ജോക്കോവിച്ച് മോണ്‍ട്രിയല്‍ എടിപി മാസ്റ്റേഴ്സ് 1000 ടൂര്‍ണമെന്റില്‍ നിന്ന് പുറത്ത്

Metrom Australia Aug. 6, 2022

വിംബിള്‍ഡണ്‍ ജേതാവായ നൊവാക് ജോക്കോവിച്ച് മോണ്‍ട്രിയല്‍ എടിപി മാസ്റ്റേഴ്സ് 1000 ടൂര്‍ണമെന്റില്‍ നിന്ന് പുറത്ത്. കോവിഡ് വാക്സിന്‍ എടുക്കാത്തതിനാല്‍ കാനഡയില്‍ പ്രവേശിക്കാന്‍ താരത്തിന് സാധിക്കാത്തതിനാല്‍ ജോക്കോവിച്ച് പിന്‍മാറിയതായി സംഘാടകര്‍ അറിയിച്ചു. 

വാക്സിനേഷന്‍ എടുക്കാത്തതിനാല്‍ ജോക്കോവിച്ചിന് നഷ്ടമാകുന്ന രണ്ടാമത്തെ വലിയ ടൂര്‍ണമെന്റാണിത്. നേരത്തെ കോവിഡ് വാക്സിന്‍ എടുക്കാത്തതെ തുടര്‍ന്ന് ജോക്കോവിച്ചിന് ജനുവരിയില്‍ നടന്ന ഓസ്ട്രേലിയന്‍ ഓപ്പണ്‍ നഷ്ടപ്പെട്ടിരുന്നു. വരാനിരിക്കുന്ന ടൂര്‍ണമെന്റുകളില്‍ സമാനമായ നടപടികള്‍ ഉണ്ടാകാമെന്നാണ് പ്രതീക്ഷിക്കപ്പെടുന്നത്.

ജസ്റ്റിസ് യു.യു ലളിതിനെ ഇന്ത്യയുടെ അടുത്ത ചീഫ് ജസ്റ്റിസ് സ്ഥാനത്തേക്ക് ശുപാർശ

Metrom Australia Aug. 5, 2022

ന്യൂഡല്‍ഹി: സുപ്രീം കോടതിയുടെ അടുത്ത ചീഫ് ജസ്റ്റിസ് സ്ഥാനത്തേക്ക് ഉദയ് ഉമേഷ് ലളിത് എന്ന യു.യു ലളിതിനെ ശുപാര്‍ശ ചെയ്തു. ചീഫ് ജസ്റ്റിസ് എന്‍.വി. രമണയാണ് ശുപാർശ ചെയ്തത്. ശുപാര്‍ശക്കത്ത് ചീഫ് ജസ്റ്റിസ് ലളിതിന് കൈമാറിയെന്നാണ് റിപ്പോര്‍ട്ട്.

നടപടി ക്രമങ്ങള്‍ പൂര്‍ത്തിയായാല്‍ ആഗസ്റ്റ് 27ന് ജുഡീഷ്യറി തലവനായി ലളിത് നിയമിതനാകും. സുപ്രീം കോടതി ജഡ്ജിയായി ബാറില്‍നിന്ന് നേരിട്ടു നിയമിതനായ ജസ്റ്റിസ് എസ്.എം. സിക്രി കഴിഞ്ഞാല്‍ രണ്ടാമത്തെ ചീഫ് ജസ്റ്റിസാകും ലളിത്. മൂന്ന് മാസമായിരിക്കും ലളിതിന് ചീഫ് ജസ്റ്റിസ് സ്ഥാനത്തെ കാലാവധി. 2022 നവംബര്‍ എട്ടിന് അദ്ദേഹം വിരമിക്കും.

