ടി20 ലോകകപ്പ്: ദക്ഷിണാഫ്രിക്കയ്ക്കെതിരെ ഓസീസിന് ജയം

അബുദാബി: ടി20 ലോകകപ്പില്‍ സൂപ്പര്‍ 12 ഘട്ടത്തിലെ പോരാട്ടത്തില്‍ ദക്ഷിണാഫ്രിക്കയ്ക്കെതിരെ ഓസീസിന് ജയം. ആദ്യം ബാറ്റ് ചെയ്ത് ദക്ഷിണാഫ്രിക്ക ഉയര്‍ത്തിയ 119 റണ്‍സ് വിജയലക്ഷ്യം മൂന്നു പന്തും അഞ്ച് വിക്കറ്റും ബാക്കി നിര്‍ത്തി ഓസ്ട്രേലിയ മറികടന്നു.

ദക്ഷിണാഫ്രിക്ക ഉയര്‍ത്തിയ ചെറിയ വിജയലക്ഷ്യം തേടിയിറങ്ങിയ ഓസീസ്  തകര്‍ച്ചയോടെയാണ് തുടങ്ങിയത്. സ്കോര്‍ ബോര്‍ഡില്‍ 20 റണ്‍സെത്തിയപ്പോഴേക്കും ഓപ്പണര്‍മാരായ ക്യാപ്റ്റന്‍ ആരോണ്‍ ഫിഞ്ചും(0) ഡേവിഡ് വാര്‍ണറും(14) ഡഗ് ഔട്ടില്‍ തിരിച്ചെത്തി. പിന്നീട് മിച്ചല്‍ മാര്‍ഷുമൊത്ത് സ്റ്റീവ് സ്മിത്ത് ഓസീസിനെ കരകയറ്റാന്‍ ശ്രമിച്ചെങ്കിലും മാര്‍ഷിനെ(11) മടക്കി കേശവ് മഹാരാജ് ഓസീസിനെ പ്രതിസന്ധിയിലാക്കി. എന്നാല്‍ നാലാം വിക്കറ്റില്‍ ഒത്തുചേര്‍ന്ന സ്മിത്തും ഗ്ലെന്‍ മാക്സ്‌വെല്ലും ചേര്‍ന്ന് ഓസീസിനെ ട്രാക്കിലാക്കി. പതിനഞ്ചാം ഓവറില്‍ 34 പന്തില്‍ 35 റണ്‍സെടുത്ത സ്മിത്തിനെ നോര്‍ട്യയുടെ പന്തില്‍ എയ്ഡന്‍ മാര്‍ക്രം പറന്നു പിടിച്ചതോടെ ദക്ഷിണാഫ്രിക്കക്ക് വീണ്ടും പ്രതീക്ഷയായി. തൊട്ടടുത്ത ഓവറില്‍ മാക്സ്‌വെല്ലിനെ(18) തബ്രൈസ് ഷംസി ക്ലീന്‍ ബൗള്‍ഡാക്കിയതോടെ ഓസീസ് അപകടം മണത്തു. പതിനാറാം ഓവര്‍ കഴിഞ്ഞപ്പോഴേക്കും 83-5 എന്ന നിലയില്‍ പതറിയ ഓസീസിനെ ആറാം വിക്കറ്റില്‍ 38 റണ്‍സ് കൂട്ടിച്ചേര്‍ത്ത മാര്‍ക്കസ് സ്റ്റോയ്നിസും മാത്യു വെയ്ഡ‍ും ചേര്‍ന്നാണ് വിജയത്തിലേക്ക് എത്തിച്ചത്. 

