15 താരങ്ങള്‍ക്ക് നാല് കോടി വീതം ഓഫർ ചെയ്ത് യു.എ.ഇ ടി-20

ഓസ്‌ട്രേലിയയുടെ സ്വന്തം ഫ്രാഞ്ചൈസി ലീഗായ ബിഗ് ബാഷ് ലീഗുമായി(ബി.ബി.എല്‍)  ഏറ്റുമുട്ടി യു.എ.ഇ ടി-20 ലീഗ്. നിലവില്‍ ഓസീസ് സൂപ്പര്‍ താരം ഡേവിഡ് വാര്‍ണര്‍ മാത്രമാണ് യു.എ.ഇ ടി-20യില്‍ കളിക്കാന്‍ സന്നദ്ധത അറിയിച്ചിരിക്കുന്നത്. എന്നാല്‍ വരും ദിവസങ്ങളില്‍ ഈ ലിസ്റ്റ് നീളാനാണ് സാധ്യത കല്‍പിക്കുന്നത്.

ബി.ബി.എല്ലില്‍ കളിക്കുന്നതിന് പകരം തങ്ങളുടെ ഫ്രാഞ്ചൈസി ലീഗില്‍ കളിക്കുന്നതിന് വേണ്ടി 15 ഓസീസ് താരങ്ങള്‍ക്ക് നാല് കോടി രൂപ വീതമാണ് (വരെയാണ്) യു.എ.ഇ ടി-20 ലീഗ് ഓഫര്‍ ചെയ്തിരിക്കുന്നതെന്നാണ് ദി ഏജ് റിപ്പോര്‍ട്ട് ചെയ്യുന്നത്. ബി.ബി.എല്ലിന്റെയും യു.എ.ഇ ടി-20 ലീഗിന്റെയും ഷെഡ്യൂളുകള്‍ ക്ലാഷാവാന്‍ സാധ്യതയുള്ളതിനാലാണ് ഓസീസ് താരങ്ങളെ  വിലയ്‌ക്കെടുക്കുന്നതെന്നാണ് റിപ്പോര്‍ട്ടുകള്‍.

ബി.ബി.എല്‍ ഓഫര്‍ ചെയ്യുന്ന പണത്തേക്കാള്‍ എത്രയോ അധികമാണ് യു.എ.ഇ ടി-20 ലീഗ് താരങ്ങള്‍ക്ക് പ്രതിഫലമായി നല്‍കുന്നത്. ഇത് വല്ലാത്തൊരു പ്രതിസന്ധിയിലേക്കാണ് ഓസ്‌ട്രേലിയന്‍ ക്രിക്കറ്റ് ബോര്‍ഡിനെ പ്രതിസന്ധിയിലാക്കുന്നതെന്നാണ് റിപ്പോർട്ട്. ക്രിസ് ലിന്നും യു.എ.ഇയില്‍ കളിക്കണമെന്ന് പറഞ്ഞിരുന്നു. എന്നാല്‍ താരം നിലവില്‍ അഡ്‌ലെയ്ഡ് സ്‌ട്രൈക്കേഴ്‌സുമായി ചര്‍ച്ചയിലാണ്.

'വുമൻ വിത്ത് എ മൂവീ ക്യാമറ' മെൽബൺ ചലച്ചിത്രമേളയിൽ പ്രദർശിപ്പിക്കും

മലയാള ചലച്ചിത്രം 'വുമൻ വിത്ത് എ മൂവി ക്യാമറ' ഇന്ത്യന്‍ ഫിലിം ഫെസ്റ്റിവല്‍ ഓഫ് മെല്‍ബണിലേക്ക് തെരഞ്ഞെടുക്കപ്പെട്ടിരിക്കുകയാണ്. സിനിമയുടെ അണിയറ പ്രവർത്തകർ തന്നെയാണ് ഇക്കാര്യം സമൂഹ മാധ്യമങ്ങളിലൂടെ അറിയിച്ചത്. നവാഗത സംവിധായകൻ അടൽ കൃഷ്ണനും സുഹൃത്തുക്കളും അയ്യായിരം രൂപ ബജറ്റിൽ ഒരുക്കിയ ചിത്രമാണ് 'വുമൻ വിത്ത് എ മൂവി ക്യാമറ'.

