൽ വകുപ്പ് പുതിയ സ്റ്റാമ്പ് പുറത്തിറക്കി. ഓരോ ചാന്ദ്രപുതുവർഷത്തിലും ഓസ്ട്രേലിയൻ തപാൽ വകുപ്പ് സ്റ്റാമ്പുകൾ പുറത്തിറക്കാറുണ്ട്. ഇത്തവണ സൗഭാഗ്യത്തിന്റെ കടുവ അഥവാ ലക്കി ടൈഗർ ചിത്രങ്ങൾ ആലേഖനം ചെയ്താണ് സ്റ്റാമ്പ് പുറത്തിറക്കിയത്. സിഡ്നിയിലെ ക്രിസ്സി ലാവു തയ്യാറാക്കിയ സൗഭാഗ്യ കടുവയുടെ ചിത്രങ്ങളാണ് ഈ സ്റ്റാമ്പിലുള്ളത്.

മൂന്നു സ്റ്റാമ്പുകളാണ് തപാൽവകുപ്പ് പുറത്തിറക്കിയത്. 1.10 ഡോളറിന്റെ സ്റ്റാമ്പിൽ ചുവന്ന പൂക്കുലയും പിടിച്ചിരിക്കുന്ന കടുവയാണ് ഉള്ളത്. ചൈനീസ് വിശ്വാസപ്രകാരം പ്രതീക്ഷയയെയും നിയന്ത്രണത്തെയുമാണ് ഇത് കുറിക്കുന്നത്.

2.20 ഡോളറിന്റെ സ്റ്റാമ്പിൽ ചൈനീസ് കഥാപാത്രമായ “ഫു”വിനെ കൈയിലേന്തിയ കടുവയാണ്. ഫു എന്നാൽ ഭാഗ്യം എന്നാണ് അർത്ഥം. ഒപ്പം മറുകൈയിൽ പടക്കങ്ങളുമുണ്ട്. ദുഷ്ടശക്തികളെ അകറ്റാനാണ് ഇത് എന്നാണ് വിശ്വാസം.

3.30 ഡോളറിന്റെ സ്റ്റാമ്പിൽ രണ്ടു കടുവകളാണ്. ഒരു കൈയിൽ ദീർഘായുസിന്റെ പ്രതീകമായ നിഗൂഢമായ കെട്ട് അഥവാ Chinese Knotഉം, മറുകൈയിൽ ഒരു ഓറഞ്ചുകുലയുമുണ്ട്. സമ്പത്തിന്റെ പ്രതീകമായ ഓറഞ്ചിന് ചൈനീസ് സംസ്കാരത്തിൽ ഏറെ പ്രാധാന്യമുണ്ട്. ചൈനീസ് സംസ്കാരവുമായി കാര്യമായി ബന്ധമൊന്നുമില്ലാത്ത പിങ്ക് നിറമാണ് ഇതിന്റെ പിന്നിലുള്ളത്. വലന്റൈൻസ് ദിനം കൂടി വരുന്നതിനാൽ പ്രണയത്തെക്കുറിക്കാനാണ് പിങ്ക് നൽകിയത്.

ഇത് രണ്ടാം തവണയാണ് ക്രിസ്സി ലാവുവിന്റെ ചിത്രങ്ങൾ തപാൽവകുപ്പ് സ്റ്റാമ്പിനായി തെരഞ്ഞെടുക്കുന്നത്. അതേസമയം ചൈനീസ്, ജാപ്പനീസ് സംസ്കാരങ്ങളിൽ പൊതുവിൽ കാണുന്ന ലക്കി ക്യാറ്റ്, അഥവാ “ഭാഗ്യപൂച്ച”കളുടെ മാതൃകയിലാണ് ഈ കടുവയുടെ ചിത്രവും തയ്യാറാക്കിയിട്ടുള്ളത്. ഏഷ്യൻ വിശ്വാസ പ്രകാരം, സമ്പത്ത് ക്ഷണിച്ചുവരുത്താൻ കഴിയുന്നതാണ് ഭാഗ്യപ്പൂച്ചകൾ.

ക്വീൻസ്ലാൻ്റിൽ പ്രായമായവർ ജനക്കൂട്ടങ്ങൾ ഒഴിവാക്കാന്‍ നിര്‍ദേശം

Metrom Australia Jan. 26, 2022 GOVERNMENT

പ്രായമായവർ തിരക്കേറിയ സ്ഥലങ്ങൾ ഒഴിവാക്കാൻ ക്വീൻസ്‌ലാൻറ് സർക്കാരിൻ്റെ നിർദ്ദേശം. അടുത്ത രണ്ടാഴ്ചത്തേക്ക് യാത്രകൾ പരിമിതപ്പെടുത്താനും വലിയ ജനക്കൂട്ടങ്ങൾ ഒഴിവാക്കാനുമാണ് പ്രീമിയർ അനസ്‌റ്റേഷ്യ പലാഷെ നിർദേശിച്ചത്. പ്രതിദിന കോവിഡ് കേസുകൾ നിരക്ക് 13,551ലെത്തിയതോടെയാണ് പ്രീമിയറുടെ അഭ്യർത്ഥന. സംസ്ഥാനത്ത് ഒമ്പത് കോവിഡ് മരണങ്ങളും റിപ്പോർട്ട് ചെയ്തിട്ടുണ്ട്.

അതേസമയം, ക്വീൻസ്ലാൻറിലെ ആശുപത്രികളിലുള്ള കൊവിഡ് രോഗികളുടെ എണ്ണത്തിൽ കുറവ് രേഖപ്പെടുത്തി. ചൊവ്വാഴ്ച 928 ആയിരുന്ന ആശുപത്രി കേസുകളുടെ എണ്ണം 889 ആയി കുറഞ്ഞെന്നാണ് കണക്കുകൾ.