ന്യൂസിലൻഡ് നായകൻ കെയ്‌ന്‍ വില്യംസണിന് പരിക്ക്

Metrom Australia Oct. 22, 2021

ദുബൈ: ടി20 ലോകകപ്പിലെ സൂപ്പര്‍ 12 മത്സരങ്ങള്‍ തുടങ്ങാന്‍ ഒരു ദിവസം മാത്രം ബാക്കിനില്‍ക്കേ ന്യൂസിലന്‍ഡ് നായകന്‍ കെയ്‌ന്‍ വില്യംസണിന് പരിക്ക്. ബാറ്റിംഗ് നിരയിലെ ഏറ്റവും മികച്ച താരത്തിന്‍റെയും ക്യാപ്റ്റന്‍റേയും അഭാവം കിവികള്‍ക്ക് കനത്ത തിരിച്ചടിയാവും. വില്യംസണിന്‍റെ കൈമുട്ടിനേറ്റ പരിക്ക് നിരീക്ഷിച്ചുവരുകയാണെന്ന് കോച്ച് ഗാരി സ്റ്റീഡ് വ്യക്തമാക്കി. 

പരുക്ക് ഭേദമായില്ലെങ്കിൽ ലോകകപ്പിലെ ആദ്യ മത്സരം വില്യംസണിന് നഷ്‌ടമാകും. ഒക്‌ടോബര്‍ 26ന് പാകിസ്ഥാനെതിരെയാണ് ന്യൂസിലൻഡിന്‍റെ ആദ്യ പോരാട്ടം. കഴിഞ്ഞ ദിവസം ഇംഗ്ലണ്ടിനെതിരായ സന്നാഹ മത്സരത്തിൽ കെയ്ൻ വില്യംസൺ ബാറ്റ് ചെയ്‌‌തിരുന്നില്ല. മത്സരം 13 റൺസിന് ന്യൂസിലൻഡ് തോറ്റിരുന്നു.

ആമിർ ഖാനെതിരെ കർണാടക എംപി

Metrom Australia Oct. 22, 2021

ആമിര്‍ ഖാന്‍ അഭിനയിച്ച സിയറ്റ് ടയറിന്റെ പരസ്യത്തിനെതിരെ ബിജെപി എംപി അനന്തകുമാര്‍ ഹെഗ്‌ഡെ. കര്‍ണാടകയിലെ ഉത്തരക്കന്നഡ എംപിയാണ് അനന്തകുമാര്‍ ഹെഗ്‌ഡെ. പരസ്യത്തില്‍ തെരുവില്‍ പടക്കം പൊട്ടിക്കരുതെന്ന് ആമിര്‍ഖാന്‍ ഉപദേശം നല്‍കുന്നുണ്ട്. ഇതാണ് ഹെഗ്ഡയെ ചൊടിപ്പിച്ചത്. 

പരസ്യം ഹിന്ദുമത വിശ്വാസികളെ വേദനിപ്പിക്കുന്നതാണെന്നാണ് ഹെഗ്‌ഡെ കമ്പനി സിഇഒ ആനന്ദ് വര്‍ധന് കത്തെഴുതിയിട്ടുണ്ട്. റോഡില്‍ വഴിമുടക്കി നമസ്‌കരിക്കരുതെന്ന് പറയാനും ബാങ്ക് വിളി സമയത്തെ പള്ളികളില്‍ നിന്നുയരുന്ന ശബ്ദ മലിനീകരണം ഒഴിവാക്കണമെന്ന് പറയാന്‍ ധൈര്യപ്പെടുമോയെന്ന് ഹെഗ്ഡെ കത്തിലൂടെ ചോദിക്കുന്നു. ഹിന്ദുക്കള്‍ക്കിടയില്‍ ആശങ്ക സൃഷ്ടിക്കുന്ന പരസ്യം ശ്രദ്ധിക്കണമെന്നും ഭാവിയില്‍ ഇത്തരം പരസ്യങ്ങള്‍ ഒഴിവാക്കുമെന്ന് പ്രതീക്ഷിക്കുന്നതായും എംപി കത്തില്‍ വ്യക്തമാക്കി.

