സിഡ്നിയിൽ പ്രാദേശിക കോവിഡ് കേസുകൾ വർധിക്കുന്നു

സിഡ്നിയിലെ ബോണ്ടായി ക്ലസ്റ്ററിലുള്ള കോവിഡ് കേസുകളുടെ എണ്ണം 11 ആയി. വിമാനത്താവളത്തിലെ ഒരു ഡ്രൈവറിൽ നിന്ന് തുടങ്ങിയ ഈ ക്ലസ്റ്ററിൽ ഞായറാഴ്ച രാത്രി വരെയുള്ള 24 മണിക്കൂറിലായി രണ്ട് പുതിയ കേസുകളാണ്  സ്ഥിരീകരിച്ചത്. 

വടക്കൻ സിഡ്നിയിലെ 50 വയസിനു മേൽ പ്രായമുള്ള ഒരു സ്ത്രീക്കും, കിഴക്കൻ സബർബിലുള്ള 30 വയസിനു മേൽ പ്രായമുള്ള പുരുഷനുമാണ് പുതുതായി രോഗബാധ കണ്ടെത്തിയത്. രണ്ടു പേരും മുമ്പ് സ്ഥിരീകരിച്ച കേസുകളുമായി അടുത്ത ബന്ധമുള്ളവരാണ്. ഇരുവരും ഐസൊലേഷനിലായിരുന്നുവെന്നും സംസ്ഥാന ആരോഗ്യ വകുപ്പ് അറിയിച്ചു.

അതേസമയം സിഡ്നിയിൽ കൂടുതൽ പ്രദേശങ്ങൾ സമ്പർക്ക പട്ടികയിൽ ഉൾപ്പെടുത്തി. ബോക്കം ഹിൽസിലെ ഒരു പെട്രോൾ സ്റ്റേഷനും ടെംപിലുള്ള സാൽവോസ് സ്റ്റോറും രോഗബാധിതർ സന്ദർശിച്ചിട്ടുണ്ട്. കൂടാതെ വരും ദിവസങ്ങൾ നിർണ്ണായകമായിരിക്കുമെന്ന് സർക്കാർ അറിയിച്ചു.

സിഡ്നിയിൽ വ്യവസായിക്കെതിരെ അക്രമണം; പണം തട്ടിയെടുത്തു

സിഡ്നി: നോർത്തേൺ ബീച്ചിലുള്ള സ്വന്തം വീടിന് പുറത്ത് വെച്ച് വ്യവസായിയെ രണ്ടുപേർ ചേർന്ന് മർദിച്ചവശനാക്കി പണം തട്ടിയെടുത്തു. കുരുമുളക് സ്‌പ്രേയും ബേസ്ബോൾ ബാറ്റും ഉപയോഗിച്ചാണ് അക്രമിച്ചത്. പഴം, പച്ചക്കറി വിതരണക്കമ്പനിയായ  സാംസന്റെ മാനേജിംഗ് ഡയറക്ടർ കാർലോ ട്രിംബോളിയാണ് ശനിയാഴ്ച 6 മണിയോടെ അക്രമിക്കപ്പെട്ടത്. അക്രമണത്തിനിരയായ ട്രിംബോളിയുടെ കവിളിലെ എല്ലുകൾക്ക് ക്ഷതം സംഭവിച്ചിട്ടുണ്ട്. 46 കാരനായ ഇദ്ദേഹം ഇപ്പോൾ  ആശുപത്രിയിലാണ്. 

അദ്ദേഹത്തിന്റെ ഭാര്യയും നാല് കുട്ടികളും അവരുടെ നോർത്ത് ബൽഗോളയിലെ വീട്ടിനുള്ളിലായിരുന്നു. മുഖംമൂടി ധരിച്ചെത്തിയ രണ്ടുപേർ തന്റെ ഭർത്താവിനെ ആക്രമിച്ചതായി ജോസഫിൻ ട്രിംബോളി പോലീസിനോട് പറഞ്ഞു. തുടർന്ന്  പണവുമായി അവർ ഓടി രക്ഷപ്പെട്ടു. ആക്രമണത്തിന് സാക്ഷികളായവരോട് മുന്നോട്ട് വരാൻ പോലീസ് ആവശ്യപ്പെട്ടിരിക്കുകയാണ്. ഇദ്ദേഹത്തിന്റെ വീടിനെ മോഷ്ടാക്കൾ പിന്തുടർന്നോയെന്ന് പോലീസ് ഇപ്പോൾ അന്വേഷിക്കുകയാണ്.