നേരത്തെ ടോസ് നഷ്‌ടപ്പെട്ട് ബാറ്റിംഗിനിറങ്ങിയ പ്രോട്ടിസീനെ 20 ഓവറില്‍ 9 വിക്കറ്റിന് 118 റണ്‍സ് എന്ന നിലയില്‍ ഓസീസ് കൂടാരം കേറ്റി. രണ്ടാം ഓവറില്‍ നായകന്‍ തെംബ ബവൂമയെ(12) മാക്‌സ്‌വെല്‍ ബൗള്‍ഡാക്കി. തൊട്ടടുത്ത ഓവറിലെയും നാലാം ഓവറിലേയും ആദ്യ പന്തുകളില്‍ റാസ്സി വാന്‍ ഡര്‍ ഡസ്സന്‍(2), ക്വിന്‍റണ്‍ ഡി കോക്ക്(7) എന്നിവരെ മടക്കി ഹേസല്‍വുഡ് ഇരട്ട പ്രഹരം നല്‍കി.  എട്ടാം ഓവറില്‍  ഹെന്‍‌റിച്ച് ക്ലാസനെ(13) കമ്മിന്‍സും 14-ാം ഓവറില്‍ ഡേവിഡ് മില്ലറിനെയും(16), ഡ്വെയ്ന്‍ പ്രിട്ടോറിയൂസിനേയും(1) സാംപയും മടക്കിയതോടെ ദക്ഷിണാഫ്രിക്ക തകർന്നു. തൊട്ടടുത്ത ഓവറില്‍ കേശവ് മഹാരാജ് അക്കൗണ്ട് തുറക്കും മുമ്പ് റണ്ണൗട്ടായി. എയ്ഡന്‍ മാര്‍ക്രം(40) ഒരറ്റത്ത് പിടിച്ചുനിന്നെങ്കിലും ടീം സ്‌കോര്‍ 100 കടക്കും മുമ്പ് 18-ാം ഓവറിലെ ആദ്യ പന്തില്‍ സ്റ്റാര്‍ക്ക് മടക്ക ടിക്കറ്റ് നല്‍കി.

20 ഓവര്‍ പൂര്‍ത്തിയാകുമ്പോള്‍ 118/9 എന്ന സ്‌കോറില്‍ ദക്ഷിണാഫ്രിക്ക ഒതുങ്ങി. സ്റ്റാര്‍ക്കിന്‍റെ അവസാന ഓവറില്‍ ആന്‍‌റിച്ച് നോര്‍ട്യ(2) വീണു. കാഗിസോ റബാഡയും(19*), തംബ്രൈസ് ഷംസിയും(0*) പുറത്താകാതെ നിന്നു. ഹേസല്‍വുഡിന്‍റെയും സാംപയുടെയും സ്റ്റാര്‍ക്കിന്‍റേയും രണ്ട് വിക്കറ്റുകള്‍ക്ക് പുറമെ മാക്‌സ്‌വെല്ലും കമ്മിന്‍സും ഓരോ വിക്കറ്റ് നേടി.
സ്ലോ പിച്ചില്‍ അഞ്ച് ബൗളര്‍മാരുമായി ഇറങ്ങിയത് ദക്ഷിണാഫ്രിക്കക്ക് തിരിച്ചടിയായത്. രണ്ട് വിക്കറ്റ് വീതം വീഴ്‌ത്തിയ ജോഷ് ഹേസല്‍വുഡ്, ആദം സാം, മിച്ചല്‍ സ്റ്റാര്‍ക്ക് എന്നിവരുടെ ബൗളിംഗാണ് ഓസീസിനെ തുണച്ചത്. സ്കോര്‍: ദക്ഷിണാഫ്രിക്ക 20 ഓവറില്‍ 118-9, ഓസ്ട്രേലിയ 19.3 ഓവറില്‍ 121-5.