തെരുവിൽ പടക്കം പൊട്ടിക്കരുതെന്ന് ആമീർ ഖാൻ ആളുകളെ ഉപദേശിക്കുന്ന നിങ്ങളുടെ കമ്പനിയുടെ പുതിയ പരസ്യം വളരെ നല്ല സന്ദേശമാണ് നൽകുന്നത്. പൊതു പ്രശ്നങ്ങളോടുള്ള നിങ്ങളുടെ ആശങ്ക കയ്യടി അര്‍ഹിക്കുന്നു. ഇതുപോലെ റോഡുകളിൽ ആളുകൾ അഭിമുഖീകരിക്കുന്ന ഒരു പ്രശ്നം കൂടി പരിഹരിക്കാൻ ഞാൻ നിങ്ങളോട് അഭ്യർത്ഥിക്കുന്നു, അതായത്, വെള്ളിയാഴ്ചകളിൽ നമസ്കാരത്തിന്റെ പേരിലും മുസ്ലീങ്ങളുടെ മറ്റ് പ്രധാന ഉത്സവ ദിവസങ്ങളിലും റോഡുകൾ തടയുന്നതാണത്'-കത്തില്‍ ഹെഗ്ഡെ പറയുന്നു. 'ഹിന്ദു വിരുദ്ധ അഭിനേതാക്കള്‍' എന്ന സംഘം എപ്പോഴും ഹിന്ദു മതവികാരത്തെ വ്രണപ്പെടുത്താനാണ് ശ്രമിക്കുന്നത്. അവര്‍ ഒരിക്കലും അവരുടെ സമുദായത്തിന്റെ തെറ്റായ കാര്യങ്ങള്‍ വെളിപ്പെടുത്തില്ലെന്നും എംപി അയച്ച കത്തില്‍ പറയുന്നു. 

വിദേശത്തുള്ള മാതാപിതാക്കൾക്ക് ഓസ്ട്രേലിയയിലേക്ക് വരാൻ അനുമതി

Metrom Australia Oct. 22, 2021

ഓസ്‌ട്രേലിയൻ പൗരന്മാരുടെയും റെസിഡൻസിന്റെയും വിദേശത്തുള്ള മാതാപിതാക്കൾക്ക് രാജ്യത്തേക്ക് യാത്ര ചെയ്യാനുള്ള അപേക്ഷകൾ സ്വീകരിച്ചു തുടങ്ങി. ഇക്കാര്യം ഓസ്‌ട്രേലിയൻ ആഭ്യന്തര മന്ത്രാലയമാണ് അറിയിച്ചത്. യാത്രാ ഇളവിനായുള്ള അപേക്ഷകൾ ഇന്ന് മുതൽ ആഭ്യന്തര മന്ത്രാലയത്തിന്റെ ട്രാവൽ എക്സംഷൻ പോർട്ടലിൽ സ്വീകരിച്ചു തുടങ്ങിയിട്ടുണ്ട്. എന്നാൽ ഈ ഇളവിനായി അപേക്ഷിക്കാൻ ചില മാനദണ്ഡങ്ങൾ ബാധകമാണ്. 

1. ഓസ്‌ട്രേലിയിലുള്ള മകന്റെയോ/ മകളുടെയോ പൗരത്വം അല്ലെങ്കിൽ പെർമനന്റ് റെസിഡൻസി തെളിയിക്കുന്ന രേഖയും, ഈ വ്യക്തിയുടെ മാതാപിതാക്കളാണെന്ന് തെളിയിക്കുന്ന രേഖയും സമർപ്പിക്കണം.

2. പാസ്‌പോർട്ട്, വിസ, വാക്‌സിനേഷൻ പൂർത്തിയാക്കിയ രേഖ തുടങ്ങിയവ യാത്രക്ക് ആവശ്യമാണ്.