ജസ്റ്റിസ് ലളിത് 1957ലാണ് ജനിച്ചത്. അദ്ദേഹം 1983 ല്‍ ബോംബെ ഹൈക്കോടതിയിലാണ് അഭിഭാഷകനായി എന്റോള്‍ ചെയ്തത്. 2014 ല്‍ സുപ്രീം കോടതി ജഡ്ജിയായി നിയമിക്കപ്പെടുന്നതിന് മുന്‍പ്, 2ജി കേസിന്റെ വിചാരണയില്‍ സി.ബി.ഐയുടെ സ്പെഷല്‍ പബ്ലിക്ക് പ്രോസിക്യൂട്ടറായി ഹാജരായിട്ടുണ്ട്.
‘മുത്തലാഖ്’ വഴിയുള്ള വിവാഹമോചനം നിയമവിരുദ്ധമാണെന്ന് വിധിച്ച ബെഞ്ചിലെ അംഗമാണ് യു.യു ലളിത്. 

അതേസമയം ആഗസ്റ്റ് 26നാണ് ചീഫ് ജസ്റ്റിസ് എന്‍.വി രമണ ചീഫ് ജസ്റ്റിസ് സ്ഥാനത്തുനിന്നും വിരമിക്കുക. ഇതിന്റെ പശ്ചാത്തലത്തിലാണ് പുതിയ ചീഫ് ജസ്റ്റിസിനെ ശുപാര്‍ശ ചെയ്തിരിക്കുന്നത്.

ഇന്ത്യൻ IT രംഗവും NSW ഉം തമ്മിൽ പദ്ധതികൾക്ക് ധാരണയായി

Metrom Australia Aug. 5, 2022

ഇന്ത്യൻ IT രംഗവും ന്യൂ സൗത്ത് വെയിൽസും തമ്മിൽ കൂടുതൽ പദ്ധതികളിൽ സഹകരണം പ്രഖ്യാപിച്ചു. ന്യൂ സൗത്ത് വെയിൽസ് പ്രീമിയർ ഡോമിനിക് പെറോറ്റെയാണ്  ഇക്കാര്യം അറിയിച്ചത്. പ്രീമിയറിന്റെ ബെംഗളൂരു സന്ദർശനത്തിലാണ് കൂടുതൽ സഹകരണത്തിന് ധാരണയായത്.

പ്രീമിയർ ഡോമിനിക് പെറോറ്റെ, എന്റർപ്രൈസ്, നിക്ഷേപം, വ്യാപാര മന്ത്രി സ്ഥാനം വഹിച്ചിരുന്ന സ്റ്റുവർട്ട് അയേഴ്‌സ് തുടങ്ങിയവർ ഉൾപ്പെട്ട ഓസ്‌ട്രേലിയൻ സംഘം ഇന്ത്യൻ IT കമ്പനികളുമായി ജൂലൈ അവസാനം ബെംഗളൂരുവിൽ കൂടികാഴ്ച നടത്തിയിരുന്നു. ഇന്ത്യ സന്ദർശനത്തിനോട് അനുബന്ധിച്ച് ഇതിനോടകം നാല് പദ്ധതികൾക്ക് ധാരണയായതായി പ്രീമിയർ അറിയിച്ചു.

ഇന്ത്യ ആസ്ഥാനമായുള്ള എച്ച്സിഎൽ ടെക്നോളജീസ് (HCL Technologies) സിഡ്നി ക്വാണ്ടം അക്കാദമിയുമായി (Sydney Quantum Academy) ധാരണാപത്രം ഒപ്പുവച്ചു. സിഡ്‌നി ക്വാണ്ടം അക്കാദമിയുമായി ധാരണയുള്ള സർവകലാശാലകളിലെ ഓസ്‌ട്രേലിയിലുള്ള വിദ്യാർത്ഥികൾക്ക് ഈ പദ്ധതിവഴി ഇന്റേൺഷിപ്പിന് അവസരമുണ്ടാകും. കൂടാതെ, ഡീപ് ടെക്നോളജി വികസിപ്പിക്കുന്ന സ്റ്റാർട്ട് അപ്പുകൾക്കും, ഇടത്തരം ബിസിനസുകൾക്കും ആവശ്യമായ പിന്തുണ ഒരുക്കുക എന്ന ലക്ഷ്യത്തോടെ സിഡ്‌നി ടെക് സെൻട്രലിലെ സിക്കാഡ ഇന്നൊവേഷൻസും ബെംഗളൂരു ആസ്ഥാനമായുള്ള Mach33.aero തമ്മിൽ ധാരണയായിട്ടുണ്ട്.