ഒരു പെൺകുട്ടിയുടെ ജീവിതത്തിൽ കടന്നു പോകുന്ന ഒരു ദിവസം. ആ ദിവസം ഉണ്ടാകുന്ന ചില സംഭവങ്ങളും ചർച്ചകളും തുറന്നു പറച്ചിലുമൊക്കെയാണ് ചിത്രം പറയുന്നത്. ഈ ചിത്രം ഇരുപത്തിയാറാമത് അന്താരാഷ്ട്ര ചലച്ചിത്രമേളയിൽ വലിയ സ്വീകാര്യത ലഭച്ചിരുന്നു. പിന്നീട് ചിത്രം ഒട്ടാവ ഇന്ത്യൻ ഫിലിം ഫെസ്റ്റിവൽ, ഡയലോഗ് ഇന്റർനാഷണൽ ഫിലിം ഫെസ്റ്റിവൽ തുടങ്ങിയ ചലച്ചിത്രമേളകളിലും സിനിമ സ്‌ക്രീൻ ചെയ്തിരുന്നു.

അതേസമയം മെൽബണിൽ വച്ചു നടക്കുന്ന ഇന്ത്യൻ ഫിലിം ഫെസ്റ്റിവലിന് ഈ മാസം 12ന് തുടങ്ങും. ഓസ്‌ട്രേലിയൻ പ്രേക്ഷകർക്കായി ഓഗസ്റ്റ് 13 മുതൽ 30 വരെ പ്രത്യേക വെർച്വൽ പ്രോഗ്രാമിംഗും ഉണ്ടായിരിക്കും. ഈ വർഷം 23 ഭാഷകളിലായി നൂറിലധികം ചിത്രങ്ങളാണ് മേളയിൽ പ്രദർശിപ്പിക്കുന്നത്. മികച്ച ചിത്രത്തിനുള്ള പട്ടികയിൽ ഹിന്ദിയിൽ നിന്ന് രൺവീർ സിംഗ് നായകനായ '83', 'ബധായി ദോ', 'ഗംഗുഭായ് കത്തിയാവാഡി', 'സർദാർ ഉദ്ദം', 'ദി റേപ്പിസ്റ്റ്' എന്നീ ചിത്രങ്ങളും മലയാളത്തിൽ നിന്ന് 'മിന്നൽ മുരളി', 'പക' എന്നീ ചിത്രങ്ങളും തമിഴിൽ നിന്ന് 'ജയ് ഭീമും' ആണ് ഉള്ളത്.

മെൽബണിൽ വീടുകളുടെ റൂഫ് നന്നാക്കാനെന്ന പേരിൽ തട്ടിപ്പ്

മെൽബണിൽ വീടുകളുടെ റൂഫ് നന്നാക്കാൻ എന്ന വ്യാജേന തട്ടിപ് നടത്തിയവർ എന്ന് സംശയിക്കുന്നവരെ അറസ്റ്റ് ചെയ്തു. ഇത്തരത്തിൽ നാല് പേരെയാണ് പോലീസ് അറസ്റ്റ് ചെയ്തത്. ഒരു റൂഫിംഗ് കമ്പനിയിലെ ജീവനക്കാർ എന്ന് നടിച്ച് 20 ലധികം വീടുകളിലാണ് തട്ടിപ്പ് നടത്തിയത്.

വീടുകളുടെ റൂഫിന് അടിയന്തരമായി അറ്റകുറ്റപ്പണി നടത്തേണ്ടത് ആവശ്യമാണെന്ന് പറഞ്ഞ് വലിയ തുകയ്ക്ക് പണിയേറ്റെടുക്കുയായിരുന്നു. തട്ടിപ്പിന് ഇരയായവരിൽ നിന്ന് $640,000 നഷ്ടമായതായി പോലീസ് വ്യക്തമാക്കി.

പ്രതികൾ എന്ന് സംശയിക്കുന്നവർ രാജ്യംവിടാൻ ശ്രമിച്ചതായും പോലീസ് പറഞ്ഞു. ഐറിഷ് വംശജനായ ഒരാൾ സഹോദരന്റെ പാസ്സ്‌പോർട്ട് ഉപയോഗിച്ച് രാജ്യംവിടാൻ ശ്രമിക്കുന്നതിനിടയിൽ മെൽബൺ വിമാനത്താവളത്തിൽ വച്ച് പോലീസ്
പിടിയിലാവുകയായിരുന്നു. ഇയാൾ മെൽബണിലെ ക്യൂ സബർബിലുള്ള 81 വയസുള്ള വ്യക്തിയിൽ നിന്ന് $99,000 തട്ടിയെടുത്തതായും റൂഫിന്റെ പണി പൂർത്തിയാക്കാതെ വളരെ മോശം അവസ്ഥയിൽ ഉപേക്ഷിച്ചതായും പോലീസ് വിശദമാക്കി.