കുഞ്ഞിനെ തിരികെ കിട്ടാൻ വേണ്ട നടപടിയെടുക്കുമെന്ന് അനുപമയ്ക്ക് ഉറപ്പ് നൽകി വീണാ ജോർജ്ജ്

തിരുവനന്തപുരം: കുഞ്ഞിനെ തിരികെ കിട്ടാനായി നിരാഹാര സമരവുമായി മുന്നോട്ട് പോകുന്നതിനിടെ അനുപമയെ മന്ത്രി വീണാ ജോർജ്ജ് വിളിച്ച് സംസാരിച്ചു. നടപടി എടുക്കുമെന്ന് മന്ത്രി ഉറപ്പ് നൽകിയെന്നും താനും ഒരമ്മയാണെന്നും കാര്യങ്ങൾ മനസിലാകുമെന്നും വീണാ ജോർജ്ജ് പറഞ്ഞതായി അനുപമ വ്യക്തമാക്കി. ഈ വിഷയത്തിൽ വീണാ ജോർജ് ഇന്നലെ വകുപ്പ് തല അന്വേഷണത്തിന് ഉത്തരവിട്ടിരുന്നു. വനിത ശിശുക്ഷേമ വകുപ്പ് സെക്രട്ടറിക്കാണ് അന്വേഷണ ചുമതല നൽകിയത്. 

അതേസമയം അനുപമ നേരിട്ട് ഹാജരായി പരാതി നല്‍കാതിരുന്നത് കൊണ്ടാണ് കുഞ്ഞിനെ തിരിച്ചു നല്‍കുന്ന കാര്യത്തില്‍ നടപടി എടുക്കാതിരുന്നതെന്നായിരുന്നു വിഷയത്തിൽ ചെല്‍ഡ് വെല്‍ഫയര്‍ കമ്മിറ്റി ചെയര്‍പേഴ്സണ്‍ അ‍ഡ്വ. എന്‍ സുനന്ദയുടെ വിശദീകരണം. കുട്ടി ദത്ത് പോകുന്നതിന് മൂന്നരമാസം മുമ്പ് അനുപമയുടെ പരാതിയില്‍ നടത്തിയ വീഡിയോ കോണ്‍ഫറന്‍സില്‍ കുഞ്ഞിന്‍റെ വിവരങ്ങള്‍ പറഞ്ഞില്ലെന്നും സുനന്ദ അനുപമയെ കുറ്റപ്പെടുത്തി. 

കഴിഞ്ഞ വര്‍ഷം ഒക്ടോബര്‍ 22ന് പ്രസവിച്ച ശേഷം ആശുപത്രിയിൽ നിന്നും മടങ്ങും വഴി തിരുവനന്തപുരം ജഗതിയില്‍ വെച്ച് തന്‍റെ അമ്മയും അച്ഛനും ചേര്‍ന്ന് കു‍ഞ്ഞിനെ ബലമായി  എടുത്തുകൊണ്ടുപോയി എന്നായിരുന്നു മുൻ എസ്എഫ്ഐ നേതാവ് അനുപമയുടെ പരാതി. ഏപ്രില്‍ 19 ന് പേരൂര്‍ക്കട പോലീസില്‍ ആദ്യ പരാതി നല്‍കി. പിന്നീടങ്ങോട്ട് ഡിജിപി, മുഖ്യമന്ത്രി, ചൈല്‍ഡ് വെല്‍ഫയര്‍ കമ്മിറ്റി, സിപിഎം നേതാക്കള്‍ തുടങ്ങി എല്ലാവര്‍ക്കും പരാതി നല്‍കി. പക്ഷേ കുട്ടി ദത്ത് പോകുന്നവരെ എല്ലാവരും കണ്ണടച്ചു. ഒടുവില്‍ പ്രമുഖ മാധ്യമം ഒക്ടോബര്‍ 14 ന് വാര്‍ത്ത പുറത്ത് കൊണ്ടുവന്നതിന് പിന്നാലെയാണ് പരാതി കിട്ടി ആറ് മാസത്തിന് ശേഷം പോലീസ് എഫ്ഐആര്‍ പോലും രജിസ്റ്റര്‍ ചെയ്തത്.