ന്യൂ സൗത്ത് വെയിൽസ് സർക്കാരിന്റെ Going Global Export Programന്റെ ഭാഗമായി ബംഗളൂരു ആസ്ഥാനമായുള്ള ആശുപത്രി ശൃംഖലയായ Cloudnine ആശുപത്രികളുടെ മെറ്റേണിറ്റി പരിശീലന പദ്ധതി ടാംവർത്ത് ആസ്ഥാനമായുള്ള ബർത്ത് ബീറ്റ് എന്ന കമ്പനിയുമായി സഹകരിച്ച് നടപ്പിലാക്കാൻ ധാരണയായി. സിഡ്‌നി ആസ്ഥാനമായി പ്രവർത്തിക്കുന്ന ലൈഫ് സയൻസസ് കമ്പനിയും ഗോയിംഗ് ഗ്ലോബൽ എക്‌സ്‌പോർട്ട് പദ്ധതിയുടെ ഭാഗവുമായിട്ടുള്ള SkinDNA, ബെംഗളൂരു-ചെന്നൈ കമ്പനിയായ Kosmoderma Healthcare Private Limitedമായി മൂന്ന് മാസത്തെ ട്രയൽ നടത്തും. അതേസമയം സ്പേസ് ടെക്നോളജി, edtech, medtech, fintech തുടങ്ങിയ മേഖലകളിൽ ഇന്ത്യൻ സാങ്കേതിക കമ്പനികളുമായി കൂടുതൽ സഹകരണം ഉണ്ടാകുമെന്ന് പ്രതീക്ഷിക്കുന്നതായി സന്ദർശനത്തിന് ശേഷം പ്രീമിയർ പെറോറ്റെ പറഞ്ഞു.

ഓസ്ട്രേലിയയുടെ ആദ്യ ഹിജാബ്ധാരിയായ സെനറ്ററായി ഫാത്തിമ പേമാന്‍

Metrom Australia Aug. 5, 2022

കാന്‍ബറ: ഓസ്ട്രേലിയന്‍ പാര്‍ലമെന്റില്‍ ഹിജാബ്ധാരിയായ ആദ്യ സെനറ്ററായി  ഫാത്തിമ പേമാന്‍. ഓസ്‌ട്രേലിയന്‍ പാര്‍ലമെന്റിലേക്ക് തെരഞ്ഞെടുക്കപ്പെടുന്ന ആദ്യ അഫ്ഗാന്‍- ഓസ്‌ട്രേലിയന്‍ പൗരയും, നിലവിലെ പാര്‍ലമെന്റിലെ ഏറ്റവും പ്രായം കുറഞ്ഞ വ്യക്തിയും കൂടിയാണ് 27കാരിയായ ഫാത്തിമ പേമാന്‍. ജൂലൈ 27നായിരുന്നു ഫാത്തിമ ഓസ്‌ട്രേലിയന്‍ പാര്‍ലമെന്റില്‍ സത്യപ്രതിജ്ഞ ചെയ്തത്. 

