ഇന്ത്യന്‍ ബാറ്റര്‍ സ്‌മൃതി മന്ഥാനയ്‌ക്ക് റെക്കോര്‍ഡ്

Metrom Australia Aug. 7, 2022

ബര്‍മിംഗ്‌ഹാം: കോമണ്‍വെല്‍ത്ത് ഗെയിംസ് ക്രിക്കറ്റിലെ തീപ്പൊരി അര്‍ധ സെഞ്ചുറിയുമായി ഇന്ത്യന്‍ ബാറ്റര്‍ സ്‌മൃതി മന്ഥാനയ്‌ക്ക് റെക്കോര്‍ഡ്. വെറും 23 പന്തില്‍ അമ്പത് തികച്ച താരം രാജ്യാന്തര ടി20യില്‍ ഇന്ത്യന്‍ വനിതാ താരത്തിന്‍റെ അതിവേഗ ഫിഫ്റ്റിയുടെ തന്‍റെ തന്നെ റെക്കോര്‍ ഡാണ് തകര്‍ത്തത്. 

തകര്‍പ്പന്‍ ഫിഫ്റ്റിയോടെ രാജ്യാന്തര ടി20യില്‍ ആദ്യ ആറ് ഓവര്‍ പവര്‍പ്ലേയില്‍ കൂടുതല്‍ വ്യക്തിഗത സ്‌കോര്‍ നേടുന്ന ഇന്ത്യന്‍ താരമായി മന്ഥാന മാറി. 51 റണ്‍സാണ് ആറ് ഓവറിനിടെ മന്ഥാന പേരിനൊപ്പം ചേര്‍ത്തത്. 50 റണ്‍സ് വീതമുണ്ടായിരുന്ന രോഹിത് ശര്‍മ്മയുടെയും കെ എല്‍ രാഹുലിന്‍റേയും പേരിലായിരുന്നു മുമ്പ് ഈ റെക്കോര്‍ഡ് ഉണ്ടായിരുന്നത്.

ഒന്നാം സെമിയില്‍ ഇംഗ്ലണ്ട് വനിതകളുടെ എല്ലാ ആത്മവിശ്വാസം തല്ലിക്കെടുത്തി ബാറ്റേന്തുകയായിരുന്നു സ്‌മൃതി മന്ഥാന. അടി ആദ്യ ഓവറിലെ തുടങ്ങിയപ്പോള്‍ ആകെ 32 പന്തില്‍ 61 റണ്‍സെടുത്ത താരം വെറും 23 പന്തില്‍ ഫിഫ്റ്റിയിലെത്തി.

ജഗ്ദീപ് ധന്‍കർ ഉപരാഷ്ട്രപതി

Metrom Australia Aug. 7, 2022

ന്യൂഡല്‍ഹി: ഉപരാഷ്ട്രപതി തെരഞ്ഞെടുപ്പില്‍ വിജയം നേടി ജഗ്ദീപ് ധന്‍കര്‍. ആകെ ഉണ്ടായിരുന്ന 780 വോട്ടുകളിൽ 528 വോട്ട് നേടിയാണ് ധന്‍കര്‍ ഉപരാഷ്ട്രപതി തെരഞ്ഞെടുപ്പില്‍ വിജയിച്ചത്. പ്രതിപക്ഷത്തിന്റെ സ്ഥാനാര്‍ത്ഥിയായ മാര്‍ഗരറ്റ് ആല്‍വക്ക് 182 വോട്ടുകളാണ് ലഭിച്ചത്. 

അതേസമയം 15 വോട്ടുകള്‍ അസാധുവായി. വൈ.എസ്.ആര്‍ കോണ്‍ഗ്രസ്, ശിവസേനയിലെ ഏക്‌നാഥ് ഷിന്‍ഡേ വിഭാഗം, ബി.എസ്.പി എന്നിങ്ങനെ എന്‍.ഡി.എയുടെ പുറത്തുള്ള വോട്ടുകളും ഉറപ്പിക്കാന്‍ ധന്‍കറിനായി. ടി.ആര്‍.എസ്, ആം ആദ്മി പാര്‍ട്ടി, ജെ.എം.എം, ശിവസേനയിലെ 9 എം.പിമാര്‍ എന്നിവര്‍ മാര്‍ഗരറ്റ് ആല്‍വയ്ക്ക് പിന്തുണ പ്രഖ്യാപിച്ചിരുന്നു. അസുഖബാധിതര്‍ ആയതിനാല്‍ ബി.ജെ.പി എം.പിമാരായ സണ്ണി ഡിയോള്‍, സഞ്ജയ് ദോത്രെ എന്നിവർ വോട്ട് ചെയ്തില്ല.

