ബൂസ്റ്റർ ഡോസ് ഈ വർഷം വിതരണം ചെയ്യാനാകുമെന്ന് പ്രതീക്ഷ പ്രകടിപ്പിച്ച് ഓസ്ട്രേലിയൻ ആരോഗ്യ മന്ത്രി

Metrom Australia Oct. 20, 2021

ഓസ്ട്രേലിയയിൽ ഈ വർഷം അവസാനം കോവിഡ് വാക്സിന്റെ ബൂസ്റ്റർ ഡോസ് നൽകി തുടങ്ങാനാകുമെന്ന് ആരോഗ്യ മന്ത്രി ഗ്രെഗ് ഹണ്ട് അറിയിച്ചു. ബൂസ്റ്റർ ഡോസ് സംബന്ധിച്ചുള്ള നിർണ്ണായക ചർച്ച തിങ്കളാഴ്ച ഉണ്ടാകുമെന്നും അദ്ദേഹം കാൻബറയിൽ മാധ്യമ പ്രവർത്തകരോട് പറഞ്ഞു. കൂടുതൽ പരിരക്ഷ ഉറപ്പാക്കുന്നതിനുള്ള നടപടികൾ സ്വീകരിക്കാൻ സർക്കാർ സജ്ജമാണെന്നും അദ്ദേഹം കൂട്ടിച്ചേർത്തു. TGA ഉം ATAGI ഉം ഇത് സംബന്ധിച്ച് സർക്കാരിന് നിർദ്ദേശം നൽകാനിരിക്കുകയാണ്.

നവംബറിലെ രണ്ടാമത്തെ ആഴ്ച മുതൽ ഏജ്ഡ് കെയറിൽ വസിക്കുന്നവർക്ക് ബൂസ്റ്റർ ഡോസ് ലഭ്യമാക്കാനാകുമെന്നാണ് പ്രതീക്ഷിക്കുന്നത്. ആരോഗ്യ അധികൃതരുടെ അനുമതി മാത്രമാണ് ബാക്കിയുള്ളതെന്ന് അദ്ദേഹം വ്യക്തമാക്കി. പ്രായമേറിയവർക്കും ഏജ്ഡ് കെയറിൽ വസിക്കുന്നവർക്കും ആയിരിക്കും ബൂസ്റ്റർ ഡോസ് ആദ്യം നൽകുകയെന്ന് ചീഫ് ഹെൽത് ഓഫീസർ പോൾ കെല്ലിയും പറഞ്ഞു. ഈ വിഭാഗത്തിലുള്ളവർ രണ്ടാം ഡോസ് സ്വീകരിച്ചിട്ട് ആറു മാസം പിന്നിട്ടുണ്ടാവണം.

അതേസമയം രാജ്യത്തെ ആരോഗ്യ രംഗത്ത് പ്രവർത്തിക്കുന്നവർക്കും ബൂസ്റ്റർ ഡോസ് അനുവദിക്കണമെന്ന് ഓസ്‌ട്രേലിയൻ മെഡിക്കൽ അസോസിയേഷൻ വിക്ടോറിയ ചാപ്റ്റർ പ്രസിഡന്റ് റോഡറിക്ക് മക്റേ ആവശ്യപ്പെട്ടു. ലോക്ക്ഡൗൺ ഉൾപ്പെടെ കർശന നിയന്ത്രണങ്ങൾ പിൻവലിക്കാൻ തീരുമാനിച്ച സാഹചര്യത്തിൽ ആരോഗ്യ രംഗത്തുള്ളവരുടെ സുരക്ഷ ഉറപ്പാക്കണമെന്നാണ് അദ്ദേഹത്തിന്റെ ആവശ്യം. എന്നാൽ പ്രതിരോധ ശേഷി കുറവുള്ള വിഭാഗങ്ങൾക്ക് ബൂസ്റ്റർ ഡോസിന് മുൻഗണന നൽകണമെന്നാണ് ഇൻഫെക്ഷ്യസ് ഡിസീസ് വിദഗ്ദ്ധൻ റോബർട്ട് ബൂയിയുടെ നിർദ്ദേശം. അതിനിടയിൽ രാജ്യത്തെ 16 വയസിന് മേൽ പ്രായമുള്ളവരുടെ വാക്‌സിനേഷൻ നിരക്ക് 70 ശതമാനം പിന്നിട്ടു. എന്നാൽ ആദിമവർഗ സമൂഹത്തിലെ വാക്‌സിനേഷൻ നിരക്ക് കുറഞ്ഞ നിലയിൽ തുടരുന്നതിൽ ആരോഗ്യ മന്ത്രി ആശങ്ക പ്രകടിപ്പിച്ചു.