അതേസമയം ഈ സംഭവത്തിന് ശേഷം ജൂലൈയിൽ പോലീസ് മൂന്ന് പുരുഷന്മാരെ $540,000 ന്റെ തട്ടിപ്പുമായി ബന്ധപ്പെട്ട് അറസ്റ്റ് ചെയ്തു. ഇവരിൽ രണ്ട് പേരെ രാജ്യം വിടാൻ ശ്രമിക്കുന്നതിനിടയിൽ, ഓസ്‌ട്രേലിയൻ ബോർഡർ ഫോഴ്‌സ് മെൽബൺ വിമാനത്താവളത്തിൽ വച്ചായിരുന്നു അറസ്റ്റ് ചെയ്തത്.

മെൽബണിലെ ഓക്‌ലി സബർബിൽ നിന്ന് 35 വയസുള്ള ഒരാളെ ഇതേ തട്ടിപ്പുമായി ബന്ധപ്പെട്ട് പോലീസ് അറസ്റ്റ് ചെയ്തു. റൂഫുകളുടെ പണിയുമായി ബന്ധപ്പെട്ട് ഇവർ നൽകിയിരിക്കുന്ന ക്വട്ടേഷനുകളിലെ തുക വളരെ കൂടുതലായിരുന്നുവെന്ന് പോലീസ് ചൂണ്ടിക്കാട്ടുന്നു. പണിയേറ്റെടുത്ത ശേഷം പൂർത്തിയാക്കാത്തതിന് പുറമെ എടുത്ത പണി നിലവാരമില്ലാത്തതായിരുന്നുവെന്നും പോലീസ് വിശദമാക്കി.

ഓസീസിനും ദക്ഷിണാഫ്രിക്കക്ക് എതിരായ ടി20; മത്സരക്രമം പുറത്ത്

മുംബൈ: അടുത്ത മാസം നടക്കുന്ന ഓസ്ട്രേലിയക്കും ദക്ഷിണാഫ്രിക്കക്കുമെതിരായ ഇന്ത്യയുടെ ടി20 പരമ്പരകളുടെ വിശദമായ മത്സരക്രമം പുറത്തുവിട്ട് ബിസിസിഐ. സെപ്റ്റംബര്‍ 28ന് തിരുവനന്തപുരത്തെ ഗ്രീന്‍ഫീല്‍ഡ് സ്റ്റേഡിയത്തിലാണ് ദക്ഷിണാഫ്രിക്കക്കെതിരായ ടി20 പരമ്പരയിലെ ആദ്യ മത്സരം നടക്കുക. ഒക്ടോബര്‍ രണ്ടിന് ഗോഹട്ടിയിലാണ് രണ്ടാം ടി20 നടക്കുക. മൂന്നാം ടി20 മൂന്നിന് ഇന്‍ഡോറില്‍ ആയിരിക്കും മത്സരം. 

ടി20 ലോകകപ്പിന് തൊട്ടു മുമ്പ് ദക്ഷിണാഫ്രിക്കക്കെതിരെ മൂന്ന് ഏകദിനങ്ങളടങ്ങിയ പരമ്പരയിലും ഇന്ത്യ കളിക്കുന്നുണ്ട്. ഒക്ടോബര്‍ ആറിന് ലക്നോവിലാണ് ആദ്യ ഏകദിന, ഒമ്പതിന് രണ്ടാം ഏകദിനം റാഞ്ചിയിലും 11ന് മൂന്നാം ഏകദിനം ഡല്‍ഹിയിലും നടക്കും.

അതേസമയം സെപ്റ്റംബര്‍ 20ന് മൊഹാലിയിലാണ് ഓസ്ട്രേലിയക്കെതിരായ ടി20 പരമ്പരയിലെ ആദ്യ മത്സരം. രണ്ടാം മത്സരം സെപ്റ്റംബര്‍ 23ന് നാഗ്‌പൂരില്‍ നടക്കും. 25ന് ഹൈദരാബാദില്‍ നടക്കുന്ന മത്സരത്തോടെ ഓസീസിനെതിരായ പരമ്പര പൂര്‍ത്തിയാവും.