3. ജനന സർട്ടിഫിക്കറ്റ്, അഡോപ്ഷൻ സർട്ടിഫിക്കറ്റ്, വിവാഹ സർട്ടിഫിക്കറ്റ് അല്ലെങ്കിൽ കുടുംബ സ്റ്റാറ്റസ് തെളിയിക്കുന്ന രേഖ ഹാജരാക്കണം. (അപേക്ഷയിൽ അനുവദിക്കുന്ന മറ്റ് രേഖകളുടെ ഉദാഹരണം ഡിപ്പാർട്മെന്റ് സൈറ്റിൽ നൽകിയിട്ടുണ്ട്.)

4. എല്ലാ രാജ്യാന്തര യാത്രക്കാരും ഓരോ സംസ്ഥാനത്തിന്റെയും ടെറിട്ടറിയുടെയും ക്വാറന്റൈൻ നിയമങ്ങൾ പാലിക്കേണ്ടതുണ്ട്.

അതേസമയം ഓസ്‌ട്രേലിയയിലേക്ക് യാത്ര ചെയ്യുന്നതിനായി പൗരന്മാരുടെയും റെസിഡെൻസിന്റെയും മാതാപിതാക്കളെ അടുത്ത ബന്ധുക്കളായി കണക്കാക്കുമെന്ന് സർക്കാർ നേരത്തെ വ്യക്തമാക്കിയിരുന്നു. എന്നാൽ ഈ മാറ്റം അടുത്ത മാസം ഒന്ന് മുതൽ പ്രാബല്യത്തിൽ വരുന്നതാണ്. 

രാജ്യാന്തര വിദ്യാർത്ഥികൾക്ക് ക്വാറന്റൈനില്ലാതെ ACT യിൽ തിരിച്ചെത്താം

Metrom Australia Oct. 22, 2021

വാക്‌സിനേഷൻ പൂർത്തിയാക്കിയ രാജ്യാന്തര വിദ്യാർത്ഥികളെ ACTയിലേക്ക് ക്വാറന്റൈൻ ഇല്ലാതെ തിരിച്ചുവരാൻ അനുവദിക്കുമെന്ന് സർക്കാർ അറിയിച്ചു.ഓസ്‌ട്രേലിയൻ ക്യാപിറ്റൽ ടെറിട്ടറിയിലേക്ക് രാജ്യാന്തര വിദ്യാർത്ഥികൾക്ക് 2022 ആദ്യത്തോടെ തിരിച്ചെത്താൻ സാധിക്കുമെന്ന് ടെറിട്ടറി സർക്കാർ വ്യക്തമാക്കി.

TGA അംഗീകൃത വാക്‌സിനേഷൻ പൂർത്തിയാക്കിയ വിദ്യാർത്ഥികൾക്ക്  ക്വാറന്റൈൻ നടപടികൾ ബാധകമായിരിക്കില്ല.കൂടാതെ ഓസ്‌ട്രേലിയൻ സർക്കാറിന്റെ പരിശോധനാ നിർദ്ദേശങ്ങൾക്ക് ഇവർ വിധേയമാകണമെന്ന് ടെറിട്ടറി സർക്കാർ അറിയിച്ചു.

ടെറിട്ടറിയിലെ ഒരുക്കങ്ങളെക്കുറിച്ച് വ്യക്തത ലഭിച്ചതും അതിർത്തി തുറക്കുമ്പോൾ രാജ്യാന്തര വിദ്യാർത്ഥികൾക്ക് തിരിച്ചെത്താൻ കഴിയുമെന്നുമുള്ള വിവിരങ്ങൾ പ്രതീക്ഷ നൽകുന്നതായി ANU വൈസ് ചാന്സലർ ബ്രയാൻ ഷ്മിറ്റ് പറഞ്ഞു.അതെസമയം രാജ്യ തലസ്ഥാനത്ത് നിയന്ത്രണങ്ങളിൽ കൂടുതൽ ഇളവുകളും നടപ്പിലാക്കി.