ലോകത്ത് ഏറ്റവും പവര്‍ഫുള്‍ പാസ്പോര്‍ട്ട് ജപ്പാന്റെയും സിംഗപ്പൂരിന്റെയും

Metrom Australia Oct. 20, 2021

ലോകരാജ്യങ്ങളുടെ പാസ്പോര്‍ട്ടുകളെ അവയുടെ പവര്‍ അനുസരിച്ച് റാങ്ക് ചെയ്യുന്ന ഹെൻലി പാസ്‌പോർട്ട് സൂചികയിൽ ജപ്പാനും സിംഗപ്പൂരും ഏറ്റവും മുന്നിൽ. ഈ വർഷത്തെ പട്ടിക അനുസരിച്ച് ഓസ്ട്രേലിയ 8-ാം സ്ഥാനത്തും ഇന്ത്യ 90-ാം സ്ഥാനത്തുമാണ്. ഈ പട്ടിക അനുസരിച്ച് ഇന്ത്യൻ പാസ്‌പോർട്ട് ഉടമകൾക്ക് 58 രാജ്യങ്ങളിലേക്ക് വീസ രഹിത യാത്ര അനുവദനീയമാണ്. കഴിഞ്ഞ വര്‍ഷത്തെ അപേക്ഷിച്ച് എട്ടു റാങ്കുകള്‍ പിന്നിലാണ് ഇത്തവണ ഇന്ത്യ. കഴിഞ്ഞ വര്‍ഷം 59 രാജ്യങ്ങളില്‍ വീസ ഫ്രീ സന്ദര്‍ശനവുമായി ഇന്ത്യയുടെ സ്ഥാനം 82 ആയിരുന്നു.

വീസയില്ലാതെ പാസ്പോര്‍ട്ട് മാത്രമോ വീസ ഓണ്‍ അറൈവല്‍ സൗകര്യമോ ഉപയോഗിച്ച് സന്ദര്‍ശിക്കാവുന്ന രാജ്യങ്ങളുടെ എണ്ണം നോക്കി റാങ്കിങ് നല്‍കുന്ന സൂചികയാണ് ഹെൻലി പാസ്‌പോർട്ട് സൂചിക. ജപ്പാൻ/സിംഗപ്പൂർ പാസ്‌പോർട്ട് ഉള്ളവർക്ക് 192 രാജ്യങ്ങളിലേക്ക് വീസയില്ലാതെ യാത്ര ചെയ്യാം. ദക്ഷിണ കൊറിയയും ജർമനിയുമാണ് രണ്ടാം സ്ഥാനത്ത്, ഇവിടങ്ങളില്‍ നിന്നുള്ള പാസ്പോര്‍ട്ട് ഉടമകൾക്ക് 190 രാജ്യങ്ങളില്‍ വീസയില്ലാതെ യാത്ര ചെയ്യാം. ഫിൻലൻഡ്, ഇറ്റലി, ലക്സംബർഗ്, സ്പെയിൻ എന്നിവയാണ് മൂന്നാം സ്ഥാനത്ത്. യൂറോപ്യൻ യൂണിയൻ രാജ്യങ്ങൾ പതിവുപോലെ ആദ്യ സ്ഥാനങ്ങളില്‍ത്തന്നെ തുടര്‍ന്നു. ഓസ്ട്രിയയും ഡെൻമാർക്കും നാലാം സ്ഥാനത്തും ഫ്രാൻസ്, അയർലൻഡ്, നെതർലൻഡ്സ്, പോർച്ചുഗൽ, സ്വീഡൻ എന്നിവ അഞ്ചാം സ്ഥാനത്തുമാണ്.

റിപ്പോര്‍ട്ടില്‍ ഏറ്റവും താഴെയുള്ളത് അഫ്ഗാനിസ്ഥാനാണ്, അഫ്ഗാൻ പാസ്പോർട്ട് ഉപയോഗിച്ച് വെറും 26 രാജ്യങ്ങളിലേക്ക് മാത്രമേ വീസ രഹിത യാത്ര സാധ്യമാകൂ. ഉത്തര കൊറിയ, നേപ്പാൾ, പലസ്തീൻ പ്രദേശങ്ങൾ, സൊമാലിയ, ഇറാഖ്, സിറിയ, പാക്കിസ്ഥാൻ, യെമൻ എന്നിവിടങ്ങളിൽ നിന്നുള്ള പാസ്‌പോർട്ടുകളാണ് സൂചികയുടെ ഏറ്റവും താഴെയുള്ളവ.