തൃണമൂല്‍ കോണ്‍ഗ്രസ് തെരഞ്ഞെടുപ്പില്‍ നിന്നും വിട്ടുനിന്നു. 36 എം.പിമാരുള്ള തൃണമൂല്‍ കോണ്‍ഗ്രസിന്റെ രണ്ട് എം.പിമാര്‍ മാത്രമാണ് വോട്ട് ചെയ്തത്. 34 എം.പിമാര്‍ വോട്ടെടുപ്പില്‍ നിന്ന് വിട്ടുനിന്നു. വിമത എംപിമാരായ ശിശിര്‍ അധികാരി, ദിബേന്ദു അധികാരി എന്നിവരാണ് വോട്ട് ചെയ്തത്.

ഓസ്‌ട്രേലിയയിലെ പ്രമുഖ ബാങ്കുകളുടെ ശാഖകൾ അടച്ച് പൂട്ടുന്നു

Metrom Australia Aug. 6, 2022

മെൽബൺ: ഓസ്‌ട്രേലിയയിലെ വിവിധ ഭാഗങ്ങളിലെ പ്രമുഖ ബാങ്കുകളുടെ 37 ശാഖകൾ അടച്ച് പൂട്ടാൻ ഒരുങ്ങുന്നതായി റിപ്പോർട്ട്. വെസ്റ്റ്പാക്കാണ് ഏറ്റവും കൂടുതൽ ബ്രാഞ്ചുകൾ അടക്കുന്നത്. രാജ്യത്തിൻറെ വിവിധ ഭാഗങ്ങളിലായി 24 ശാഖകൾ വെസ്റ്റ്പാക് അടക്കുമ്പോൾ 76 തൊഴിലുകളെ ബാധിക്കുമെന്നാണ് റിപ്പോർട്ട്.

NAB വിവിധ സംസ്ഥാനങ്ങളിലായി എട്ട് ശാഖകളാണ് അടക്കും. ന്യൂ സൗത്ത് വെയിൽസിലും വിക്ടോറിയയിലുമായി കോമൺവെൽത് ബാങ്ക് അഞ്ച് ബ്രാഞ്ചുകൾ അടച്ച് പൂട്ടും. പ്രധാന ബാങ്കുകൾക്ക് പുറമെ മറ്റ് ബാങ്കുകളും ശാഖകൾ അടക്കുന്നുണ്ട്. ബാങ്ക് ഓഫ് മെൽബൺ ഏഴ് ശാഖകളും ബാങ്ക് ഓഫ് സൗത്ത് ഓസ്‌ട്രേലിയ ഒരു ശാഖ അടക്കുമെന്ന് വ്യക്തമാക്കിയിട്ടുണ്ട്.

അതേസമയം ബാങ്കുകളുടെ നടപടിയെ അപലപിക്കുന്നതായും, 182 തൊഴിലുകൾ നഷ്ടമാകുമെന്ന് കരുതുന്നതായും ഫൈനാൻസ് സെക്ടർ യൂണിയൻ മുന്നറിയിപ്പ് നൽകി. എന്നാൽ ജീവനക്കാരുടെ തൊഴിലുകൾ സംരക്ഷിക്കുവാൻ ബാങ്കുകൾ നടപടികൾ സ്വീകരിച്ചിട്ടുള്ളതായി വ്യക്തമാക്കിയിട്ടുണ്ട്. നാഷണൽ ഓസ്‌ട്രേലിയ ബാങ്ക് ശാഖകൾ അടക്കുന്നുണ്ടെങ്കിലും തൊഴിലുകൾ സംരക്ഷിക്കുമെന്ന് വ്യക്തമാക്കിയിട്ടുണ്ട്.

 

 

 

 

 

 

ഡേവിഡ് വാര്‍ണര്‍ ബി.ബി.എല്ലിലേക്ക്

Metrom Australia Aug. 6, 2022

യു.എ.ഇ ടി-20 പ്രീമിയര്‍ ലീഗില്‍ കളിക്കാനുള്ള തീരുമാനം ഓസീസ് താരം ഡേവിഡ് വാര്‍ണര്‍ ഉപേക്ഷിച്ചതായി റിപ്പോര്‍ട്ട്. ക്രിക്കറ്റ് ഓസ്‌ട്രേലിയയുമായി നടന്ന ചര്‍ച്ചകള്‍ക്ക് ശേഷമാണ് വാര്‍ണര്‍ ബി.ബി.എല്‍ കളിക്കാന്‍ സന്നദ്ധത അറിയിച്ചത്. ഇതോടെ 2013ന് ശേഷം ആദ്യമായിട്ടാണ് താരം ബി.ബി.എല്‍ കളിക്കുന്നത്.