സർക്കാർ നിയന്ത്രണത്തിൽ ഒ.ടി.ടി

കോവിഡ് രണ്ടാം തരംഗത്തിന്‍റെ പശ്ചാത്തലത്തില്‍ തിയറ്ററുകളിലെ സിനിമാ പ്രദര്‍ശനം പ്രതിസന്ധിയിലായിരിക്കെ സ്വതന്ത്ര ഒ.ടി.ടി എന്ന ആശയവുമായി സംസ്ഥാന സര്‍ക്കാര്‍. സര്‍ക്കാര്‍ നിയന്ത്രണത്തിലുള്ള ഒ.ടി.ടി ഓണത്തിനാണ് ആരംഭിക്കുക. രാജ്യത്ത് തന്നെ ആദ്യമായാണ് ഒരു സംസ്ഥാന സര്‍ക്കാര്‍ സ്വന്തമായി ഒ.ടി.ടി സംവിധാനം കൊണ്ടുവരുന്നത്. 

അഞ്ച് കോടിയോളം രൂപ മുതല്‍ മുടക്കുള്ള പദ്ധതിയുടെ റിപ്പോര്‍ട്ട് കെ.എസ്.എഫ്.ഡി.സി ഇന്നലെ സര്‍ക്കാരിന് സമര്‍പ്പിച്ചു. അംഗീകാരം ലഭിച്ചാല്‍ വിശദ പദ്ധതി രേഖ തയ്യാറാക്കും. സിനിമകള്‍ നിര്‍മാതാക്കളില്‍ നിന്നും പൂര്‍ണമായും (എക്സ്ക്ല്യൂസീവ് റൈറ്റ്സ്) വില കൊടുത്തു വാങ്ങുന്നതിന് പകരം പ്രദര്‍ശനത്തിന്‍റെ നിശ്ചിത ശതമാനം കണക്കാക്കിയാവും സര്‍ക്കാര്‍ ഒ.ടി.ടിയില്‍ നിര്‍മാതാക്കള്‍ക്ക് പങ്കുവെക്കുക. ഒ.ടി.ടിയിലെ സിനിമ കാഴ്ച്ചക്കാരുടെ എണ്ണത്തിന് അനുസരിച്ചായിരിക്കും നിര്‍മാതാക്കള്‍ക്ക് പണം നല്‍കുക. ഇത് മറ്റ്  ഒ.ടി.ടി പ്ലാറ്റുഫോമുകൾ മുന്നോട്ടുവെക്കുന്ന പേ പെര്‍ വ്യൂ (Pay Per View) സംവിധാനത്തിന് സമാനമാണ്.

പുതിയ തീരുമാനത്തില്‍ നിര്‍മാതാക്കളുടെ നിലപാട് ആയിരിക്കും നിര്‍ണായകം. തിയറ്ററുകളിൽ പ്രദർശിപ്പിച്ച ചിത്രങ്ങൾ, തിയറ്ററുകൾ കിട്ടാൻ ബുദ്ധിമുട്ടുന്ന അവാർഡ് ചിത്രങ്ങൾ,​ ചിത്രാ‌ഞ്ജലി പാക്കേജിൽ നിർമ്മിക്കുന്ന ചിത്രങ്ങൾ എന്നിവക്ക് സര്‍ക്കാര്‍ ഒ.ടി.ടി ഗുണകരമാകും. 

ദി ഗ്രേറ്റ് ഇന്ത്യൻ കിച്ചൺ ജപ്പാനിൽ തിയേറ്റർ റിലീസിന് ഒരുങ്ങുന്നു

മലയാളത്തിലെ നീസ്ട്രീം ഒ.ടി.ടി പ്ലാറ്റ്ഫോമിലൂടെ പുറത്തിറങ്ങി പിന്നീട് വലിയ പ്രേക്ഷക നിരൂപക പ്രശംസയും പുരസ്കാരങ്ങളും സ്വന്തമാക്കിയ ദി ഗ്രേറ്റ് ഇന്ത്യന്‍ കിച്ചണ്‍ ജപ്പാനില്‍ തിയറ്റര്‍ റിലീസിന് ഒരുങ്ങുന്നു. ചിത്രം പുറത്തിറങ്ങി അഞ്ച് മാസങ്ങള്‍ക്ക് ശേഷമാണ് ജപ്പാനിലെ തിയറ്ററുകളില്‍ ചിത്രം റിലീസ് ചെയ്യുന്നത്. സിനിമയുടെ ജപ്പാനീസ് വിതരണാവകാശം നേരത്തെ വിറ്റുപോയിരുന്നു. 