വിഎസ് അച്യുതാനന്ദന് ഇന്ന് 98-ാം ജന്മദിനം

Metrom Australia Oct. 20, 2021

തിരുവനന്തപുരം: മുന്‍ മുഖ്യമന്ത്രി വിഎസ് അച്യുതാനന്ദന് ഇന്ന് 98 വയസ്സ്. പൊതു രാഷ്ട്രീയ രംഗത്ത് നിന്നും  അവധി എടുത്ത വിഎസ്, രണ്ടു വർഷമായി തിരുവനന്തപുരത്തെ 'വേലിക്കകത്ത്' വീട്ടില്‍ തന്നെ വിശ്രമ ജീവിതത്തിലാണ്.  

2019 ഒക്ടോബറില്‍ നടന്ന പുന്നപ്ര വയലാര്‍ രക്തസാക്ഷിത്വ ദിനാചരണത്തിനുശേഷം തിരുവനന്തപുരത്ത് മടങ്ങിയെത്തിയ വിഎസ് ആശുപത്രിയില്‍ പ്രവേശിപ്പിക്കപ്പെട്ടു. തുടര്‍ന്ന് അദ്ദേഹത്തിന് പൂര്‍ണ്ണ വിശ്രമം ഡോക്ടര്‍മാര്‍ നിര്‍ദേശിച്ചു. കഴിഞ്ഞ എല്‍ഡിഎഫ് ഗവണ്‍മെന്‍റിന്‍റെ കാലത്ത് ഭരണപരിഷ്കാര കമ്മീഷന്‍ അധ്യക്ഷനായിരുന്ന വിഎസ് 2021 ജനുവരിയില്‍ സ്ഥാനം ഒഴിഞ്ഞു.

ഓസ്ട്രേലിയൻ സാമ്പത്തിക രംഗം വേഗത്തിൽ വളരുന്നുവെന്ന് ഐഎംഎഫ്

Metrom Australia Oct. 20, 2021

കോവിഡ് പ്രതിസന്ധിക്കിടെ ഏഷ്യ-പസിഫിക് മേഖലയുടെ സാമ്പത്തിക വളർച്ചയിൽ ഇടിവ് ഉണ്ടാകുമെന്ന് ഇന്റർനാഷണൽ മോണിറ്ററി ഫണ്ടിന്റെ (IMF) പ്രവചനം. ഈ വർഷം ഏഷ്യ-പസിഫിക് മേഖലയുടെ സാമ്പത്തിക വളർച്ചയിൽ 1.1 ശതമാനത്തിന്റെ ഇടിവാണ് ഐഎംഎഫിന്റെ റിപ്പോർട്ടിൽ പ്രവചിക്കുന്നത്. എന്നാൽ ഈ മേഖലയിൽ 6.5 ശതമാനം വളർച്ചയുണ്ടാകാനുള്ള സാധ്യതകളും റിപ്പോർട്ട് തള്ളുന്നില്ല.

അതേസമയം ഓസ്‌ട്രേലിയ ഉൾപ്പെടുന്ന ഈ മേഖലയിലെ സാമ്പത്തിക രംഗം ഏറ്റവും വേഗത്തിൽ വളരുന്നുണ്ടെന്ന് ഐഎംഎഫ് കൂട്ടിച്ചേർത്തു. അവശ്യസാധനങ്ങളെയും ഉത്പന്നങ്ങളെയും ആശ്രയിച്ചുള്ള വളർച്ചയാണ് ഓസ്‌ട്രേലിയയെ ഇപ്പോൾ സഹായിക്കുന്നത്. രാജ്യത്തിന്റെ സാമ്പത്തിക രംഗം ഈ വർഷത്തിൽ 3.5 ശതമാനവും അടുത്ത വർഷം 4.1 ശതമാനവും വളരുമെന്നാണ് IMF ന്റെ പ്രവചനം. 2023ൽ 2.6 ശതമാനമെന്ന മിതമായ വളർച്ചയിലേക്ക് മാറുമെന്നുമാണ് നിരീക്ഷണം. എന്നാൽ വാക്‌സിനേഷൻ നിരക്ക് ഉയരുന്നതോടെ മേഖലയിലെ വളർച്ച 5.7 ലേക്ക് ഉയരുമെന്നാണ് കരുതുന്നത്.