നേരത്തെ, യു.എ.ഇ ലീഗില്‍ കളിക്കുന്നതിനായി താരം ക്രിക്കറ്റ് ഓസ്‌ട്രേലിയയോട് നോ ഒബ്ജക്ഷന്‍ സര്‍ട്ടിഫിക്കറ്റ് (എന്‍.ഒ.സി) നല്‍കാന്‍ ആവശ്യപ്പെട്ടിരുന്നു. ദല്‍ഹി ക്യാപ്പിറ്റല്‍സിന്റെ ഉടമസ്ഥതയിലുള്ള ടീമിന് വേണ്ടി കളിക്കാനായിരുന്നു വാര്‍ണറിന്റെ തീരുമാനം.

അടിയന്തരാവസ്ഥ കാലത്ത് ആര്‍എസ്എസ് മേധാവി ദേവറസ് ഇന്ദിര ഗാന്ധിക്ക് കത്ത് എഴുതി

Metrom Australia Aug. 6, 2022

അടിയന്തരാവസ്ഥാക്കാലത്ത് ജയില്‍ മോചിതനാകാന്‍ ആര്‍എസ്എസ് സര്‍ സംഘ് ചാലകായിരുന്ന മധുകര്‍ ദത്താത്രേയ ദേവറസും കത്തെഴുതിയെന്ന ആരോപണം ഉയര്‍ന്നിരിക്കുകയാണിപ്പോള്‍.അടിയന്തരാവസ്ഥാക്കാലത്ത് ദേവറസ് അന്നത്തെ പ്രധാനമന്ത്രി ഇന്ദിര ഗാന്ധിക്ക് മാപ്പെഴുതിയതായി ക്രിസ്റ്റോഫ് ജാഫ്രലോട്ടിന്റെ 'ഇന്ത്യാസ് ഫസ്റ്റ് ഡിക്ടേറ്റര്‍ഷിപ്പ്, ദ എമര്‍ജന്‍സി 1975-77' എന്ന പുസ്‌കത്തിലുണ്ടെന്ന് മാധ്യമപ്രവര്‍ത്തകന്‍ സനീഷ് ഇളയടത്ത് ചൂണ്ടിക്കാട്ടുന്നു. പുസ്തകത്തിലെ പേജ് നമ്പറും പ്രസ്തുത ഭാഗങ്ങളുടെ ചിത്രങ്ങളും മാധ്യമ പ്രവര്‍ത്തകന്‍ ഫേസ്ബുക്ക് കുറിപ്പിലൂടെ പങ്കുവെച്ചു.

മാധ്യമപ്രവര്‍ത്തകന്റെ കുറിപ്പ്:

അടിയന്തരാവസ്ഥ പ്രഖ്യാപിച്ച ഇന്ദിര ഗാന്ധിയ്ക്കും ദയനീയ സ്വരത്തില്‍ കത്തെഴുതി കാത്ത് നിന്നിട്ടുണ്ടത്രെ ആര്‍എസ്എസ്. മറ്റനേകം പ്രതിപക്ഷ സംഘടനകളുടെ നേതാക്കള്‍ക്കൊപ്പം അറസ്റ്റ് ചെയ്യപ്പെട്ട അക്കാലത്തെ ആര്‍ എസ് എസ് സര്‍സംഘചാലക് ബാലാ സാഹെബ് ദേവറസ് 1976 ആഗസ്റ്റ് 22ന് ജയിലില്‍ നിന്ന് ഇന്ദിര ഗാന്ധിക്ക് എഴുതിയ കത്ത് പുസ്തകത്തിലുണ്ട്. 

"സ്വാതന്ത്ര്യദിനത്തില്‍ താങ്കള്‍ നടത്തിയ പ്രസംഗം ആള്‍ ഇന്ത്യാ റേഡിയോ വഴി ഞാന്‍ അങ്ങേയറ്റം ശ്രദ്ധയോടെ കേട്ടു. അത് വളരെ ബാലന്‍സ് ചെയ്യപ്പെട്ടതും സന്ദര്‍ഭത്തിന് യോജിച്ചതും ആയിരുന്നു. അതുണ്ടാക്കിയ മതിപ്പ് രേഖപ്പെടുത്തുന്നു. ആര്‍എസ് എസ് ഒരിക്കലും താങ്കളുടെ സര്‍ക്കാരിന്റെ പ്രവര്‍ത്തനങ്ങള്‍ക്ക് എതിര് നിന്നിട്ടില്ല, രാജ്യത്തിന്റെ സുരക്ഷയ്‌ക്കോ ഒന്നിച്ച് നില്‍പ്പിനോ ഞങ്ങള്‍ എതിര് നിന്നിട്ടേയില്ല. ഇനിയും നില്‍ക്കില്ല, ഹിന്ദു സമൂഹത്തിന്റെ പുരോഗതി മാത്രമാണ് ഞങ്ങളുടെ ലക്ഷ്യം, അതിനായുള്ള പ്രവര്‍ത്തനങ്ങളേ ഞങ്ങള്‍ നടത്തുന്നുള്ളൂ. ഇക്കാര്യങ്ങളൊക്കെ പരിഗണിച്ച് ആര്‍എസ്എസിന് മേലുള്ള നിരോധനം നീക്കിത്തരണമെന്ന് വിനയത്തോടെ അഭ്യര്‍ഥിക്കുന്നു."