ചിത്രത്തിന്‍റെ ഒ.ടി.ടി റിലീസിന് തൊട്ടുപിന്നാലെ ചലച്ചിത്ര മേളകള്‍ക്ക് വേണ്ടി സിനിമയുടെ പ്രദര്‍ശനാവശ്യത്തിനുവേണ്ടി വിവിധ സിനിമാ ഏജന്‍റുമാര്‍ സമീപിച്ചിരുന്നതായി നിര്‍മാതാവ് ജോമോന്‍ ജേക്കബ് പറഞ്ഞു. അത്തരത്തില്‍ സിനിമ ഷാങ്ഹായ് ഫെസ്റ്റിവലിലേക്ക് തെരഞ്ഞെടുക്കപ്പെടുകയും പിന്നീട് ജപ്പാനില്‍ തന്നെ റിലീസിന് അവസരം ലഭിക്കുകയും ചെയ്യുകയായിരുന്നുവെന്ന് നിര്‍മാതാവ് പറയുന്നു.

ഷാങ്ഹായ് ചലച്ചിത്രോത്സവത്തിലെ സ്പെക്ട്രം: ആള്‍ട്ടര്‍നേറ്റീവ്സ്' വിഭാഗത്തിലാണ് ദി ഗ്രേറ്റ് ഇന്ത്യന്‍ കിച്ചണ്‍ പ്രദര്‍ശിപ്പിക്കുന്നത്. ജപ്പാനീസ് സബ് ടൈറ്റിലുകളും ചിത്രത്തിനുണ്ടാകും. ജിയോ ബേബി സംവിധാനം ചെയ്ത ദി ഗ്രേറ്റ് ഇന്ത്യന്‍ കിച്ചണില്‍ സുരാജ് വെഞ്ഞാറമൂടും നിമിഷ സജയനുമാണ് പ്രധാന കഥാപാത്രങ്ങളെ അവതരിപ്പിച്ചത്.

ടെസ്റ്റ് ചാംപ്യൻഷിപ്പ് ഫൈനൽ: മിൽഖാ സിങ്ങിന് ആദരവുമായി ഇന്ത്യൻ ടീം

മഴയിൽ മുങ്ങിയ ആദ്യദിനത്തിനുശേഷം ലോക ടെസ്റ്റ് ചാംപ്യൻഷിപ്പ് ഫൈനലിന് രണ്ടാംദിനത്തിൽ അന്തരിച്ച അത്‌ലറ്റിക്‌സ് ഇതിഹാസം മിൽഖാ സിങ്ങിന് ആദരവുമായി കറുത്ത ബാഡ്ജ് അണിഞ്ഞാണ് ഇന്ത്യൻ ടീം മത്സരത്തിനിറങ്ങിയത്. ഇക്കാര്യം അറിയിച്ച് ബിസിസിഐ ട്വിറ്ററിൽ കുറിപ്പിട്ടിരുന്നു. മത്സരത്തിനുമുൻപ് ദേശീയ ഗാനം ആലപിക്കുമ്പോൾ കറുത്ത ബാഡ്ജ് അണിഞ്ഞാണ് ഇന്ത്യൻ താരങ്ങൾ അണിനിരന്നത്.

നേരത്തെ ഇന്ത്യൻ നായകൻ വിരാട് കോഹ്ലി മില്‍ഖാ സിങ്ങിന് ട്വിറ്ററിൽ ആദരാഞ്ജലി അർപ്പിച്ചു. മികവ് ലക്ഷ്യമിട്ടു പ്രവർത്തിക്കാൻ രാജ്യത്തെ മുഴുവൻ പ്രചോദിപ്പിച്ച ഒരു പൈതൃകമായിരുന്നു മിൽഖാ സിങ്ങെന്നാണ് കോഹ്ലി കുറിച്ചത്. ലക്ഷ്യങ്ങൾ ഒരിക്കലും വിടാതെ പിന്തുടർന്നു കീഴടക്കാൻ അദ്ദേഹം രാജ്യത്തെ പ്രചോദിപ്പിച്ചെന്നും കോഹ്ലി കുറിച്ചു.