 

 

 

 

ഓസ്‌ട്രേലിയയില്‍ ശക്തമായ കാറ്റും മഴയും

വിക്ടോറിയ: ഓസ്‌ട്രേലിയയുടെ കിഴക്ക് പടിഞ്ഞാറന്‍ മേഖലകളില്‍ ശക്തമായ കാറ്റും മഴയിൽ ആയിരക്കണക്കിന് വീടുകള്‍ക്ക് കേടുപാട് സംഭവിച്ചു. വെസ്റ്റേൺ ഓസ്ട്രേലിയ, സൗത്ത് ഓസ്ട്രേലിയ, വിക്ടോറിയ, ന്യൂ സൗത്ത് വെയില്‍സ് എന്നിവിടങ്ങളിലാണ് കാറ്റ് ശക്തമായത്. അടുത്ത ഞായറാഴ്ച്ച വരെ രാജ്യത്ത് ഉടനീളം ശക്തമായ മഴയ്ക്കും കൊടുങ്കാറ്റിനും സാധ്യതയുള്ളതിനാല്‍ ജനങ്ങള്‍ ജാഗ്രത പാലിക്കണമെന്ന് ബ്യൂറോ ഓഫ് മെറ്റീരിയോളജി ജാഗ്രതാ മുന്നറിയിപ്പ് നല്‍കി.

അതേസമയം മരങ്ങള്‍ കടപുഴകി വീണ് വൈദ്യുതി വിതരണ ശൃംഖല തകരാറിലായി. വിക്ടോറിയയില്‍ എമറാള്‍ഡ്, പകെന്‍ഹാം എന്നിവടങ്ങളില്‍ ഏകദേശം 17,000 വീടുകളില്‍ വൈദ്യുതിയില്ല. രാജ്യത്തിന്റെ പടിഞ്ഞാറ് ഭാഗത്തും ഇത് തന്നെയാണ് അവസ്ഥ. ഇത് പെര്‍ത്ത് വിമാനത്താവളത്തിന്റെ പ്രവര്‍ത്തങ്ങളെ വരെ ബാധിച്ചു. വിമാനങ്ങള്‍ വൈകുന്നതും സര്‍വീസുകള്‍ റദ്ദാക്കേണ്ട സാഹചര്യവും ഉണ്ടായി. വിമാനമിറങ്ങിവന്ന യാത്രക്കാര്‍ തങ്ങളുടെ ലെഗേജ് കണ്ടെത്താന്‍ മൊബൈല്‍ ഫോണിലെ ലൈറ്റുകള്‍ ഉപയോഗിക്കേണ്ട സാഹചര്യമായിരുന്നു.

ഓസ്‌ട്രേലിയയുടെ തെക്ക് പടിഞ്ഞാറന്‍ മേഖലകളില്‍ മണിക്കൂറില്‍ നൂറ് കിലോമീറ്ററിന് മുകളിലാണ് കാറ്റ് വീശുന്നത്. കിഴക്കന്‍ മലനിരകളിലും കാറ്റ് ശക്തമാണ്. ആല്‍പൈന്‍ പ്രദേശങ്ങളില്‍ ഹിമപാതത്തിന് സാധ്യതയുണ്ടെന്ന് അധികൃതർ മുന്നറിയിപ്പ് നൽകുന്നു.

സൗത്ത് ഓസ്ട്രേലിയയില്‍ കേപ് വില്ലോബി, നെപ്ട്യൂണ്‍ ഐലന്‍ഡ്, ക്ലീവ്, സെഡൂണ എന്നിവിടങ്ങളിലും ശക്തമായ കാറ്റ് വീശി. റിപ്പോര്‍ട്ട് ചെയ്യുന്നു. തീരമേഖലകളിൽ 10 മീറ്ററോളം ഉയരത്തില്‍ തിരമാലകൾ ആഞ്ഞടിച്ച് വീടുകള്‍ക്കും ബീച്ചുകള്‍ക്കും നാശനഷ്ടം ഉണ്ടായിട്ടുണ്ട്.