”തലയില്‍ സ്‌കാര്‍ഫ് ധരിക്കുന്നു എന്ന് കരുതി മറ്റുള്ളവര്‍ എന്നെ ജഡ്ജ് ചെയ്യാന്‍ ഞാന്‍ ആഗ്രഹിക്കുന്നില്ല. ഞാനും അവരെപ്പോലെ ഓസ്ട്രേലിയക്കാരിയാണ്,” ബി.ബി.സിക്ക് നല്‍കിയ അഭിമുഖത്തില്‍ ഫാത്തിമ പേമാന്‍ പറഞ്ഞു. തന്റെ നേട്ടത്തിനും വിജയത്തിനും മരിച്ചുപോയ അച്ഛന് നന്ദി പറഞ്ഞുകൊണ്ടായിരുന്നു ഫാത്തിമ പേമാന്‍ പാര്‍ലമെന്റില്‍ സത്യപ്രതിജ്ഞ ചെയ്തത്. ”ഈ നേട്ടത്തില്‍ നന്ദി പറയേണ്ടത് വര്‍ഷങ്ങള്‍ക്ക് മുന്‍പ് ഒരു അഭയാര്‍ത്ഥിയായി ഈ മണ്ണില്‍ എത്തിയ എന്റെ അച്ഛനോടാണ്. അച്ഛന്റെ ത്യാഗങ്ങള്‍ മറക്കാന്‍ കഴിയാത്തവയാണ്. അദ്ദേഹത്തിന്റെ മക്കള്‍ ഇന്ന് എത്രത്തോളമെത്തിയെന്ന് കാണാന്‍ അദ്ദേഹം ഇവിടെയുണ്ടായിരുന്നെങ്കില്‍ എന്ന് ഞാന്‍ ആഗ്രഹിച്ചു പോകുകയാണ്,” സത്യപ്രതിജ്ഞകൊണ്ടുള്ള തന്റെ ആദ്യ പ്രസംഗത്തില്‍ ഫാത്തിമ പേമാന്‍ പറഞ്ഞു. 

പ്രസംഗം മുഴുവിപ്പിക്കാനാകാതെ തൊണ്ടയിടറിയ പേമാനെ സെനറ്റ് അംഗങ്ങള്‍ ആശ്വസിപ്പിക്കുകയായിരുന്നു. ‘പത്ത് വര്‍ഷങ്ങള്‍ക്ക് മുമ്പായിരുന്നെങ്കില്‍ ഈ പാര്‍ലമെന്റ് ഹിജാബ് ധരിച്ചൊരു സ്ത്രീയെ തെരഞ്ഞെടുക്കുമോ? അഫ്ഗാനില്‍ ജനിച്ചൊരു യുവതി, ഒരു അഭയാര്‍ത്ഥിയുടെ മകള്‍ ഇന്ന് ഈ ചേംബറില്‍ നില്‍ക്കുമെന്ന് ആരാണ് കരുതിയിരുന്നത്?

ഒരു ടാക്‌സി ഡ്രൈവറായും, സെക്യൂരിറ്റി ജീവനക്കാരനുമായി ജോലി ചെയ്തുകൊണ്ട് അച്ഛന്‍ അനുഭവിച്ച ത്യാഗങ്ങളെക്കുറിച്ച് എനിക്കറിയാം. കുടുംബത്തിന്റെ രണ്ടറ്റം കൂട്ടിമുട്ടിക്കാനും, തനിക്ക് ലഭിക്കാതെ പോയ നല്ലൊരു ഭാവി എനിക്കും സഹോദരങ്ങള്‍ക്കും ലഭിക്കാനുമായിരുന്നു അത്,” ഫാത്തിമ പേമാന്‍ പ്രസംഗത്തില്‍ കൂട്ടിച്ചേര്‍ത്തു.