കൂട്ടിക്കലിന് കൈത്താങ്ങായി മമ്മൂട്ടി

Metrom Australia Oct. 22, 2021 LIFESTYLE

കേരളത്തെ നടുക്കിയ ഉരുൾപൊട്ടൽ ദുരിതത്തിൽ പ്രതീക്ഷകൾ നഷ്ടപ്പെട്ടവർക്ക് സഹായങ്ങളുമായി നടൻ മമ്മൂട്ടി. തന്റെ ജീവകാരുണ്യ സംഘടനയായ കെയർ ആൻഡ് ഷെയർ ഇന്റർനാഷണൽ ഫൗണ്ടേഷൻ വഴിയാണ് മമ്മൂട്ടി പ്രളയബാധിതർക്ക് സഹായങ്ങൾ എത്തിക്കുന്നത്. ദുരിതാശ്വാസ ക്യാമ്പുകളിൽ മമ്മൂട്ടി തന്നെ നേരിട്ട് ഏർപ്പാട് ചെയ്ത വിദഗ്ധ ഡോക്ടർമാർ അടങ്ങിയ മെഡിക്കൽ സംഘം ഇന്നലെ രാവിലെ എത്തി സേവനം ആരംഭിച്ചിട്ടുണ്ട്. വിദഗ്ധ ഡോക്ടർമാരും നിരവധി ആധുനിക മെഡിക്കൽ ഉപകരണങ്ങളും, മരുന്നുകളുമായാണ് സംഘം എത്തിയത്.

ആരോഗ്യമേഖല കൂടാതെ മറ്റു സഹായങ്ങളും മമ്മൂട്ടി കൂട്ടിക്കലിൽ എത്തിച്ചു. പത്ത് കുടുംബങ്ങൾക്ക് ഒന്ന് വീതം ജലസംഭരണി വെച്ച് 100 ജലസംഭരണികൾ, പുരുഷന്മാർ - സ്ത്രീകൾ  ഉൾപ്പെടെ എല്ലാവർക്കും അനുയോജ്യമായ പുതിയ വസ്ത്രങ്ങൾ, പാത്രങ്ങൾ,കിടക്കകൾ തുടങ്ങിയ മറ്റ് അവശ്യ വസ്തുക്കൾ അടങ്ങുന്ന രണ്ടായിരത്തിലധികം കിറ്റുകളും വിതരണം ചെയ്തു. കൂട്ടിക്കൽ ദുരന്തവാർത്ത ലോക മറിഞ്ഞതിന് തൊട്ടുപിന്നാലെ കെയർ ആൻഡ് ഷെയർ മാനേജിങ് ഡയറക്ടർ ഫാ തോമസ് കുര്യൻ മരോട്ടിപ്പുഴയെയും സംഘത്തെയും മമ്മൂട്ടി ദുരന്ത സ്ഥലത്തേക്ക് അയച്ചിരുന്നു. പ്രദേശങ്ങൾ നേരിട്ടു കണ്ടതിനുശേഷം അവർ തയ്യാറാക്കിയ റിപ്പോർട്ട് പ്രകാരമാണ് സഹായങ്ങൾ എത്തിച്ചിരിക്കുന്നത്. ദുരന്ത സ്ഥലത്തെ കെയർ ആൻഡ് ഷെയർ സംഘടനയുടെ പ്രവർത്തനങ്ങൾ മമ്മൂട്ടി നേരിട്ടാണ് നിയന്ത്രിക്കുന്നത്. ഇപ്പോൾ ചെയ്യുന്നത് അടിയന്തര സേവനങ്ങൾ ആണെന്നും കൂടുതൽ സഹായങ്ങൾ വരുംദിവസങ്ങളിൽ ദുരിതബാധിതർക്ക് എത്തിക്കുമെന്നും കെയർ ആൻഡ് ഷെയർ ഡയറക്ടർ ബോർഡ് അറിയിച്ചു. കൂടാതെ മമ്മൂട്ടിയുടെ വിദേശത്തുള്ള ആരാധക കൂട്ടായ്മയായ മമ്മൂട്ടി ഫാൻസ് ആൻഡ് വെൽഫെയർ അസോസിയേഷൻ ഇന്റർനാഷണൽ പ്രവർത്തകരും കെയർ ആൻഡ് ഷെയർ വഴി സഹായം എത്തിക്കുന്നുണ്ട്.