കോവിഡ് വാക്സിൻ നിർബന്ധമെങ്കിൽ ഓസ്ട്രേലിയൻ ഓപ്പണിൽ പങ്കെടുക്കില്ലെന്ന് ദ്യോകോവിച്ച്

Metrom Australia Oct. 20, 2021

കോവിഡ് വാക്‌സിൻ നിർബന്ധമാണെങ്കിൽ അടുത്ത വർഷം നടക്കുന്ന ഓസ്ട്രേലിയൻ ഓപ്പണിൽ നിന്ന് വിട്ടുനിൽക്കുമെന്ന് ലോക ഒന്നാം നമ്പർ ടെന്നിസ് താരം നൊവാക് ദ്യോകോവിച്ച്. ഓസ്‌ട്രേലിയൻ ഓപ്പൺ നടക്കുന്ന വിക്ടോറിയ സ്‌റ്റേറ്റ് പ്രീമിയർ ഡാനിയൽ ആൻഡ്ര്യൂസ്, കളിക്കാർ വാക്‌സിനെടുക്കണമെന്ന് നിർദേശിച്ചതിനു പിന്നാലെയാണ് ദ്യോകോവിച്ചിന്റെ ഈ നിലപാട്. വാക്‌സിൻ എടുക്കാത്ത കളിക്കാർക്ക് ഓസ്‌ട്രേലിയയിലേക്കുള്ള വിസ ലഭിക്കില്ലെന്നാണ് താൻ കരുതുന്നതെന്നും, ലഭിച്ചാൽ തന്നെ രണ്ടാഴ്ച ക്വാറന്റൈനിൽ ഇരിക്കേണ്ടി വരുമെന്നും ആൻഡ്ര്യൂസ് പറഞ്ഞു. പ്രൊഫഷണൽ കളിക്കാർ ഔദ്യോഗിക ജോലിക്കാരുടെ ഗണത്തിലാണ് വരികയെന്നും അതിനാൽ ഡബിൾ ഡോസ് വാക്‌സിൻ എടുക്കേണ്ടി വരുമെന്നും അദ്ദേഹം കൂട്ടിച്ചേർത്തു.

അതേസമയം വാക്‌സിൻ എടുക്കാൻ താൽപര്യമില്ലെന്ന് സെർബിയൻ താരമായ ദ്യോകോവിച്ച് 2020 ഏപ്രിലിൽ വ്യക്തമാക്കിയിരുന്നു. കഴിഞ്ഞ വർഷം ഫേസ്ബുക്ക് ചാറ്റിനിടെയാണ് വാക്‌സിൻ വിരുദ്ധ നിലപാട് ദ്യോകോവിച്ച് വെളിപ്പെടുത്തിയത്. വ്യക്തിപരമായി താൻ വാക്‌സിനേഷന് എതിരാണ്. യാത്ര ചെയ്യുന്നതിനുള്ള അനുമതിക്കായി ആരെങ്കിലും വാക്‌സിനെടുക്കാൻ നിർബന്ധിക്കുന്നത് എനിക്കിഷ്ടവുമല്ലെന്ന് താരം പറഞ്ഞു. പക്ഷേ, അത് നിർബന്ധമാവുകയാണെങ്കിലോ? അപ്പോൾ ഒരു തീരുമാനം എടുക്കേണ്ടിവരും. ഞാൻ ഒരു തീരുമാനത്തിലെത്തേണ്ടി വരും. ഇക്കാര്യത്തിൽ എനിക്ക് എന്റേതായ ചിന്തകളുണ്ട്. ആ ചിന്തകൾ എപ്പോഴെങ്കിലും മാറുമോ എന്നറിയില്ലെന്ന് താരം വ്യക്തമാക്കി.

സെപ്തംബർ 12-ന് അവസാനിച്ച യു.എസ് ഓപ്പണിൽ കളിക്കാർക്ക് കോവിഡ് വാക്‌സിൻ നിർബന്ധമായിരുന്നില്ല. ടൂർണമെന്റിൽ ഫൈനലിലെത്തിയ ദ്യോകോവിച്ച് റഷ്യൻ താരം ദാനിൽ മെദ്‌വദിനോട് തോറ്റിരുന്നു. മുൻനിര താരങ്ങളിൽ പകുതിയോളം പേർ മാത്രമേ ഇതുവരെ വാക്‌സിനെടുത്തിട്ടുള്ളൂ.