എന്നാൽ ഇന്ദിര ഗാന്ധിയുടെ ഭാഗത്ത് നിന്ന ഒരു മറുപടിയും വന്നില്ല. അപ്പോൾ നവംബര്‍ പത്താം തീയതി സര്‍സംഘചാലക് ജയിലില്‍ നിന്ന് രണ്ടാം കത്ത് എഴുതി. കത്ത് ഇങ്ങനെയാണ്:

"അഞ്ചംഗ ബെഞ്ച് താങ്കള്‍ക്കനുകൂലമായി വിധി പറഞ്ഞതില്‍ എന്റെ അഭിനന്ദനം ഞാന്‍ അറിയിക്കുന്നു. ജയിലിലുള്ള ആയിരക്കണക്കിന് ആര്‍ എസ് എസ് പ്രവര്‍ത്തകരെ മോചിപ്പിക്കണമെന്ന് ഞാന്‍ അഭ്യര്‍ഥിക്കുന്നു. ആര്‍എസ്എസിന് മേലുള്ള നിയന്ത്രണങ്ങളും ദയവ് ചെയ്ത് നീക്കൂ. അങ്ങനെയെങ്കില്‍ ലക്ഷക്കണക്കിന് ആര്‍എസ്എസ് പ്രവര്‍ത്തകരുടെ നിസ്വാര്‍ഥ സേവനം, സര്‍ക്കാരിന്റെയും മറ്റും പ്രവര്‍ത്തനങ്ങള്‍ക്ക് നല്‍കുമെന്ന് ഞാന്‍ ഉറപ്പ് തരുന്നു."

ഇതിനും ഇന്ദിര ഗാന്ധി പ്രതികരിക്കാത്തതിനെ തുടര്‍ന്ന്, തങ്ങള്‍ക്ക് വേണ്ടി ഇന്ദിരാ ഗാന്ധിയോട് ഇടപെടണമെന്നാവശ്യപ്പെട്ടിട്ട് ദേവറസ് വിനോഭാ ബാവെയ്ക്ക് കത്തയച്ചു.  അടിയന്തരാവസ്ഥാ കാലത്ത് ഇന്ദിരയുടെ പ്രോഗ്രാമിന്റെ നടത്തിപ്പുകാരായി മാറാം എന്നതാണ് ആ കത്തുകളില്‍ കൊടുക്കുന്ന ഉറപ്പ്. ജമ്മു കശ്മീര്‍, ചണ്ഡിഗഢ്, പഞ്ചാബ്, ഹരിയാന, ഡെല്‍ഹി എന്നിവിടങ്ങളുടെ ചുമതലയുണ്ടായിരുന്ന സംഘചാലകും, മുന്‍ഡെല്‍ഹി മേയറും ആയിരുന്ന ഹന്‍സ് രാജ് ഗുപ്ത തിഹാര്‍ ജയിലില്‍ നിന്ന് ഇന്ദിര ഗാന്ധിക്കെഴുതിയ കത്തും ഇതേ മാപ്പ് ഭാഷയില്‍ തന്നെ. ഇങ്ങനെ,

"കോണ്‍ഗ്രസ്സും സംഘപരിവാരവും തമ്മില്‍ പരസ്പരസഹകരണത്തിന്റേതായ പുതിയൊരു കാലം നമുക്ക് തുറക്കാനാകും, ആര്‍ എസ് എസിന് മേലുള്ള നിരോധനം ദയവ് ചെയ്ത നീക്കൂ".പുസ്തകം വായിച്ച് വരുമ്പോ ഇങ്ങനെയൊക്കെ ബഹുരസമാണ് കാര്യങ്ങള്‍. ?? ??"

പേജ് 372, 373, 374. ഇന്ത്യാസ് ഫസ്റ്റ് ഡിക്ടേറ്റര്‍ഷിപ്, ദി എമര്‍ജന്‍സി , 1975-77.
ക്രിസ്റ്റോഫ് ജാഫ്രലോട്ട്, പ്രതിനവ് അനില്.