അഫ്ഗാനിസ്ഥാനില്‍ നിന്നുള്ള അഭയാര്‍ത്ഥിയായിരുന്നു ഫാത്തിമ പേമാന്റെ പിതാവ് അബ്ദുള്‍ പേമാന്‍. 1999ല്‍ ഒരു അഭയാര്‍ത്ഥിയായി അബ്ദുൾ പേമാൻ ഓസ്ട്രേലിയയില്‍ വരുകയും ഇമിഗ്രേഷന്‍ തടങ്കലില്‍ അടയ്ക്കപ്പെടുകയും ചെയ്തിരുന്നു. പിന്നീട് എട്ട് വയസുളളപ്പോള്‍ 2003ല്‍ അമ്മക്കും മൂന്ന് സഹോദരങ്ങള്‍ക്കുമൊപ്പമാണ് ഫാത്തിമ ഓസ്ട്രേലിയയിലെത്തുന്നത്. പെര്‍ത്തിലെ ഓസ്ട്രേലിയന്‍ ഇസ്‌ലാമിക് കോളേജിലെ വിദ്യാര്‍ത്ഥിനിയായിരുന്ന പേമാന്‍ മെഡിസിനു യൂണിവേഴ്‌സിറ്റില്‍ ചേരുകയും പിന്നീട് രാഷ്ട്രീയപ്രവര്‍ത്തനത്തിലേക്ക് കടക്കുകയുമായിരുന്നു.

15 താരങ്ങള്‍ക്ക് നാല് കോടി വീതം ഓഫർ ചെയ്ത് യു.എ.ഇ ടി-20

Metrom Australia Aug. 5, 2022

ഓസ്‌ട്രേലിയയുടെ സ്വന്തം ഫ്രാഞ്ചൈസി ലീഗായ ബിഗ് ബാഷ് ലീഗുമായി(ബി.ബി.എല്‍)  ഏറ്റുമുട്ടി യു.എ.ഇ ടി-20 ലീഗ്. നിലവില്‍ ഓസീസ് സൂപ്പര്‍ താരം ഡേവിഡ് വാര്‍ണര്‍ മാത്രമാണ് യു.എ.ഇ ടി-20യില്‍ കളിക്കാന്‍ സന്നദ്ധത അറിയിച്ചിരിക്കുന്നത്. എന്നാല്‍ വരും ദിവസങ്ങളില്‍ ഈ ലിസ്റ്റ് നീളാനാണ് സാധ്യത കല്‍പിക്കുന്നത്.

ബി.ബി.എല്ലില്‍ കളിക്കുന്നതിന് പകരം തങ്ങളുടെ ഫ്രാഞ്ചൈസി ലീഗില്‍ കളിക്കുന്നതിന് വേണ്ടി 15 ഓസീസ് താരങ്ങള്‍ക്ക് നാല് കോടി രൂപ വീതമാണ് (വരെയാണ്) യു.എ.ഇ ടി-20 ലീഗ് ഓഫര്‍ ചെയ്തിരിക്കുന്നതെന്നാണ് ദി ഏജ് റിപ്പോര്‍ട്ട് ചെയ്യുന്നത്. ബി.ബി.എല്ലിന്റെയും യു.എ.ഇ ടി-20 ലീഗിന്റെയും ഷെഡ്യൂളുകള്‍ ക്ലാഷാവാന്‍ സാധ്യതയുള്ളതിനാലാണ് ഓസീസ് താരങ്ങളെ  വിലയ്‌ക്കെടുക്കുന്നതെന്നാണ് റിപ്പോര്‍ട്ടുകള്‍.

ബി.ബി.എല്‍ ഓഫര്‍ ചെയ്യുന്ന പണത്തേക്കാള്‍ എത്രയോ അധികമാണ് യു.എ.ഇ ടി-20 ലീഗ് താരങ്ങള്‍ക്ക് പ്രതിഫലമായി നല്‍കുന്നത്. ഇത് വല്ലാത്തൊരു പ്രതിസന്ധിയിലേക്കാണ് ഓസ്‌ട്രേലിയന്‍ ക്രിക്കറ്റ് ബോര്‍ഡിനെ പ്രതിസന്ധിയിലാക്കുന്നതെന്നാണ് റിപ്പോർട്ട്. ക്രിസ് ലിന്നും യു.എ.ഇയില്‍ കളിക്കണമെന്ന് പറഞ്ഞിരുന്നു. എന്നാല്‍ താരം നിലവില്‍ അഡ്‌ലെയ്ഡ് സ്‌ട്രൈക്കേഴ്‌സുമായി ചര്‍ച്ചയിലാണ്.