ജാനകി-നവീൻ്റെ റാസ്പുടിൻ ചുവടുകൾ യുഎന്നിലും തരംഗമാകുന്നു

സോഷ്യൽ മീഡിയയിൽ തരംഗമായി മാറിയ റാസ്പുടിൻ ഡാൻസ് അത്ര എളുപ്പത്തിൽ മറന്ന് കാണില്ല. ഡാൻസിന് പിന്നാലെ കൂട്ടിനായെത്തിയ വിവാദങ്ങളും.. തൃശ്ശൂർ മെഡിക്കൽ കോളേജ് വിദ്യാർത്ഥികളായ  ജാനകി ഓംകുമാറും നവീൻ റസാഖും റാസ്പുടിൻ ഗാനത്തിന് ചുവടുവച്ച ആ വീഡിയോ ഇപ്പോൾ യുഎന്നിൽ വരെ എത്തിയിരിക്കുകയാണ്. 

യുഎൻ പ്രതിനിധി സംഘത്തിലാണ് ഈ ഡാൻസ് വീഡിയോ ചർച്ചയായത്. യുഎന്നിന്റെ കൾച്ചറൽ റൈറ്റ്‌സ് സ്‌പെഷ്യൽ റാപ്പോർട്ടർ കരീമ ബെന്നൌൺസ് ആണ് പ്രസംഗത്തിനിടെ വൈറൽ ഡാൻസിനെ പ്രശംസിച്ചത്. സംസ്കാരികമായ കൂട്ടായ്മകൾ നേരിടുന്ന വെല്ലുവിളികളെ കുറിച്ചുള്ള ചർച്ചയ്ക്കിടെയാണ് കരീമയുടെ പരാമർശം. 'സാംസ്കാരിക വേർതിരിവുകൾ മാറ്റിനിർത്തി ഒന്നിച്ചു നൃത്തം ചെയ്ത രണ്ട് യുവതീ യുവാക്കൾക്ക് ലഭിച്ച വ്യാപകമായ  പിന്തുണയായിരുന്നു. ഒപ്പം മൗലിക വാദികൾ  വലിയ അധിക്ഷേപങ്ങളും ഇവർക്കെതിരെ നടത്തുകയുണ്ടായി. വിദ്വേഷ പ്രചാരണങ്ങൾക്കും ഇവർ ഇരയാക്കപ്പെട്ടു. എന്നാൽ ഇനിയും ഒന്നിച്ച് ഡാൻസ് ചെയ്യുമെന്നായിരുന്നു ജാനകിയുടെയും നവീന്റെയും പ്രതികരണം.. ഇത് പ്രശംസനീയമാണെന്നും ബെന്നൌൺസ് പറഞ്ഞു.

ആ യുവാക്കളുടെ പ്രതികരണം നമ്മുടെയെല്ലാം കൂട്ടായുള്ള പ്രതികരണമായി മാറേണ്ടതാണ്. ഈ 21-ാം നൂറ്റാണ്ടിൽ സാംസ്കാരികമായ അവകാശങ്ങൾ വേർതിരിവില്ലാതെ ഉയർത്തിപ്പിടിക്കാൻ, സംസ്‌കാരത്തെയും സ്വത്വത്തെയും വൈവിധ്യമാർന്ന സാംസ്‌കാരിക സമന്വയങ്ങളെയുമെല്ലാം കുറിച്ചുള്ള തെറ്റായ ധാരണകളെ ശക്തമായും ക്രിയാത്മകമായും പ്രതിരോധിക്കുക എന്നത് മാത്രമാണ് പോംവഴിയെന്നും അവർ കൂട്ടിച്ചേർത്തു.

'പരം സുന്ദരി' ഗ്രാമി പുരസ്കാരത്തിന്

റീൽസിലൂടെ സൂപ്പർ ഹിറ്റായി മാറിയ 'പരം സുന്ദരി' എന്ന ഗാനം ഗ്രാമി പുരസ്‌കാരത്തിന് പരിഗണിക്കുന്നു. 64-ാമത് ഗ്രാമി പുരസ്‌കാരത്തിന് മിമിക്ക് വേണ്ടി ഒരുക്കിയ പരം സുന്ദരി പരിഗണിക്കപ്പെടുന്നു എന്ന വിവരം സംഗീത സംവിധായകന്‍ എ ആര്‍ റഹ്മാന്‍ തന്നെയാണ് അറിയിച്ചത്. ട്വിറ്ററില്‍ ഗാനം പങ്കുവച്ച് കൊണ്ടായിരുന്നു റഹ്മാന്റെ പ്രതികരണം. 

അമിത് ഭട്ടാചാര്യുടെ വരികള്‍ക്ക് എആര്‍ റഹ്മാന്‍ സംഗീതം നല്‍കിയ ഗാനം ശ്രേയ ഘോഷാലാണ് ഗാനം ആലപിച്ചിരിക്കുന്നത്. കൃതി സനോണ്‍ ആണ് ഗാന രംഗങ്ങളില്‍ പ്രത്യക്ഷപ്പെടുന്നത്. കൃതിക്കൊപ്പം 600 പേരും ഗാന രംഗങ്ങലില്‍ ഉണ്ട്. യൂട്യൂബില്‍ 200 മില്യണ്‍ ആളുകളാണ് വീഡിയോ ഗാനം ഇതിനോടകം കണ്ടിട്ടുള്ളത്. 

ടി20 ലോകകപ്പ്: ഫേവറൈറ്റുകളെ വെളിപ്പെടുത്തി ബ്രെറ്റ് ലീ

ദുബൈ: ടി20 ലോകകപ്പിലെ ഫേവറൈറ്റുകളെ വെളിപ്പെടുത്തി മുന്‍ ഓസ്ട്രേലിയന്‍ താരം ബ്രെറ്റ് ലീ. ഇന്ത്യന്‍ ടീമാണ് ബ്രെറ്റ് ലീയുടെ
ഫേവറൈറ്റുകൾ. അതേസമയം വിക്കറ്റ് വേട്ടക്കാരനെയും റണ്‍വേട്ടക്കാരനെയും ബ്രെറ്റ് ലീ പ്രവചിച്ചു. ലോകകപ്പില്‍ മികച്ച നാലോ അഞ്ചോ ബാറ്റര്‍മാരും ബൗളര്‍മാരുമുള്ള  ടീമാണ് ഇന്ത്യയെന്നാണ് ലീയുടെ അഭിപ്രായം.

ടി20 ലോകകപ്പില്‍ റണ്‍വേട്ടയില്‍ മുന്നിലെത്തുക ഇന്ത്യയുടെ കെ എല്‍ രാഹുലും വിക്കറ്റ് വേട്ടയില്‍ ഒന്നാമനാകുക ഇന്ത്യയുടെ മുഹമ്മദ് ഷമിയുമാകുമെന്നും ബ്രെറ്റ് ലീ പറഞ്ഞു. കഴിഞ്ഞ ഏതാനും മാസങ്ങളിലെ പ്രകടനം വിലയിരുത്തിയാണ് താനിത് പറയുന്നതെന്നും ബ്രെറ്റ് ലീ വ്യക്തമാക്കി.

ഐപിഎല്ലില്‍ ഫൈനല്‍ പോരാട്ടം വരെ റണ്‍വേട്ടക്കാരനുള്ള ഓറഞ്ച് ക്യാപ് പഞ്ചാബ് കിംഗ്സ് നായകന്‍ കൂടിയായ കെ എല്‍ രാഹുലിനായിരുന്നു. ഫൈനലില്‍ റുതുരാജ് ഗെയ്‌ക്‌വാദും ഫാഫ് ഡൂപ്ലെസിയും രാഹുലിനെ മൂന്നാം സ്ഥാനത്തേക്ക് പിന്തള്ളി. 13 മത്സരങ്ങളില്‍ 62.60 ശരാശരിയില്‍ 626 റണ്‍സാണ് രാഹുല്‍ അടിച്ചെടുത്തത്. പഞ്ചാബ് ടീമിനായി കളിക്കുന്ന ഷമിയാകട്ടെ 14 കളികളില്‍ 19 വിക്കറ്റുമായി തിളങ്ങിയിരുന്നു.